Enrique IV dexa un desastrosu enguedeyu monetariu en Castiella: constantes devaluaciones, escesu de ceques ensin control, acuñaciones con una llei probetaya, bayura de monedes falses… y sobremanera, l’enfadu xeneralizáu de la población. Cola xuba de los Reis Católicos (Isabel I y Fernandu V) al tronu, entamará un procesu renovador que, bien lluéu, fadrá que la divisa castellana seya de les más fuertes d’Europa y, col pasu los sieglos, del mundu.
Les monedes físique que circulaben per Europa taben feches d’oru, plata, vellón (plata con cobre) o simplemente cobre. L’intercambiu de monedes ente países por cuenta’l mercadéu o pagos de soldaes, principalmente a mercenarios estranxeros, obligaben a tener una referencia monetaria pa calcular el valor dau a ca divisa y facer asina los cambios al numberariu llocal. Pa ello emplegábase lo que denominamos una “moneda de cuenta”, esto ye, una ficticia a la que da-y un valor col que poder devaluar o implementar el valor d’una pieza d’oru o plata, según el preciu nel mercáu de dichos metales nobles, asina como según la pureza (llei) de la mesma. Nel casu de Castiella, la moneda de cuenta foi’l maravedí.
Lo primero que fain los reis, ye fixar unos precios y cambios acordies a la realidá del momentu, quedando los cambios de les monedes del momentu de la siguiente manera según la Carta de Precios del 20 febreru de 1475, fecha en Segovia:
Pal oru: Enrique castellán a 435 maravedinos.
Dobla de la banda a 335 mrs.
Florín d’Aragón a 240 mrs.
Pa la plata: Real a 31 mrs.
No referente al vellón, tres blanques sedríen un maravedí.
El 23 de mayu de 1475, dende Córdoba, espublicen una Carta de llabra de moneda, cola fin de sacar numberariu propiu en Castiella, con una gran carga propagandística y simbólica, fechu que refuercien cola Real Cédula de Sevilla, del 28 xunu d’esi mesmu añu, onde especifiquen la llei y los tipos a acuñar.
Pal oru manden llabrar castellanos, pieces que pola so calidá áurea, van ser conocíos tamién col nome d’excelentes. Tomando como referencia los castellanos d’Enrique IV, manden sacar 50 castellanos por marcu, con una llei de 23 quilates y ¾, esto son unes 990 milésimes d’oru y quedando una tabla tal qu’asina:
Doble castellán (1 excelente) 9,2 gramos de pesu;
Un castellán (mediu excelente) 4,60 gramos;
Mediu castellán (cuartu d’excelente) 2,30 gramos.
En plata, manden facer reales de 67 pieces por marcu (unos 3,43 gr de pesu la pieza) y con una llei d’once dineros y cuatro granos (930,56 milésimes).
Nes Cortes de 1476, declárase oficial el marcu de Burgos pa la llabra de plata, con pesu d’ocho onces y llei d’once dineros y cuatro granos. Pal oru ensin embargu, emplegarase’l marcu de Toledo, con pesu de 50 castellanos y llei de 23 quilates y ¾ (el pesu aprosimáu d’un marcu andaba pelos 230 gramos). Ello provocaría un nuevu cambiu nes divises:
Un excelente, 880 maravedinos.
Un enrique castellán, 440 mrs.
Una dobla de la banda, 340 mrs.
Un florín aragonés, 240 mrs.
Un real, 30 mrs.
Tres blanques, un maravedí.
En 1483, col Ordenamientu de la Moneda del 19 de marzu, robláu en Madrid, asentaríense los valores definitivos pa les principales divises d’oru europées y propies:
Excelente, 970 maravedinos (mediu excelente o castellán, 485 mrs)
Corona real de Francia, 328 mrs.
Corona de cualisquier otru señoríu de Francia, 312 mrs.
Dobla de la banda, 365 mrs.
Florín del cuñu d’Aragón, 265 mrs.
Ducáu venecián, 375 mrs.
Cruzáu de Portugal, 375 mrs.
Cuatro blanques, 1 maravedí.
Pa la llabra de moneda, caltienen les ceques de Burgos (con marca de ceca B), A Coruña (concha), Cuenca (C), Sevilla (S), Segovia (acueductu) y Toledo (T) ya incorporando la de Granada (G) en 1492; toes elles baxu control real.
