Si falar de maravedinos mos tresporta a estayes cuasi romántiques y d’aventura, de lluches ente moros y cristianos, caballeros y dames n’apuros, el real invítamos por contra a viaxar a la Corte del rei, a la vida en palaciu y la bayura de la nobleza. Dambes dos monedes nacieron na Edá Media y dambes dos morrieron so’l reináu d’Isabel II; pero mientres que’l maravedí andalusí nació d’oru, espoxigó de vellón y finó de cobre, el real, d’orixe netamente cristianu, siempres tuvo cuerpu de plata, salvu na so estaya final, y de la man de Xosé I Bonaparte, qu’acuñó dellos valores n’oru y que llegaron hasta la cabera reforma monetaria d’Isabel II. El nacimientu del real fai que’l reinu de Castiella ruempa col so pasáu altumedieval, ya que por elli desaniciaranse los vieyos dineros (denarios) y el so submúltiplu la miaya, pa la fabricación de numberariu en plata.
La fecha nacencia del real ye un misteriu; nun se sabe un res del momentu nel que’l rei Pedru decide poner en marcha tala reforma monetaria. La busca d’una moneda autóctona castellana, fiable y durable nel tiempu, foi una constante ente los reis llioneses y castellanos, sobremanera dende que Fernandu III xuntare definitivamente los dos reinos. Tolos proyeutos chocaben escontra dixebres dificultaes, la principal, esa dualidá propia de los reinos peninsulares de querer asemeyar les sos monedes a les vinientes d’Europa, pero que finaben axustando a la métrica propia de los reinos andalusíes, por obvios temes comerciales. El caberu rei n’intentalo, fuere Alfonsu X, pero la falta plata nel mercáu y les fuertes rellaiciones comerciales con al-Ándalus, siempres ávida d’esti noble metal, frayó tou proyeutu. N’esti sen, Pedro I diba ser un revolucionariu. La unidá de cuenta dexó de ser el sueldu y el dineru y la miaya foron xuplíos pol real y el mediu real, calteniendo, eso sí, el maravedí como unidá de cuenta, al ser fácil d’identificar por comerciantes y ciudadanos. El so batimientu masivu, dende’l prencipiu, fexo que la nueva moneda del rei durare nel tiempu, llegando hasta la segunda metá del sieglu XIX y pasando por ser la divisa de referencia de Castiella, la Monarquía Hispánica y el so Imperiu, ya inclusu ser la primer divisa reconocía y aceutada nos mercaos internacionales d’ultramar.
Dellos estudios aceuten la idega de que’l real castellán asemeyó al gros tournois, moneda francesa de plata fina y acuñada dende 1266, so’l reináu de Lluís IX, San Lluís (1226-1270) ya inspiráu a la so vez, nos dinares d’oru o sarracinos acuñaos polos cruzados en Palestina (Lluís IX tuvo perellí tres la so desastrosa invasión d’Exiptu). Non en baldre, el so diseñu foi referente pa otres divises europées.
 |
|
Gros Tournois d’argent de Lluís IX |
El reináu de Pedro I tuvo bien marcáu por dellos fechos acontecíos n’Europa, principalmente la fame xeneralizao causada por un cambiu climatolóxicu conocíu anguañu como Pequeña Edá de Xelu y una mortal epidemia conocía como Peste Prieto. A ello hemos de sumá-y tamien la bayura d’engardieyes del rei castellán escontra Aragón, Francia y Granada, asina como una llonga Guerra Civil castellana escontra’l so hermanastru Enrique, na que participó el mismísimu Eduardu, príncipe de Gales y conocíu col nomatu de Príncipe Prietu, pola color de la so armadura. Estos desastres train l’estancamientu del mercadéu y el refuerzu del valor de la plata frente al oru (la moneda de plata, sobremanera la de vellón, yera la más emplegada pa les transacciones mercantiles cotidianes: nun hai mercáu, nun hai movimiento de perres). Pero per otru llau, les deudes del rei pa cola tropa, los mercenarios y los suministraores d’alimentos y otres fechures pal exércitu, faen necesario batir moneda d’unes carauterístiques especifiques y de calidá. Poro, y asemeyando a otros países europeos, Pedru I dexa de llau les monedes de vellón y ordena facer una moneda de plata fina y gruesa, esto ye, de gran valor.
Díxose ya que nun se sabe la fecha esauta de la nacencia del real, pero dellos estudios maquen el añu 1363 como factible, ya que por estes feches el reinu gozaba de cierta estabilidá, no referente a les guerres y la posición dominante de Pedru I frente a los sos enemigos (dafechu, asina consta nes lleendes grabaes na moneda). Y pa demostrar esta superioridá, nun tuvo otra que mandar facer una moneda propia a semeyanza de les que circulaben per Europa y que –y diere ciertu prestixu al so reinu. Otra vegada, mos atopamos cola falta información respeutu a les pautes metrolóxiques de la so fechura, dafechu, hai que dir a unes ordenances de 1373 promulgaes pol so sucesor, Enrique II, pa saber que’l real yera una pieza de plata con una talla de 65 pieces por marcu y una llei d’once dineros y seis granos, o lo que ye lo mesmo, una moneda d’unos 3,54 gramos de pesu y una aleación de plata 937,5 milésimes. El so diámetru rondaba los 27 o 28 milímetros y al cambiu, tenía un valor de 3 maravedinos.
 |
| 1 real de Pedru I |
No referente a la fechura del diseñu, detaca, primeramente nel anversu, l’ausencia de la efixe real, xuplía por una P coronada, como monograma del monarca. Alredor y asemeyando al gros tournois francés, apaez una doble orla cola lleenda DOMINVS MICHI ADIVTOR ET EGO DISPICICIAM INIMICOS MEOS (El Señor asísteme y yo disputaré colos mios enemigos). Nel reversu apaecen los emblemes de los reinos de Castiella y Llión cola marca de la ceca y dellos símbolos que puen ser aniellos, puntos grandes o estrelles, llindiao too ello por una grafila puntos y finando cola lleenda PETRVS REX CASTELLE ET LEGIONIS.
