En 1495 los Reis Católicos casen a la so fiya Xuana con Felipe de Flandes. Enantes, la hermana de Felipe, Margarita, casárese con Xuan, fiu de los Católicos y herederu de los reinos de Castiella, Llión y Aragón. Por aquelles feches, Xuana yera la tercera na llínea de sucesión al tronu de Castiella. Ensin embargu, una filera de llamentables decesos, la muerte del Príncipe d’Asturies en 1497 ensin sucesores, la de la so hermana Isabel en 1498 y la del so sobrín Miguel de la Paz (fíu d’Isabel y Manuel I de Portugal, y herederu de los tronos de Castiella, Aragón y Portugal) en 1500, fixeron que Xuana pasare a ser Princesa d’Asturies y heredera del reinu de Castiella.
Y entama l’enguedeyu sucesoriu. Enantes de morrer, y viendo la situación, Isabel I dexa escrito, bien nidio, que la reina sucesora de Castiella yera Xuana, otorgando al so maríu Felipe la condición de rei consorte y dexaba la de rexente al so maríu Fernandu en casu d’ausencia de Xuana. El 26 de payares de 1504 muerre la reina Isabel, Fernandu proclámase rexente de Castiella y a la so fiya Xuana, reina. Un añu más tarde, el 24 payares de 1505, roblarase La Concordia de Salamanca, onde se-y reconoz a Felipe’l títulu de rei n’igualdá cola so esposa y Fernandu pasaría a ser Gobernador perpétuu. Equí, al paecer, la reina Xuana ya daba señales de llocura, polo que nuna cláusula extra, dexose bien nidio que’l reinu diba ser gobernáu por Felipe y Fernandu xupliríalu na so ausencia. Como a Felipe tampoco –y prestó un res lo roblao, embarcó nel mes de xineru de 1506 camín de Castiella cola so muyer, onde namás posase en A Coruña, foron recibios pola mayoría de los nobles castellanos y proclamaos reis de Castiella y Llión. Felipe y Fernandu ya nun se podíen nin ver, polo que l’aragonés finó renunciando al tronu de Castiella y colando pal so reinu, tres la robla de les capitulaciones de Benavente y Villafáfila en xunu de 1506. Felipe foi proclamáu rei de Castiella y Llión Iure Uxoris nes Cortes de Valladolid como Felipe I, Cortes que, por ciertu, se negaron a declarar incapaz a la reina Xuana por llocura, lo que nun esmoleció al Austria, qu’entamariá a gobernar el reinu al so preste. Poco disfrutó Felipe I de la so nueva posición como rei de Castiella y herederu al tronu d’Aragón, ya qu’a finales de setiembre d’esi mesmu añu de 1506 morrería en Burgos a la edá de 28 años. La causa de la so muerte, foi siempres un misterio ¿envenenáu por orde de Fernandu? ¿dalguna afección pulmonar tres xugar a la pelota nun espaciu fríu de la ciudá? ¿enfermedá venérea pola so afición al muyeríu?... Les caberes investigaciones apunten a la Peste, enfermedá qu’asoló la ciudá esi branu.
Como curiosidá, detacar que’l so nomatu de el Formosu debiose al rei Lluis XII de Francia. En 1501, Felipe y Xuana salieron de Flandes haza Castiella pa ser xuraos Príncipes d’Asturies. Faciendo una parada en Blois, violu el rei francés, que dixo “he equí un formosu príncipe” o, al menos, eso cuenten.
Si el primer viaxe a Castiella, pa ser
xuraos Príncipes d’Asturies, foi per tierra, el segundu, ya pa ser xuraos reis
y entamar a gobernar, foi pela mar. Y pa pagar tan fastuosu viaxe, a la par de
llevar una bona remesa de monedes pa espardeles pel so nuevu reinu, mandó Felipe
acuñar en plata reales y medios reales nes ceques d’Amberes y Bruxes, Flandes,
siguiendo los patrones aprobaos polos Reis Católicos na Pragmática de Medina
del Campu de 1497. L’acuñación d’estes pieces daten del 1505 y 1506, fechu que
se verifica porque ye la primer vez qu’apaez l’añu acuñación n’una moneda
castellana y, nun volvería a facese dempués hasta’l reináu de Felipe II. No que
se refier a la llei, fixose nuna calidá d’once dineros y cinco granos, esto ye,
una pureza de 934 milésimes, frente a los reales de los Católicos de 930
milésimes (cuenten que pa impresionar al so suegru). 