Primer serie de monedes (1474-1497)
La moneda oficial de los Reis Católicos pal oru denominarase castellán, mandando llabrar piceces de dos, ún y mediu castellán. Ensin embargu, y pola so calidá áurea, van ser conocíos tamién col nome d’excelentes. Tomando como referencia los castellanos del rei Enrique IV, manden sacar 50 castellanos por marcu (equivalente a unos 230 gramos), con una llei de 23 quilates y ¾ (esto son unes 990 milésimes d’oru) y quedando una tabla tal qu’asina: (los pesos y diámetros van en valores medios, hai qu’alcordase de que tovía nun esistía’l Sistema Métricu)
Doble castellán (1 excelente) 9,2 gramos de pesu y 33 milímetros de diámetru. 25 pieces por marcu.
Un castellán (mediu excelente) 4,60 gramos y 26 milímetros de diámetru. 50 pieces por marcu.
Mediu castellán (cuartu d’excelente) 2,30 gramos y 20 milímetros de diámetru. 100 pieces por marcu.
La novedá n’acuñación de les nueves monedes áurees castellanes, ye l’apaición de la pareya real nel so anversu, señal de la igualdá de poder ente los dos (hai que tener en cuenta que la reina de Castiella yera Isabel y que Fernandu yera’l so consorte; pero elli heredó’l tronu d’Aragón tres la muerte de so pá, pasando Isabel a ser la so consorte allá). El poder de la xuntanza de d’ambos reinos so los Católicos, va venir tamién reflexao col grabáu de los escudos propios nel reversu.
La pieza de dos castellanos (o doble castellán, o excelente) tendría nel anversu a los dos reis sentaos en tronu, coronaos y llixeramente xiraos, pa mirase a la cara. El rei lleva espada y la reina cetru. Alredor, deberíen apaecre los sos nomes y títulos reales, pero que, por falta d’espaciu, solíen venir abreviaos o, cenciellamente, nin apaecíen, polo que podemos atopamos con lleendes del tipu FERNANDVS ET ELISABETH DEI GRACIA REX ET R(EGINA CASTELLE ET LEGIONIS). Nel reversu apaecen los escudos de Castiella y Llión xunto colos d’Aragón, Nápoles y Sicilia, baxo una sola corona y arropiaos pol aigla de San Xuan; equí apaez la marca de la ceca. La lleenda grabada, refierse a un salmu de la Biblia que diz: SUB UMBRA ALARUM TUARUM PROTEGE NOS (So la solombra de les tos ales protéxemos Señor)
 |
| Doble castellán. Ceca de Sevilla |
Pa los castellanos y medios castellos empleguen el mesmu tipu, un anversu onde los bustos de los reis apaecen enfrentaos y arrodiaos pola leenda QUOS DEUS CONIUNGIT HOMO NON S(EPARET) (Lo que Dios xunió que nun lo separe l’home) otru salmu bíblicu sacáu del Evanxeliu de San Mateu y puestu adrede pa dexar bien claro que’l so matrimoniu incestuosu ente primos, nun diba separalu nin el papa Roma. Nel reversu apaez un escudu coles armes de Castiella y Llión coronaes y llindiáu pola lleenda FERDINANDVS ET HELISA(BET DEUS GRATIA REX ET REGINA CASTELLE ET LEGIONIS). Equí apaez tamién la marca de la ceca y, delles vegaes, símbolos como les fleches y el xugu (elementos identitarios de los reis) u otros, como flores, aspes, puntos…
 |
| Un castellán. Ceca de Burgos |
 |
|
Mediu castellán. Ceca de Toledo |
En plata, los Reis Católicos acuñaron reales con valores d’a real, mediu real y cuartu de real. En 1476, el valor del real volvía a axustase a 30 maravedinos y aprobávase, como pesu ponderal pa la plata, el marcu de Burgos, de pesu d’ocho onces (unos 230 gramos) y un amestáu de la lliga de llei d’once dineros y cuatro granos (930,56 milésimes). La primer serie de reales católicos foron acuñaos ente 1475 y 1497.