Viendo’l reversu y tomando como referencia los cuatro puntos cardinales, apréciase la marca la ceca al sur, mientres que nos otros tres repítese’l mesmu símbolu:
 |
|
Detalle d’aniellu y estrella |
No referente a la ceca, sábese que Pedru I acuñó moneda propia en Sevilla (marca S), Burgos (B) y A Coruña (concha o vieira):
 |
| Ceques de Pedru I |
El submúltiplu de la nueva moneda sedría’l mediu real, cola mesma llei en plata, un pesu d’unos 1,7 gramos y un módulu de 20 milímetros.
 |
| Mediu real |
N’esti casu l’anversu llevaría una sola orla cola lleenda DOMINVS MICHI ADIVTOR calteniendo’l monograma real coronáu. Nel reversu apaez l’escudu Castiella cola marca de la ceca y la lleenda PETRVS REX CASTELLE. Delles vegaes, al final de dambes dos lleendes, apaez ET, como indicativu de que’l llema continúa.
Durante los dos caberos años del so reináu, la suerte del rei Pedru camudó a peor, fechu que tamién se notó nes sos posteriores acuñaciones, catalogaes como meres acuñaciones de necesidá. Apaecerá un nuevu real, de mayor pesu, 4,70 gramos y cambiu afitáu a cuatro maravedinos, pero que venía cola trampa de tar fechu con una pasta de peor calidá, con menos plata y más cobre, polo que tendría una llei d’859,38 milésimes. La so tipoloxía ye tradicional castellana, asemeyando a la vieya moneda d’Alfonsu X. Equí debemos dexar claro qu’esti tipu d’acuñación enfrenta a los estudiosos del ramu, dellos aseveren qu’estes acuñaciones son anteriores al real de la P coronada (Mozo Monroy), precisamente pola so semeyanza a les del rei sabiu, ya inclusu paecería llóxicu si tomáremos el reináu de Pedro I como puntu d’inflexón: nos primeros años del so reináu emplegaría los tipos tradicionales castellanos, pa lluéu creyar el propiu de so y que sedría repetíu polos sos sucesores. Polo que a min se refier, teo nidio qu’hai dos tipos dixebraos de reales; lo que se refier al so orde d’acuñación, déxolo pa los expertos (yo sigo l’orde según el trabayu d’Oliva Manso).
 |
| Real tipu castellán de Pedru I |
Del diseñu desapaez la xusticiera lleenda de doble orla y el monograma coronáu; xúplese too ello colos escudos de Castiella y Llión, llindiaos pola única lleenda PETRVS REX CASTELLE ET LEGIONIS. Les ceques, van ser, n’esti casu, la de Toledo (marca T) y la de Sevilla, ciudá onde s’abellugó el rei hasta la so partida haza’l castiellu de Montiel, onde morriere asesináu pol so mediu hermanu y rival Enrique.
D’esta moneda apaecerán dos submúltiplos, la de mediu real y un cuartu de real, con valores de dos y un maravedinos respeutivamente y de la mesma probitú no referente a la llei.
 |
| Mediu real |
Les falsificaciones d’época d’esta segunda serie foron abondes, dafechu, les más vinieren del reinu rival d’Aragón, onde los monederos del rei Pedru IV nun aparaben d’acuñar moneda castellana pa pagar los salarios de los mercenarios francos, y too ello sofitao po’l rei de Portugal, Fernandu I, como candidatu al tronu de Castiella.
Les caberes acuñaciones d’estes pieces finaron siendo de vellón, pola so probitú de plata na aleación.
 |
| Un cuartu de real |
El real baxo’l reináu de los Trastámara (1369-1474)
Enrique de Trastámara entra dende Francia con un exércitu mercenariu y autoproclámase rei de Castiella en 1366, na ciudá de Calahorra. Pa pagar a les sos tropes acuña un nuevu tipu de real, denomináu de vellón, precisamente pola poca cantidá de plata emplegada na so fechura. Ensin embargu, copia el diseñu de los reales bonos del so hermanu:
 |
| Real de vellón del candidatu Enrique |
La moneda d’Enrique caltién el mesmu tipu cola lleenda DOMINVS MICHI ADIVTOR ET EGO DISPICICIAM INIMICOS MEOS, camudando’l monograma real del anversu, EN coronáu y la lleenda del reversu, que pasa a ser ENRICVS DEI GRATIA REX CASTELLE ET LEGIONIS.
