2012: Abbé Pierre

Motivu conmemorativu: Centenariu del nacimientu del abbé Pierre

Tirada: 10.000.000               Fecha d’emisión: 13 xunetu

     Henri Grouès (1912 – 2007); más conocíu como l’abbé Pierre o l’ánxelu de los probes, foi un sacerdote católicu francés, miembru de la Resistencia na II Guerra Mundial y fundador en 1949 del movimientu Emaús (Traperos d’Emaús), una ONX de llucha escontra la esclusión y la probeza. A final de 1954 y entamu de 1955, conmovió a los franceses al face-yos ver el drama de los que taben ensin techu, na cai, morriendo pol cutu del iviernu de París. El so llabor tuvo repercusión mundial y foi reconocíu en 2004 pol Estáu francés, que lu distinguió cola Gran Cruz de la Lexón d’Honor.

     Nel intre la moneda aparez el bustu del abad Pierre cola so famosa boina lladeada a manzorga. A mandrecha aparez el logotipu de la fundación que lleva’l so nome, con un microtestu nel que se llee Et les autres? (¿Y los otros?), que yera la so divisa favorita pa nun escaecer a los demás. So elli tá l’añu d’emisión 2012 y la marca del direutor de la ceca. Alredor del diseñu, la lleenda Centenaire de la naissance de l´abbé Pierre; la marca la ceca de Pessac tá na parte inferior izquierda xuntu les grafíes RF, iniciales del nome del país emisor.

     Nel aniellu esterior les doce estrelles de la Xunión Europea.