El real diba tener un pesu de 3.38 gr y unos 28 mm de diámetru. Nel anversu diba acuñáu l’escudu de los reinos de Castiella y Llión arropiaos pol aigla de San Xuan y llindiáu pola lleenda FERNANDUS ET ELISABET (que debería dir xunto a los títulos consabíos de DEVS GRATIA REX ET REGINA y los reinos a gobernar, pero como que yera perllargo). Nel reversu vendría l’escudu del reinu d’Aragón, Nápoles y Sicilia coronáu y colo que cupiere de la lleenda DOMINVS MICHI ADIVTOR ET NON TIMEBO QUOD FACIAT MIHI HOMO (Ayúdame’l Señor y nun voi tener miéu de lo que me faga l’home), que ye bien llarga tamién, polo que lo más normal yera grabar les tres o cuatro primeres pallabres). Mentar que tala lleenda va refería a la guerra civil ente Isabel y la so sobrina Xuana “La Beltranexa”, casada col rei de Portugal Alfonsu V y qu’aprovechó esti casoriu p’acuñar moneda en Toro (Zamora) titulándose “Rei de Castiella, Llión y Portugal”.
 |
|
Real d’Alfonsu V de Portugal. Ceca de Toro |
 |
|
1 real. Ceca Toledo |
Acuñaron tamien moneda de mediu real, con un pesu de 1.75 gramos y 21 mm de diámetru. Nel anversu, el monograma real F Y coronáu y lo que cupiere de la lleenda QVOS DEVS CONIVNXIT HOMO NON SEPARET (lo que Dios xuna, que nun lo separe l’home). Nel reversu, los escudos de Castiella y Llión y la lleenda FERNANDVS ET (H)ELISABE(TH, que debía seguir colo de “rei y reina de Castiella y Llión”). Equí solíen marcar la ceca.
 |
|
Mediu real. Ensin marca ceca |
Y cuartos de real de 0,85 gr y 16 mm de diámeru. Nel anversu la F coronada y nel reversu la Y coronada, compartiendo ente les dos cares la consabía lleenda QVOS DEVS CONIVNXIT HOMO NON SEPARET.
 |
|
Cuartu de real. Ceca de Burgos |
No que se refier a les monedes de vellón, los reis decidieron caltener, nun entamu, les acuñaes por Enrique IV, debío a la bayura d’elles que circulaben pel reinu.
La Pragmática de Medina del Campo de 1497
Tres la Pragmática de Medina del Campo en 1497, los Reis Católicos afronten una fondera reforma monetaria pa poner n’orde tou l’enguedeyu del reinu que va afeutar al oru, la plata y el vellón. La moneda áurea que servía de referente pal restu d’Eropa yera’l ducáu venecián, dafechu, Aragón, Valencia y Catalunya ya llevaben bien d’años axustando les sos monedes a Europa. Tradicionalmente, Castiella siempre axustare les sos monedes áurees (maravedí y dobla) a la métrica andalusí, pues el so orixe taba basáu nel dinar árabe. Tres la toma de Granada en 1492, esto ya nun tién sentíu y muncho menos pa un reinu que diba camín de ser el más poderosu d’Europa.
Caltienen les ceques que ya teníen baxo’l so control: Burgos (con marca de ceca B), A Coruña (concha), Cuenca (C), Sevilla (S), Segovia (acueductu), Toledo (T) y Granada (G). Como novedá, sedría obligatorio pesar la pieza acuñada, cola fin de que pesaren toes lo mesmo y garantizar asina el so valor; ye por ello que delles vegaes puen apaecer nes pieces la marca de los ensayadores xunto a la de la ceca (nel anversu o nel reversu, indistintamente).
 |
| Marques de les ceques reales |
Como novedá, apaez l’escudu identificativu de Granada baxo los de Castiella y Aragón, como identificativu de la vitoria escontra’l caberu reinu musulmán na Península Ibérica gracies a la xuntanza de dambos reinos cristianos.