Lo mesmo pal mediu real, anversu DOMINVS MICHI AIVTOR alrededor del monograma EN coronáu y reversu: ENRICVS REX CASTELLE col escudu Castiella y la marca de ceca.
 |
| Mediu real |
Tres da-y muerte al so hermanu Pedru, xube al tronu col nome d’Enrique II (1369-1379) y entamando asina una nueva estirpe real, la de los Trastámara, que llegaría hasta los Reis Católicos. Tres una guerra civil, y la consiguiente postguerra, los problemas económicos son bayurosos y la falta moneda fain que’l nuevu rei tenga d’ampliar el númberu de ceques, recurriendo inclusu a les sées episcopales (detacando la de Santiago Compostela). A ésto hemos d’añadir l’enfrentamientu escontra Portugal (alcordémonos que Fernandu I reclamaba pa so el tronu castellán, y nun sedría l’únicu, como se verá). Acuña entós un nuevu tipu de real, que seguía siendo de vellón (dafechu, en 1369 instruíase que’l real debía tener una talla de 70 pieces por marcu y una cuarta parte de plata, esto ye, unos 3,28 gramos de pesu con 0,83 gramos de plata, unes 250 milésimes). N’esti casu recupérase’l bustu real nes acuñaciones, acompañáu por una lleenda asemeyada nel anversu y reversu na que proclama ENRICVS DEI GRATIA REX CASTELLE ET LEGIONIS con delles versiones. Nel anversu, el bustu real va llindiáu poles lletres EN, coronaes. Nel reversu apaez l’escudu de Castiella y Llión cola marca de ceca.
 |
| Real de vellón de bustu d'Enrique I |
A partir de les Ordenances de 1373, Enrique II ordena recuperar les pautes metrolóxiques del bon real de Pedru I, recuperando mesmamente el diseñu primixenu.
 |
| Un real d'Enrique II |
 |
| Mediu real |
Acuñó tamién Enrique una moneda de ¼ de real, de 0.8 gramos de pesu y módulu de 19 mm. Nel anversu apaez el monograma EN coronáu, y nel reversu, el castiellu cola marca de ceca. Dambes cares comparten la mesma lleenda: ENRICVS DEI GRATIA.
Fernandu I de Portugal reclamó’l so drechu al tronu castellán, ocupando delles poblaciones importantes de los reinos de Galicia y Llión y acuñando moneda propia nes ceques de dichos reinos. Na de Zamora, acuñaría reales asemeyaos a los d’Enrique pero con métrica portuguesa. Tres la Paz d’Alcutim en 1371, retornaría tolos territorios ocupaos a Castiella.
 |
| Real de Fernandu I de Portugal |
El real portugués lleva’l monograma real coronáu nel anversu y la conocía lleenda DOMINVS MICHI ADIVTOR ET EGO DISPICIAM INIMICOS MEOS. Nel reversu apaecen les cinco quines propies del escudu de Portugal cola lleenda F REX PORTUGALE ZAMOREE.
Xuan I (1379-1390) Xube al tronu tres la muerte de so pá Enrique II. Caltién tamién los tipos, camudando solo’l monograma coronáu del intre IOHN y la lleenda nel reversu IOHANIS REX CASTELL nel real.
 |
| Un real de Xuan I |
Pal so mediu real la tipoloxia sigue siendo la mesma, camudando nel anversu el monograma real, IOHN coronáu:
 |
| Mediu real |
Xuan I tamién acuñó una moneda de 1/6 de real con un pesu de 0.60 gramos y un módulu de 15 mm. Nel anversu, IOHANES REX E LEG con IUA coronáu; y nel reversu, IOHANIS REX CAS col castiellu y la marca de ceca:
 |
| un sestu de real |
Los tronos, el poder, son bien llambiones. Viose ya l’enguedeyu ente Enrique y Fernandu pol tronu Castiella. Agora tórnase la historia y ye Beatriz, esposa de Xuan I, la que reclama’l tronu portugués. Castiella invade Portugal ocupando delles places y llegando hasta Santarem en 1384, onde s’acuñó esti real con métrica portuguesa:
 |
| Real portugués de Beatriz |
El real de Beatriz lleva’l bustu la reina mirando a manzorga cola marca de la ceca SA (Santarem) y la consabía lleenda del DOMINUS MICHI... El reversu ye una cruz con cuarteles alternos colos escudos de Castiella-Llión y Portugal llíndiaos cola lleenda BEATRICIS DEI GRACIA REGINA CASTELLE E DE PORTUG.
Y donde les dan, les tomen. Les feríes de la guerra escontra Pedro I nun taben zarriaes del too. Una fiya d’ésti, Constanza de Castiella, casare con Xuan de Gante, duque de York, el cual reclama’l tronu castellán. En 1386, dende Oporto, ocupa delles places de Galicia y esparde los sos reales pel territoriu ocupáu. Éstos fueren fechos, tres años enantes, en Francia siguiendo los patrones castellanos:
 |
| Un real de Xuan de Gante |
La moneda del inglés lleva, nel centru del anversu, el monograma IL coronáu y la lleenda DEUS IUDITIAM TUUM REGINA ET IUSTITIAM (Dios reina’l to xuiciu y la to xusticia). Nel reversu, escudu de los reinos de Castiella y Llión cola lleenda IUSTITIAM TUAM FILIE REGIS (Tú gobiernes la xusticia de la to fiya).
L’enfrentamientu ente los Xuanes finose con un casoriu ente’l fiu de castellán, Enrique y la fiya del inglés, Catalina y cola creación d’un nuevu títulu que debería llevar l’herederu de la corona de Castiella y evitar asina nueves griesques pol tronu: Príncipe d’Asturies. Poro, Enrique y Catalina foron los primeros príncipes d’Asturies.
