2008: Bimilenariu de San Pablu

Motivu conmemorativu: Bimilenariu del nacimientu del Apóstol San Pablu

      Tirada: 100.000                     Fecha d’emisión: 5 setiembre                 

      Nomáu tamién Añu Paulín por ser añu xubilar dedicáu a San Pablu (o Saúl) de Tarsu; esti añu, los peregrinos a la Basílica de San Pablu del Vaticanu, recibieron plena indulxencia.

     Nel intre aparez representada la Cayía nel Camín de Damascu, ciudá que se ve nel fondu; el caballu del xudíu cazacristianos Saúl encabrítase al ver una lluz celestial y elli queda ciegu durante tres díes, curándose al facese bautizar na ciudá. A manzorga, el nome’l país emisor CITTA’ DEL VATICANO, y a mandrecha la lleeenda ANNO SANCTO PAULO DICATO (Añu dedicáu a San Pablu). L’añu emisión 2008 aparez sobre los torrexones, la marca la ceca de Roma (R) y el nome del artista VEROI tan sola muria. Sola imaxe, les iniciales de la grabadora Luciana De Simoni (L.D.S.) cola abreviatura INC (d’INCISORE, grabador n´italiano, o INCIDIT grabolo en llatín).

     Nel aniellu esterior, les doce estrelles de la Xunión Europea.