Marques de ceca d'Amberes y Bruxes
La moneda d’a real tenía un pesu de 3,45 gramos, lo qu’equivalía a 71 ¼ de pieces en marcu. Nel anversu, figura l’escudu coronáu de la parexa real, a semeyanza del de los Reis Católicos; per un llau, les armes de Xuana, los escudos de Castiella, Llión, Granada, Aragón y Sicilia, y pel otru, los de Felipe, Austria, Borgoña antíguu, Borgoña modernu, Brabante, Flandes y Tirol. Al poner nel primer y cuartu cuadrante del cuarteláu (los puestos d’honor nun escudu) los emblemes de Xuana, Felipe facía un chisgu a la nobleza castellana y asina ganalos pa la so causa frente al so suegru. La lleenda qu’apaez, PHS ET IOANNA DEI GRA(TIA) REX ET REGINA, lleva la peculiaridá, fecha adrede pol llistu Felipe, de llevar primero’l nome del rei, sí, pero abreviáu; non asina’l de Xuana, que va completu. Otru chisgu, magar que ye verdá que’l nome del rei diba delantre del de la reina, d’alcuerdu a la Concordia de Segovia, roblada polos Católicos, a la hora xuntar los sos reinos. Nel reversu, apaez la cruz de los Países Baxos Borgoñones coles armes de Castiella, Llión, Granada y el Toisón d’oru, como identidá de la Casa de los Habsburgo. La lleenda fai mención a los sos reinos, entamando polos de Xuana CASTELLE LEGIONIS ARCHIDUC AUSTRIE xuntu col añu acuñación y la marca la ceca. Nun apaecen referencies equí a los domeños aragoneses, ya que lo que pretendía Felipe yera reclamar el so drechu a gobernar Castiella y los sos territorios, magar que Fernandu inda taba vivu, y seguía siendo rei d’Aragón.
1 real de 1505. Ceca d’Amberes
La de mediu real pesaba unos 1,50 gramos y caltenía la mesma llei de plata que la moneda mayor. El diseñu de la mesma asemeyaba al de los medios reales de los Reis Católicos enantes de la Pragmática de 1497. Nel anversu apaecen les iniciales de los reis, FI, coronaes y cola lleenda PHS IOHANNA DEI GRA(TIA) REX S REGI(N)A y l’añu acuñación xunto al llión de Flandes. Nel reversu, la cruz de los Países Baxos Borgoñones coles armes de Castiella, Llión, Granada y el Toisón d’oru, como identidá de la Casa de los Habsburgo. La lleenda fai mención a los sos reinos, entamando polos de Xuana CASTELLE LEGIONIS ARCHIDUC AUS(TRIE) y la marca de la ceca.
Mediu real de 1505. Ceca de Bruxes
En resume, monedes feches en Flandes, pero calteniendo la métrica y diseñu de les castellanes, pues esa yera la idega a esparder ente la xente, Felipe I y Xuana I son los reis de Castiella y Llión. Con esta pareya real fínase’l poder de la familia Trastámara en Castiella y espoxiga una de les families más poderoses d’Europa, los Habsburgo, más conocíos equí como los Austria.
Fontes:
Tauler y Fau, páxina de subastes. Mediu real de Bruxes (castellán ya inglés)
Blog Numismático. Ruiz Calleja, Adolfo. Brujas, un real de Felipe y Juana 1505 (castellán)
Blog L’ayalga del Cuélebre. Velasco García, Sergio D. Los Reis Católicos.
Wikipedia: Felipe I de Castiella. Juana I de Castilla. Orde del Toisón d’Oru. Concordia de Salamanca, Concordia de Villafáfila, Iure uxoris (asturiano y castellán).
No hay comentarios:
Publicar un comentario