El primer príncipe xube tronu, Enrique III (1390-1406) caltién el tipu. Anversu DOMINVS MICHI ADIVTOR ET EGO DISPOSCIAN INIMICOS MEOS con monograma EN (con lletra gótica) coronáu, y reversu ENRICVS DEI GRATIA REX CASTELLE con cuarteláu de castiellos y lliones y con marca de ceca.
 |
| Un real d'Enrique III |
Y los sos medios reales, ensin comentarios:
 |
| Mediu real |
Xuan II (1406-1454) el siguente na sucesión, dexó tamién los sos reales col mesmu tipu conocíu de les iniciales coronaes, n’esti casu IONH. Ensin embargu tamién acuñó un segundu tipu de bustu, onde apaez mirando a manzorga nel anversu y llidiáu pola lleenda IOHANIS SECUNDUS REX CASTELLEEL y un revesu colos cuarteles de Llión y Castiella cola lleenda IOHANIS DEI GRACIA REX CASTELLE:
 |
| Un real de Xuan II |
Tamién llegó a acuñar medios reales y pieces d’un sestu de real.
Enrique IV (1454-1474). Los primeros reales d’Enrique conserven el tipu del bustu llindiáu cola lleenda ENRICUS CUARTUS DEI GRACIA nel anversu y un reversu colos cuarteles castellano llioneses y la lleenda ENRICUS DEI GRACIA REX CA (esisten delles variantes de les lleendes, según la ceca, pero toes anden pelo mesmo, rei de Castiella pola gracia Dios).
 |
| Un real d'enrique IV |
Acuña tamién medios reales del monograma y cuartos de real, tanto del monograma como los d’anversu con llión y reversu con castiellu.
En 1465 un bon grupu de nobles proclamen rei a Alfonsu, hermanu d’Enrique, el cual tamién emitirá los sos reales col so monograma, una A coronada y la lleenda DOMINUS MICHI ACIUTOR ET NO nel anversu y reversu colos cuarteles de Llión y Castiella cola lleenda ALFONSUS DEI GRACIA REX CA
 |
| Un real del pretendiente Alfonsu |
En 1468 muerre Alfosu y en 1471 Enrique IV, a traviés del Ordenamientu de Segovia del 10 d’abril de 1471, manda acuñar reales de talla de 67 pieces por marcu y llei d’11 dineros y 4 granos, con un valor de 31 maravedinos. Recupera la tipoloxia del monograma, pero camuda les lleendes. Nel anversu y nuna sola orla, apaez la lleenda XPS VINCIT XPS REGNAT XPS IMPERAT (Xesús vence, Xesús reina, Xesús impera) alredor del monograma HEN coronáu, y el reversu, con escudu d’ames de Castiella y Llión, marca de ceca y lleenda ENRICVS DEI GRATIA REX.
 |
| Un real d'Enrique IV |
Acuña tamién monedes, col mesmu tipu y lleendes, de mediu real y un cuartu real.
 |
| Mediu real |
En 1474 muerre'l rei y entama una guerra de sucesión ente la so hermana Isabel (futura reina Católica) y la so fiya Xuana “la beltranexa”, casada col rei de Portugal Alfonsu V. Los portugueses invaden el reinu de Llión y acuñen los sos propios reales na ciudá de Toro. L’anversu lleva l’escudu d’armes de Portugal y el reversu lleva los de Castiella y Llión. Nos dos llaos la lleenda fai referencia al so títulu real na zona, ALFONO QUINTIS REX CASTELLE ELEONIS.
 |
| Un real d'Alfonsu V de Portugal |
Finalmente Isabel, casada ya con Fernandu d’Aragón, gana la guerra y entama un nuevu período gloriosu pal real.
Reis Católicos. Los caberos Trastámara (1474-1502)
Enrique IV dexa un desastrosu enguedeyu monetariu en Castiella: constantes devaluaciones, acuñaciones con una llei probetaya, bayura de monedes falses… y sobremanera, l’enfadu xeneralizáu de la población. Cola xuba de los Reis Católicos al tronu entamará un procesu renovador que, bien lluéu, fadrá que la divisa castellana seya de les más fuertes d’Europa y, col pasu los sieglos, del mundu.
Lo primero que fain los reis, ye fixar unos precios y cambios acordies a la realidá del momentu, pasando’l real a valir 31 maravedinos (Carta de Precios del 20 febreru de 1475, Segovia). En mayu, dende Córdoba, espublicen una Carta de llabrar moneda, onde manden facer reales de 67 pieces por marcu (unos 3,43 gr de pesu la pieza) y con una llei d’once dineros y cuatro granos (930,56 milésimes) calteniendo les ceques de Burgos, Coruña, Cuenca, Sevilla, Segovia y Toledo ya incorporando la de Granada en 1492. Los valores a acuñar diben a ser d’a real, mediu real y cuartu de real. En 1476, el valor del real volvía a axustase a 30 maravedinos y aprobávase, como pesu ponderal pa la plata, el marcu de Burgos, de pesu d’ocho onces (unos 230 gramos) y un amestáu de la lliga de llei d’once dineros y cuatro granos. A partir de 1477 toma les riendes del control monetariu del reinu Gonzalo de Baeza, entamando a poner n’orde tou esti enguedeyu. En xineru de 1480 el real valía de nuevu 31 maravedinos.