 |
| Detalle escudu de Granada |
Les monedes d’oru
Pal oru, la Pragmática ordenó que toles monedes tovieren una llei de 23 quilates y ¾ (990 milésimes). La moneda de referencia va denominase excelente y va axustase al ducáu d’Aragón, por cuenta de qu’ésti ya taba equiparáu al venecián, moneda de referencia n’Europa. La nueva moneda va tener una talla de 65 1/3 por marcu (unos 3,5 gramos la pieza) y 22 milímetros de diámetru. Hai que detacar que’l nome real de tala pieza, dáu polos mesmos reis, y asina referío na Pragmática, ye’l d’excelente de la granada, polo que tamién van venir identificaos los sos múltiplos y submúltiplos col referíu nome del “de la granada”, asina anotao pa diferenciar al nuevu excelente del anterior a la Pragmática, que yera de mayor tamañu. Los reis tamién dexaren bien nidiu’l tipu y les lleendes a grabar nes monedes:
“los dichos excelentes enteros tengan de la una parte nuestras armas reales, y una águila que las tenga, y enderredor sus letras, que digan: Sub umbra alarum tuarum protege nos, y de la otra parte dos caras, cada una hasta los hombros: la una por mí el rey, y la otra por mí la reina, que se acate la una a la otra, y alderredor sus letras que digan: Fernando et Elisabeth Dei gratia, Rex et Regina Castellae, et Legionis, y en los otros medios excelentes de la granada se ponga de la una parte las dos caras, como de suso se contiene, y alrrededor diga: quos Deus coniungit, homo non separet. Y en la otra parte nuestras armas reales y alrededor diga: Fernandus, et Elisabeth Dei gratia et lo que de ello cupiere. Y que debajo de nuestras armas reales donde las ha de haber, se ponga la primera letra de la ciudad donde se labraren, salvo en Segovia que se ponga un puente y en la Coruña una venera”
Y equí l’enguedeyu. Na Pragmática, los reis equiparaben al excelente col ducáu, poro, los tipos y lleendes a grabar na nueva moneda diben ser los fixaos pal denomináu excelente enteru. Ensin embargu, a la hora d’acuñar les pieces, interpretose que’l nuevu excelente enteru diba xuplir al excelente anterior a la Pragmática. El problema ye que l’excelente vieyu valía dos castellanos y pesaba sobre 9,2 gramos, poro, el nuevu excelente equiparose a dos ducaos, con un pesu de 7 gramos, y se llevó’l diseñu de los tipos fixáu pa los excelentes enteros, que deberíen pesar unos 3,5 gramos, y qu’a la fin tovieron que ser acuñaos colos tipos y lleendes marcaos na Pragmática pa los medios excelentes. Total, que pa desenguedeyar lo enguedeyao, decidieron nomar excelente mayor a la moneda de dos castellanos y excelente menor a la de dos ducaos y excelente al ducáu (nos cartafueyos numismáicos nomen doble excelente al excelente menor… ¡¡Buf!!).
Aclarao esto, creo, les monedes n’oru acuñaes polos Reis Católicos (y siguiendo la nomenclatura de los cartafueyos numismáticos) foron les siguientes:
Mediu excelente (mediu ducáu): Talla de 130 pieces y 2/3 por marcu, esto ye, un pesu d’unos 1,76 gramos y un diámetru de 16 milímetros. Lleva’l diseñu de tipos que na Pragmática identifica pal cuartu d’excelente (que nun salió, caro). Anversu col monograma del rei Fernandu, una F coronada. La lleenda fai referencia al so nome y títulos (eso de Fernandu pola Gracia de Dios rei de Castiella… y demás reinos) o lo que cupiere d’ello. El reversu va acotáu pa la reina Isabel, col so monograma, una Y coroná y la mesma lleenda que nel anversu, camudando solamente’l nome rexu (Isabel pola Gracia…).
 |
|
Mediu excelente. Ceca de Toledo |
Excelente (ducáu): Talla de 65 pieces y 1/3 por marcu, esto ye, un pesu d’unos 3,5 gramos y un diámetro de 22 milímetros. El so valor afitose’n 375 maravedinos. Lleva’l diseñu de tipos aprováu na Pragmática pa los medios excelentes. Anversu con bustos enfrentaos de los reis y la marca de ceca. La lleenda, QUOS DEUS CONIUNGIT HOMO NON SEPARET (Lo que Dios xunió que nun lo separe l’home). Nel reversu van los escudos de los reinos y territorios de Castiella, Aragón y Granada, xunto con una lleenda onde apaecen los títulos rexos consabíos (Fernandu, Isabel, pola Gracia Dios, reis de…)
 |
|
1 excelente. Ceca de Burgos |
Doble excelente (dos ducaos): Talla de 32 pieces y 2/3 por marcu, esto ye, un pesu d’unos 7 gramos y 29 milímetros de diámetru. Lleva los tipos aprobaos na Pragmática pa los excelentes. Anversu colos bustos reales enfrentaos y la marca de la ceca. La lleenda gabada ye la consabía de los nomes y títulos reales. Nel reversu apaecen los escudos de los sos reinos y territorios protexíos pol aigla de San Xuan, xunto cola lleenda SUB UMBRA ALARUM TUARUM PROTEGE NOS (So la solombra de les tos ales protéxemos Señor).
