2012: Alcuentru Mundial de la Familia

Motivu conmemorativu: VII Alcuentru Mundial de la Familia. Milano, Italia 2012

Tirada: 115.000              Fecha d’emisión: 16 d’ochobre

     Estos alcuentros fainse cada tres años pa destacar a la familia como “patrimoniu humanu común y reflexar el so calter universal y la so contribución al llau humanu de la vida en tol mundu”. Nació en 1994 de la man de Xuan Pablu II y de mou itinerante. L’alcuentru suel dixebrase en dos eventos: un congresu y un aconceyamientu popular.

Esti añu –y toca a Milano (Italia) la so organización a traviés de la so Diócesis y el Conseyu Pontificiu pa la Familia, tres la convocatoria fecha pol Papa Benedictu XVI. Entama l’eventu con un Congresu teolóxicu-pastoral ente’l 30 mayu y el primeru xunu, sol lema La Familia, el Trabayu y la Fiesta, furando asina nel “redescubrimientu de la dimensión social de la familia como aporte al patrimoniu de la humanidá”. L’aconceyamientu popular pa coles families católiques celébrase’l 2 y 3 de xunu.

     Nel intre aparez la representación d’una familia paseando. Tres d’ellos, la Sée Catedral de Milán, ciudá qu’acoyó l’alcuentru. A mandrecha aparez l’añu d’acuñación 2012; la marca de la ceca de Roma (R) tá na parte inferior. Alredor del diseñu, la lleenda: VII INCONTRO MONDIALE DELLE FAMIGLIE. CITTA’ DEL VATICANO. A manzorga vese’l nome de la diseñadora Gabriella Titotto (G. TITOTTO).

     Nel aniellu esterior, les doce estrelles de la Xunión Europea.