La primer serie de reales católicos foron acuñaos ente 1475 y 1497. El real diba tener un pesu de 3.43 gr y unos 28 mm de diámetru. Nel anversu diba acuñáu l’escudu de los reinos de Castiella y Llión arropiaos pol aigla de San Xuan y llindiáu pola lleenda FERNANDUS ET ELISABET (que debería dir xunto a los títulos consabíos de DEVS GRATIA REX ET REGINA y los reinos a gobernar, pero como que ye perllargo). Nel reversu vendría l’escudu del reinu d’Aragón y Dos Sicilies coronáu y colo que cupiere de la lleenda DOMINVS MICHI ADIVTOR ET NON TIMEBO QUOD FACIAT MIHI HOMO (“El Señor m’ayuda y nun voi tener miéu de lo que me faga l’home”, que ye bien llarga tamién, polo que lo más normal yera grabar les tres o cuatro primeres pallabres).
 |
| Un real Reis Católicos |
Acuñaron tamien moneda de mediu real, con un pesu de 1.71 gramos y 18 mm de diámetru. Nel anversu, el monograma real F Y coronáu y lo que cupiere de la lleenda QVOS DEVS CONIVNXIT HOMO NON SEPARET (lo que Dios xune, que nun lo separe l’home). Nel reversu, los escudos de Castiella y Llión y la lleenda FERNANDVS ET (H)ELISABE.
 |
| Mediu real |
Y cuartos de real de 0,85 gr y 15 mm de diámeru. Nel anversu la F coronada y nel reversu la Y coronada, compartiendo ente les dos cares la consabía lleenda QVOS DEVS CONIVNXIT HOMO NON SEPARET.
 |
| Cuartu de real |
Tres la Pragmática de Medina del Campo en 1497, los Reis Católicos afronten una fondera reforma monetaria pa poner n’orde tou l’enguedeyu del reinu que va afeutar al oru, la plata y el vellón. La moneda de plata del reinu sedrá’l real; esti tendrá una llei d’once dineros y cuatro granos (930,56 milésimes), tanto pa elli, como pa los sos submúltiplos, el mediu real, el cuartu de real y el octavu de real. Les pieces a batir sedríen de 67 pieces por marcu pal real, 134 pal mediu real, 268 pal cuartu y 538 pieces d’octavu de real que, p’enriba, diba ser cuadráu. El real valdría 34 maravedinos y el mediu, 17. A partir d’equí, nes Cuentes Reales vendrá identificáu como “real nuevu” pa diferencialu del anterior, qu’inda va seguir emplegándose.
No que se refier al diseñu de los tipos del real, los reis manden acuñar el so escudu d’armes coronáu y cola lleenda FERNANDVS ET HELISABET D(EUS GRATIA) nel anvesu y, pal reversu, dexen les sos representaciones identificatives del xugu y les fleches cola lleenda REX ET REGINA CAST(ELLAE) LEGIO(NIS) ARAGO(NUM); tamién deberíen apaecer lletres identificatives pa Sicilia y Granada, pero delles vegaes nun entraben. Equí apaecen tamién les marques de la ceca y el ensayador.
 |
| Un real de la Pragmática de 1497 |
Nel mediu real y el cuartu real vendríen grabaos los símbolos identitarios de los reis, el xugu y les fleches, coles lleendes propies de los nomes y los títulos reales:
 |
| Mediu real |
L’octavu de real acúñase cuadráu pa evitar confundilu con unes monedes de vellón nomaes blanca y con un pesu d’unos 0,44 gramos. Nuna de les cares apaez la F coronada del rei y la lleenda FERNANDUS D.G.RE (DEUS GRATIA REX). La marca de ceca ye una G, de Granada. Na otra cara apaez el monograma de la reina, Y coronada, cola lleenda HELISABET D.G.REG (DEUS GRATIA REGINA). Esta semeya ta sacada del blog d’Adolofo Ruiz Calleja, blognumismatico.com, y sacada a la so vez, d’una subasta d’Áureo & Calicó en 2018. Detaco esto porque hasta la fecha enxamás se viere ún d’estos exemplares sinon en debuxu, poro, esti ye, de momentu, l’únicu exemplar conocíu.
 |
| Octavu de real |
Los reales en tiempos de los Austria (1502-1700)
Tres el fallecimientu de los Reis Católicos y tando la heredera de Castiella Xuana I separtá del gobiernu por, supuestamente, lloca, garra’l testigu de gobernar estes tierres Carlos I, fíu de la reclusa y Felipe I, y ñetu de los Católicos. Durante’l so reináu, los reales siguieron acuñándose a nome de los sos güelos, ya ensin cambios nos tipos; al paecer, yera tal el prestixu n’Europa de la moneda castellana que meyor nun tocala y caltener el diseñu primixenu. Y tal debió ser que nun se tocaron hasta que’n 1566 Felipe II aprobó la Pragmática de la Nueva Estampa, esto ye, un cambiu nos diseños de los tipos.