 |
| Doble excelente. Ceca de Segovia |
La Pragmática tamién permitía acuñar excelentes de mayor valor, siempres y cuandu respetaren la so llei y axustaren la cantidá de pieces por marcu según pesu. Tamién tendría de venir grabáu’l valor nominal de la pieza. No referente a los tipos y lleendes, debíen ser iguales a los aprobaos pal doble excelente. Un cuadru aprosimao sedría ésti:
Cuádruple o cuatro excelentes, 14 gramos, 34 milímetros de diámetru
10 excelentes, 35 gramos, 43 milímetros de diámetru
20 excelentes, 70 gramos, 53 milímetros de diámetru
50 excelentes, 175 gramos y 67 milímetros de diámetru
 | ||||
| Cuádruple excelente. Ceca de Burgos |
 |
| 10 excelentes. Ceca de Segovia |
 |
|
20 excelentes. Ceca de Segovia |
 |
| 50 excelentes. Ceca de Sevilla |
Numberariu de plata
La moneda de plata del reinu sedrá’l real; esti tendrá una llei d’once dineros y cuatro granos (930,56 milésimes), tanto pa elli, como pa los sos submúltiplos, el mediu real, el cuartu de real y el octavu de real. Nes Cuentes Reales vendrá identificáu como “real nuevu” pa diferencialu del anterior, qu’inda va seguir emplegándose. Les pieces a batir sedríen:
Un real: Talla de 67 pieces por marcu, esto ye, unos 3,38 gramos y 27 milímetros de diámetru. El so valor afitose’n 34 maravedinos. No que se refier al diseñu de los tipos del real, los reis manden acuñar el so escudu d’armes coronáu y cola lleenda FERNANDVS ET HELISABET D(EUS GRATIA) nel anvesu y, pal reversu, dexen les sos representaciones identificatives del xugu y les fleches cola lleenda REX ET REGINA CAST(ELLAE) LEGIO(NIS) ARAGO(NUM); tamién deberíen apaecer lletres identificatives pa Sicilia y Granada, pero delles vegaes nun entraben. Equí apaecen tamién les marques de la ceca y el ensayador.
 |
| 1 real de la ceca Segovia |
Mediu real: Talla de 134 pieces por marcu, esto ye, 1,75 gramos y 21 milímetros de diámetru.
Cuartu de real: Talla de 268 pieces por marcu, esto ye, 0,85 gramos y 16 milímetros de diáetru.
N’ambos dos vendríen grabaos los símbolos identitarios de los reis, el xugu y les fleches, coles lleendes propies de los nomes y los títulos reales:
 |
|
½ real. Ceca de A Coruña |
 |
|
¼ de real. Ceca de Burgos |
Octavu de real: Talla de538 pieces por marcu, esto ye, 0,45 gramos y 12x12 milímetros. Acúñase cuadráu pa evitar confundilu con unes monedes de vellón nomaes blanca. Nuna de les cares apaez la F coronada del rei y la lleenda FERNANDUS D.G.RE (DEUS GRATIA REX). La marca de ceca ye una G, de Granada. Na otra cara apaez el monograma de la reina, Y coronada, cola lleenda HELISABET D.G.REG (DEUS GRATIA REGINA). Esta semeya ta sacada del blog d’Adolofo Ruiz Calleja, blognumismatico.com, y sacada a la so vez, d’una subasta d’Áureo & Calicó del 2018. Detaco esto porque hasta la fecha enxamás se viere ún d’estos exemplares sinon en debuxu, poro, esti ye, de momentu, l’únicu exemplar conocíu.
 |
|
1/8 de real. Ceca de Granada |
Monedes de vellón
Tres dir desaniciando pocu a pocu, el numberariu menudu del rei Enrique IV, los Católicos deciden acuñar moneda de vellón. La moneda más probetaya del numberariu castellán, pero a la par la más emplegada nel comerciu cotidianu del pueblu llanu, yera la conocía col nome de blanca y tenía una llei de 7 granos (unes 24,30 milésimes de plata) y una talla de 192 pieces por marcu, esto ye, unos 1,20 gramos de pesu y 18 milímetros de diámetru. Tenía un valor de mediu maravedí. Nel anversu apaecía’l monograma coronáu de Fernandu y nel reversu, el de Isabel. Repartío ente dambes dos cares, diba grabada una lleenda colos ya consabíos nomes y títulos de los reis.