Xuana I y Carlos I como reis de Castiella
Xuana I llegó a gobernar en Castiella tres la muerte de so má Isabel en 1502, xunto col so maríu Felipe I. So pá, Fernandu, acombayó co’l so xenru pa dexar de llau a la reina llegal y gobernar ellos dos, poniendo como xustificación que Xuana taba lloca. Pero eso de meter dos gallos nel mesmu corral… como que nun cuayó l’apañu pá/xenru y Fernandu finó colando p’Aragón y nun tornando a Castiella hasta la muerte de Felipe, bien ceo por ciertu, pel 1506. Agora Fernandu controlará la Castiella de la fiya lloca hasta la so muerte en 1516. El tronu herédalu Carlos, ensin destronar a so má, pero calteniéndola na so reclusión de Tordesilles y separtá de la Corte.
En tiempos del rei/emperador hebo dos fechos que marcaron l’entamu de la internacionalización del real. Europa dexa atrás l’escurantismu de la Edá Media prosperando y medrando gracies, sobremanera, a la bayura de gremios de comerciantes que percuerren tolos mercaos y ciudaes del vieyu continente axilizando l’intercambiu de mercancies, tanto llocales como exótiques veníes de países llonxanos y arrequexando definitivamente el tradicional sistema del troquéu, al facilitar l’accesu del dineru al pueblu llanu. Esto, ente otres coses, fai que l’oru se deprecie frente a la plata, ya que la necesidá de moneda menudo pal mercadéu diariu obligaba a acuñar gran cantidá de pieces en plata y vellón. Ello, a la so vez, obligó a llabrar un nuevu tipu de moneda, de mayor tamañu y valor superior. Castiella llánzase a acuñar agora monedes con valor de 2 y 4 reales colos tipos ya conocíos de los Reis Católicos (anversu col escudu real y el nome de los reis, y reversu con xugu y fleches y los sos títulos reales). La moneda de 2 reales pesará 6,7 gr y tendrá un diámetru de 27 mm y la de 4reales, 13,5 gr y 35 mm. Ensin embargu, sedría’l real d’a ocho (u 8 reales) la moneda que fadría pasar a la hestoria al real y que lu fadría ser, de xuru, la primer divisa internacional aceutada en to’l mundu. Carlos I, finca les bases pa la llabra d’una moneda de plata poderosa. Viendo que per Europa ya circulaben pieces d’un pesu aprosimao a los 30 gr, dexa ordenao que’n Castiella se llabre una nueva moneda actualizada a Europa, pero basándose na Pragmática de medina del Campo, oseya, la de los Reis Católicos. Asina nació la idega del real d’a ocho como nueva divisa de Castiella y que tendría un pesu teóricu de 27,45 gr y 40 mm de diámetru. Curiosamente, esta moneda nun llegó a acuñase en tiempos del emperador nin nos primeros años del reináu del so fíu Felipe II; habría d’esperar a la Pragmática de la Nueva Estampa de 1566 pa vela físicamente.
El segundu fechu revolucionariu del rei Carlos I aconteció nes Indies. En tiempos de los Reis Católicos, la moneda que circulaba poles nueves provincies americanes taba fecha en Sevilla, pero con plata americano y mandao de torna p’allá. Carlos I vio que’l coste de tala operación yera bien costosu y arriesgáu, polo que decidió, en 1535, abrir la primer Casa de la Moneda castellana en Méxicu, pero solo pa la plata y el vellón. En reales, acuñaríen valores d’1, 2 y 4. Lo detacao ye que nes monedes americanes apaecen Xuana y Carlos como reis d’Hispania y les Indies: Anversu, escudu de Castiella y Llión coronáu y lleenda CAROLVS ET IOHANA REGES, con marca d’ensayador y ceca. Reversu con columnes d’Hércules cornaes y sobre foles, lleenda PLVS ULTRA y valor facial; alredor, la lleenda HISPANIARVM ET INDIARVM
 |
| Cuatro reales mexicanos |
En 1566 Felipe II sacaría una nueva Pragmática conocía como “de la Nueva Estampa”. Ello ye, cenciellamente que, no referente al real, fai desapaecer los tipos de los Reis Católicos y diseña’l propiu. De man, apaez un escudu d’armes adautáu a los sos títulos: a los escudos de los Católicos, súma-yos los emblemes d’Austria, Borgoña, Artois, Brabante, Flandes y Tirol, ensin escaecer, más tarde, el del Reinu de Portugal, tres facese cola so corona en 1581. Nel reversu, graba les armes de los reinos de Castiella y Llión. La lleenda, repartía ente dambes cares, vendrá a ser dalgo asina como PHILIPPVS II D(EI) G(RATIA) HISPANIARUM ET INDIARVM REX xunto cola fecha acuñación, la marca de ceca y el valor nominal de la moneda. Con elli apaecen físicamente los primeros reales d’a ocho.
 |
| Real d'a ocho de Felipe II |
Tamién se siguen acuñando reales n’América ya introduzlos nel Reinu d’Aragón, acuñando en Zaragoza y Mallorca, so’l títulu de rei d’Aragón y colos escudos identitarios propios del llugar.
Felipe III, Felipe IV y Carlos II completen la familia de los Habsburgu hispánicos. Ente Pragmátiques, Célules, resellos y devaluaciones de la moneda, siguen acuñando reales de too tipu, de bustu, de monograma y d’escudu familiar, calteniendo la so acuñación en Castiella, Aragón y América. Col tercer Felipe apaez la moneda de 50 reales, acuñada tamién por Felipe IV, con un diámetru de 76 milímetros y un pesu de 175 gramos, un monstruu.
 |
| 50 reales de Felipe III |
Un par de curiosos reales de Carlos II. El primeru, dos reales, ye’l típicu de monograma coronáu, pero bien llográu.
 |
| Dos reales de Carlos II |
El segundu
ye un real conocíu col nomatu de tipu “María”, precisamente porque’l monograma
grabáu fai referencia a la Virxe y la corona ye xuplía por una cruz, llindiao too
pola lleenda (MA)I(R)
VIRTVTE PROTECTIONE
 | ||
| Un real "María" |
Guerra de Sucesión (1700-1714)
Tres la muerte de Carlos II (1700) ya ensin descendientes, la rama austríaca de los Habsburgo reclama’l tronu hispánicu. Pero hai un problema, y ye que nel testamentu real apaez Felipe d’Anjou, de la perfrancesa familia Borbón, como herederu llegal. Entamose una griesca per toa Europa y que na Península dixebró los vieyos reinos en dos bandos. Per un llau, Felipe taba arropiáu pol poderosu reinu de Castiella más Navarra y pel otru, el candidatu austríacu, l’archiduque Carlos, taba respaldáu polos territorios aragoneses, sobremanera por Cataluña. A la fin gana la contienda’l futuru Felipe V de Borbón, pero mietres duró ésta, l’autoproclamáu Carlos III controló gran parte del territoriu y tuvo tiempu d’acuñar los sos reales en Barcelona. Nel anversu imprimiría l’escudu familiar de los Austria y nel reversu pondría’l so monograma coronáu. Les lleendes apaecíes nes dos cares, les típiques, CAROLVS III D(EUS) G(RATIA) HISPANIARVM· REX. Realmente acuñose solo’l valor de 2 reales, con un pesu de 6,7 gramos y 25 mm de diámetru.
 |
| Dos reales del archiduque Carlos |
Durante la contienda, Felipe tamién acuñó los sos reales, onde apaecen, nel anversu, les armes de Castiella y Llión y l’escusón de la Casa Borbón, tres flores de lis; la lleenda, típica PHILIP• V• D• G• HISPANIAR• REX. Nel reversu apaez un “barrocu” monograma cola lleenda DEXTERA• D• EXALTAVIT• ME
 |
| Un real de Felipe d'Anjou (1707) |
D’esti periodu tamién son los reales tipu bustu “pelucón”, acuñáu pa los valores altos. L’escudu diba volver a ser l’identificativu de la monarqía castellano-llionesa col escusón central de la Casa de Borbón. Nel anversu, la lleenda PHILIP V D G HISP ET IND REX y nel reversu DEXTERA D EXALTAVIT ME.
 |
| Cuatro reales del pelucón |
El real colos Borbón (1714-1864)
Nueva Casa Real, nueva forma de gobernar (mui a la francesa) y el poder queda centralizáu en Castiella. Tolos reinos rebeldes pierden los sos fueros y Felipe V cumple una realidá pola que veníen naguando los Austria dende los tiempos del emperador Carlos, que tolos pueblos hispánicos se rixan poles mesmes lleis, les de Castiella. No referente a los reales, Felipe V siguió acuñándolos, tanto n’España como nes Indies. Los primeros tipos peninsulares recordaben a los acuñaos polos Austria, anversu con escudu heredáu de l’anterior Casa Real y reversu col escudu castellán-llionés, too ello cola consabía lleenda.
 |
| Un real de Felipe V |
Por razones de salú (mental) Felipe V abdica nel so fíu Lluís I, que tan solo duró unos meses nel tronu al morrer de viruela. Aún asina, pudo dexar la so güelga numismática acuñando reales tanto na Península como n’América. Al so pesar, Felipe V tuvo de volver a garrar el tronu.
 |
| Dos reales de Lluís I |
Un fechu perimportante acontecíu durante’l segundu reináu de Felipe V, foi’l nacimientu del real d’a ocho más carismáticu de la historia imperial hispánica y conocíu col nomatu de Columnariu. En realidá yera una serie de monedes de plata con valores d’1, 2, 4 y 8 reales acuñaos nes ceques americanes pal so emplegu cotidianu. Yera de tan bona calidá, que la pieza d’ocho reales bien ceo se convirtió na primer divisa internacional aceutada en tol mundu. Al ser inclusu de meyor calidá que l’acuñada na Península, empezó a conocese equí como real d’a ocho de pesu duru, pa diferencialu del castellán (precisamente d’esta espresión nacieron los términos pesu, que se popularizó n’América y duru, que fexo lo mesmo n’España). El primer columnariu acuñose nel 1732 con unos tipos bien orixinales conocíos col nome de “de mundos y mares”. Siguió la so acuñación durante los reinaos de Fernandu VI y Carlos III, el que, en 1772, desaniciaríalu xupliéndolu por un tipu de bustu, que perduraría hasta la independencia de les provincies americanes. L’anversu del columnariu lleva l’escudu real xunto col nome y títulu del rei de turnu, siendo’l reversu la parte orixinal d’onde salen tolos sos nomes, 2 hemisferios (mundos) onde puen vese América y Europa, sobre un mar (y mares) revoltosu, llindiao por dos columnes (columnariu) coronaes y cola estola escrita PLUS VLTRA (más allá); fina cola lleenda VTRAQUE VNUM (dambos dos son ún).
 |
| Columnariu de Fernandu VI |
Como curiosidá, camentar qu’esta moneda foi aceutada pa circular pelos recién creaos Estaos Xuníos de Norteamérica, onde se la conocía colos nomes de Pillar Dollar o Spanish Dollar. Dizse que’l símbolu del dólar USA nació de la esquematización de les columnes y la estola.