 |
|
1 blanca. Ceca de Cuenca |
Monedes de vellón difíciles de catalogar
Esisten ensin embargu, unes pieces catalogaes como maravedinos y con valores d’a 2 y d’a 4. Dellos cartafueyos les catalogen, xenéricamente, dientro’l reináu de los Católicos (1474-1504) ensin más y en delles subastes asina bien especificao. Tampoco especifiquen si son anteriores o posteriores a la Pragmática de 1497. Detaco equí lo espublizao nel blog Casa Escudero, que data l’acuñación d’estes monesdes ente 1492 y 1497 ante la necesidá d’acuñar de nuevu vellón (hai que tener en cuenta que de vellón acuñábense les pieces más probetayes, les emplegaes pol pueblu nel so mercar diariu, poro, les que más sufríen los desgastes y perdes). Per otru llau, atopamos el trabayu de David Martínez Chico, qu’asitia la so acuñación tres l’aprobación de la Pragmática de 1497, ya inclusu indica que son acuñaciones póstumes a los Católicos, feches durante los reinaos de Carlos I y Felipe II. Lo que yo saco en conclusión, ye qu’efeutivamente les monedes son posteriores a 1492, tala afirmación vienmos dada pola presencia de la granada baxo’l castiellu, indicativu de que’l Reinu de Granada ya fuere conquistáu. Y ye posible afirmar que pue ser posterior a 1497 poles sos lleendes grabaes, ya que son les indicaes a grabar nes nueves monedes aprobaes na Pragmática de Medina del Campu. Ensin embargu, na Pragmática vien especificao que pal vellón solo s’acuñen blanques y non maravedinos, magar que tamién indica que toa moneda de vellón anterior a la Pragmática seya retirada y fundía pa facer moneda nueva.
El tipu pa los dos valores yera’l mesmu; nel anversu, el castiellu y la granada, cola marca de la ceca y la lleenda típica de lo que cupiere de FERNANDVS ET ELISABETH DEI GRATIA y un reversu col llión y la lleenda (o lo que cupiere) REX ET REGINA CASTELLE ET LEGIONIS. La moneda de 2 maravedinos pesa unos 4, 85 gramos y tien un diámetru d’unos 25 milímetros. La de cuatro, 9,71 gramos y 28 milímetros aprosimaos.
 |
|
4 maravedinos |
 |
|
2 maravedinos |
Numberariu a nome de los Reis Católicos nos domeños d’Aragón
El 20 xineru de 1479 Fernandu hereda’l tronu d’Aragón sol título de Fernandu II (ya yera V de Castiella). L’11 d’ochobre d’esi mesmu añu, xura los Fueros de Valencia. Isabel conviértese’n Reina Consorte y pa dexar bien claru’l fechu, acuñen ducaos d’oru valencianos con valores de mediu ducáu, ún ducáu y dos ducaos, equiparando al ducáu col castellán. Les monedes d’oru valencianes ya llevaren tiempo asemeyaes al ducáu florentín.
El mediu ducáu lleva un tipu distintu a les pieces mayores. N’elli, apaecen nel anvesu los monogrames reales, FY, coronaos llindiáos con una lleenda colos sos nomes y, nel reversu, l’escudu real aragonés coronáu. La lleenda qu’apaez ye semeya a les de les monedes castellanes, los nomes de los reis col so título nel anversu y los nomes de los sos domeños nel reversu, solo qu’esta vegada referentes a Valencia y Mallorca. La ceca va identificada con una V. Tienen un pesu aprosimáu d’1,75 gramos y 16 milímetros de diámetru.
 |
|
Mediu ducáu |
Los ducaos mayores lleven un diseñu de tipu semeyu, los bustos enfrentaos de los reis nel anversu y l’escudu coronáu de los reinos y domeños de Castiella y Aragón nel reversu. De nuevu, les lleendes grabaes fain referencia a los sos nomes y títulos reales, referentes éstos a los reinos de Valencia, Mallorca y Cerdeña. La marca de la ceca valenciana ye una corona. El ducáu pesaba unos 3,50 gramos y con un diámetru de 21 milímetros. La pieza de dos ducaos pesaba unos 7 gramos y tenía un diámetru de 28 milímetros.