 |
| Un real de Carlos III |
 |
| Ocho reales de Carlos IV |
El paréntesis de los Bonaparte (1808-1814)
Tres la ocupación de la Península por parte de Napoleón Bonaparte, ésti dexa a cargu del tronu español al so hermanu Xosé, que pasa a ser rei Xosé I y que tamién dexó los sos reales acuñaos. Nel escudu del reversu, l’escusón central lleva l’aigla imperial de los Bonaparte.
 |
| Cuatro reales Xosé I |
Con Xosé I acuñose’l real n’oru por primer vez, con valores d’80 y 320 reales. Detaca equí lo curioso del escudu real del reversu, onde apaecen, xunto a los dominantes cuarteles de Castiella, Llión y Granada, los d’Aragón, Navarra y Les Indies,representaes por dos mundos ente dos columnes, heriede de los vieyos columnarios. L’escusón central, obvio, de los Bonaparte. La lleenda alreor, IN UTROQ FELIX AUSPICE DEO (Bendígalos Dios n’ambos).
 |
| 320 reales n'oru |
Y tornando de nuevu a los Borbones
Fernandu VII, El deseáu, más bien, caberamente, l’odiáu, el rei felón, el mastuerzu de Concostrina, recupera’l tronu pa la Casa Borbón y recupera’l tradicional estilu pa los sos reales.
 |
| Un real de Fernandu VII |
Durante’l reináu d’Isabel II acuñaríense los caberos reales. A partir de 1848 los maravednos desapaecíen como moneda menudo pa ser xuplíos por décimes de real (céntimos, pa entendemos) siendo la unidá de cuenta, pa tol sistema, el real. Tres delles reformes monetaries, en 1865 la moneda oficial del reinu pasaría a ser l’escudu, poro, el caberu real acuñáu sedría de 1864.
 |
| Un real d'Isabel II (1863) |
El real (1363-1864) unos 500 años de vida; nacíu ente les guerres fraticides de Pedru I y Enrique II, ponderáu y revalorizáu polos Reis Católicos, alzáu al cumal por Carlos I y Felipe II, “conquistador” de les Indies colos Austria, divisa internacional colos Borbón, “madre” del dólar USA y rellumante final coles sos acuñaciones n’oru. Morrió a manes del escudu, pocos años enantes de qu’esti morriere a manes de la peseta (1869). Ensin dubia, la muestra clara del poder de Castiella y la so llenta pero imparable tresformación no que güei nomamos España.
 |
| Cien reales d'Isabel II (1863) |
Cola llegada de la peseta, el Gobiernu Provisional fexo’l cambiu definitivu d'una peseta igual a 4 reales, poro, la xente’l pueblu siguió emplegando’l términu; asina, la moneda de 50 céntimos yera conocía como la de los dos reales… hasta que desapaecieron los céntimos de peseta durante’l reináu de Xuan Carlos I.
Fontes:
El Real de plata de Pedro I de Castilla. Entre el prestigio y la necesidad (C. 1363-1369). Oliva Manso, Gonzalo. Universidad Nacional de Educación a Distancia. https://orcid.org/0000-0003-4664-9000. 52/2, julio-diciembre de 2022, pp. 773-797. ISSN 0066-5061 https://doi.org/10.3989/aem.2022.52.2.12
Los reales de Pedro I. Ruiz Calleja; blognumismatico.com
Las cuñaciones de Pedro I. Mozo Monroy, Manuel. Web we are numismatics
Monedas de Enrique II fabricadas entre 1369 y 1373. Una posible emisión compostelana. Raquel Casal, Goretti González Vila, Antonio Roma Valdés. GACETA NUMISMATICA 174/175. Septiembre/Diciembre 2009.
Real de Enrique IV, busto con barba. Ruiz Calleja; blognumismatico.com
La evolución de los cambios monetarios en el reinado de Isabel la Católica según las cuentas del tesorero Gonzalo de Baeza (1477-1504) de Francisco Olmos, José María. Universidad Complutense de Madrid.
La reforma monetaria de los Reyes Católicos: Su importancia histórica. Dra. Dª. María Ruiz Trapero, Catedrática Emérita de “Epigrafía y Numismática”. Universidad Complutense de Madrid
Medina del Campo 1497: Análisis de la reforma monetaria de los Reyes Católicos. Casillas Rollón, Antonio. Estudiante de 5º de Licenciatura de Historia (UCM). 2012
Antecedentes de la reforma monetaria de Felipe II de 1566 a través del proyecto de Francisco de Almaguer y Diego de Carrera. Royo Martínez, María del Mar (UCM)
Balanzas de cambista (peso e intercambio). Blog de la Federación Española de Sociedades Filatélicas (FESOFI)
Web Maravedis.net (Llistáu y semeyes de reales a lo llargo la historia hispánica). López de la Fuente, Juan Luís.
Web Casa Escudero “Almacén de la Mancha”. Llistáu de monedes a lo llargo la historia d’España. Caballero García, David.
Web Momeca. Moneda medieval.
Web Numista. Monedes de to’l mundu dende’l sieglu XV hasta anguañu.
Web l’Ayalga del Cuélebre. Numberariu d’Isabel II. Velasco García, Sergio Daniel.
No hay comentarios:
Publicar un comentario