 |
|
1 ducáu |
 |
|
2 ducaos |
De 1482 ye tamién un real de plata acuñáu en Zaragoza, de 3 gramos de pesu y 25 milímetros de diámetru. Otra vegada, el tipu de les cares enfrentaes nel anversu cola lleenda de los sos nomes y títulu, y un reversu colos escudos castellanos y aragoneses llindiaos pola lleenda referente a Aragón y Castiella.
 |
|
1 real de Zaragoza |
Sobre 1504 Fernandu II d’Aragón ye proclamáu rei de Nápoles (como Fernandu III), acuñándonse carlinos a nome de los Reis Católicos nel nuevu reinu. El carlino yera una moneda de plata d’unos 2,7 gramos de pesu y 25 milímetros de pesu. Yera la doceava parte d’una piastra, unidá monetaria d’esti territoriu itálicu. Nel anversu apaez el bustu del rei Fernandu xunto a una T, marca del mayestru de la ceca napolitana Giancarlo Tramontano; llíndialu la lleenda FERNANDVS ET HELISABET D(EUS) G(RATIA). El reversu ye pa la reina Isabel, xunto a la lleenda REGES ISPANIE ET VTRIVSQUE SIC(ILIAE), esto ye, reis d’Hispania y Les Dos Sicilies.
 |
| 1 carlino (Nápoles) |
Monedes de los Reis Católicos nel Nuevu Mundu
12 d’ochobre de 1492, Cristóbal Colón posa’l pie no que primeramente pensaben que yera Cipango (Xapón) y que’n realidá foi una islla caribeña a la que nomó San Salvador y que güei forma parte de Les Bahames. Curioso ye, que nun viaxe comercial d’esti calibre, nun apaezan nos llibros d’a bordu referencies a monedes o llingotes d’oru o plata pa tamaña empresa y que les úniques referencies al dineru qu’apaecen nel Diariu, seya mentando la paga de los mariñanes o les pieces que, por casualidá, emplegaron xunto con otres baratixes, pa trocar colos indíxenes. Si facemos casu del diariu de Colón, la primer referencia que fai d’una moneda entregada a los autóctonos, ye la de tres ceutís portugueses a cambiu d’unos ovillos d’algodón. Poro, les primeres monedes del Nuevu Mundu, salió de la puxarra que los mariñanes portaben na faltriquera.
Dexando de llau estes curiosidaes y centrándomos no que se refier al numberariu oficial, la necesidá d’acuñar dinero pal mercadeu internu de la primer colonia europea n’América (nomada La Isabela y asitiada na islla Hispaniola, anguañu República Dominicana y Haití) fexo que Colón solicitare a los Católicos l’envíu del personal y ferramental necesariu pa montar una ceca. Aprobáu’l proyeutu en 1497, deberíen partir mayestros y oficiales de la Real Facienda, xunto con cuños y troqueles, cola fin de fabricar monedes d’oru, esto ye, excelentes. Nun hai constancia de que’l proyeutu llegare a ponese’n práutica. Sábese que’n 1500 el rei Fernandu derogó esti mandáu y dende entós, l’oru debería venir pa Castiella en llingotes y convertise equí en moneda pa tornar de nuevu a la colonia, aprobao esto nuna Real Célula de 1503 pola reina Isabel. Nun sedría hasta 1505 y siendo ya rexente’l viudu rei Fernandu, el que se punxere’n marcha l’acuñación de moneda pa la nueva ciudá colonial de Santo Domingo, siendo toes elles de plata y vellón (nin un res d’oru). La esclusividá d’acuñar estes monedes cayó na ceca de Sevilla, reforzada más tarde pola de Burgos pa llabrar vellón. Les pieces en plata a acuñar diben ser con valores d’un real, mediu y cuartu, siendo pal vellón valores d’un, dos y cuatro maravedinos, coles talles y llei aprobaes na Pragmática de 1497.
Como les monedes foron mandaes llabrar pol Católicu, siendo rexente de Castiella, hasta la llegada de los nuevos reis, Xuana y Felipe, y quicias tamién pa diferenciales de les que tabe circulando per Castiella, les pieces unviaes a Santo Domingo llevaben una F coronada en una de les sos cares. Nel casu del real, la marca fernandina va ente los elementos identitarios de los Católicos, les fleches y el xugu; na otra cara va l’escudu conxuntu de tolos sos reinos cola marca de la ceca de Sevilla. No que se refier a les lleendes, son les típiques colos sos nomes y títulos (Fernandu, Isabel reis de Castiella, Llión, Aragón…).
 |
|
1 real |
Nos valores menores, mediu y cuartu de real, desapaez l’escudu, dexando nuna cara’l monograma de Fernandu cola marca la ceca y na otra los elementos identitarios de los reis. Les lleendes, les consabíes de los nomes, títulos y reinos. Esisten tamién variantes onde la F va acompañá del xugu, quedando soles les fleches nel reversu.
No que se refier a los maravedinos, tolos valores diben tener el mesmu tipu pa les cares, camudando namás que’l pesu y diámetru pa poder diferencialos. Nel anversu van apaecer los monogrames reales d’Isabel y Fernandu coronaos y llindiaos pola ya conocía lleenda colos sos nomes y la gracia Dios, apaeciendo nel reversu la novedá de xuplir l’escudu real pol monograma coronáu de Fernandu y la lleenda que fai referencia a que son rei y reina de Castiella, Llión y Aragón. Los valores métricos aprosimaos son:
1 maravedí, 1,21 gramos de pesu y 20 milímetros de diámetru;
2 maravedinos, 4,85 gramos y 25 milímetros, y
4 maravedinos, 9,71 gramos y 28 milímetros.
 |
|
Maravedinos |
En 1506 tomaríen el control del Reinu de Castiella y los sos domeños, Xuana I y Felipe I. Fernandu caltendría’l control d’Aragón y los sos domeños. Esi mesmu añu morrería Felipe, polo que Fernandu tornaría a Castiella nuna segunda rexencia xunto a la so fiya, a la que ya teníen oriellá del cargu, allegando una supuesta llocura. Durante esti períodu, acuñaríase, sistemáticamente, moneda a nome de los Reis Católicos hasta la muerte de Fernandu V en 1516.
Fontes:
La evolución de los cambios monetarios en el reinado de Isabel la Católica según las cuentas del tesorero Gonzalo de Baeza (1477-1504) de Francisco Olmos, José María. Universidad Complutense de Madrid.
La reforma monetaria de los Reyes Católicos: Su importancia histórica. Dra. Dª. María Ruiz Trapero, Catedrática Emérita de “Epigrafía y Numismática”. Universidad Complutense de Madrid.
Pragmática de 13 de Junio de 1497, dada en
Medina del Campo. De las Ordenanzas que han de guardar los Oficiales en la
labor de la moneda y de sus derechos. Juan de Parra, secretariu real,
por mandatu de los Reis Católicos. Medina del Campu, 13 xunu de 1497
Medina del Campo 1497: Análisis de la reforma monetaria de los Reyes Católicos. Casillas Rollón, Antonio, en MUÑOZ SERRULLA, María Teresa (Coord.), Estudios de Historia Monetaria (II), Ab Initio, Núm. Extraord. 2 (2012), pp. 57-89, disponible en www.ab-initio.es. Estudiante de 5º de Licenciatura de Historia (UCM). 2012
Dos maravedíes inéditos a nombre de Los
Reyes Católicos de Sevilla. Martínez Chico, David. Gaceta Numismática nu
195 de l’Asociación Numismática Española. Barcelona, xunu 2018.
Numismática Española. Catálogo de todas las monedas emitidas desde los Reyes Católicos hasta Felipe VI (1474 a 2020). Aúreo y Calicó. Barcelona 2019.
Monedas
hispánicas 1475-1598: Sala de exposiciones del Banco de España, con
motivo del V Centenario del Descubrimiento de América. Madrid : Banco de España,
1987. Signatura: 113193
Las monedas medievales en el Nuevo Mundo. Mendoza Arellano, José Luis. Revista OMNI nª 6, abril del 2013.
Web Maravedis.net (Llistáu y semeyes de reales a lo llargo la historia hispánica). López de la Fuente, Juan Luís.
Web Casa Escudero “Almacén de la Mancha”. Llistáu de monedes a lo llargo la historia d’España. Caballero García, David.
Web Portal Fuenterrebollo. Estaya numismática.
Web Momeca. Moneda medieval.
Web MAN. Muséu Arqueolóxicu Nacional
Web Numista. Monedes de to’l mundu dende’l sieglu XV hasta anguañu.
Web l’Ayalga del Cuélebre. El real. Velasco García, Sergio Daniel.
Wikipedia: Fernando El Católico. Reino de Nápoles. Anexo: Reyes de Nápoles y de Sicilia.
No hay comentarios:
Publicar un comentario