La primer vez que pudimos emplegar pa les nueses
merques les monedes de la nueva divisa europea, foi’l 1u de xineru del 2002. Ensin embargu, la idega de facer
una moneda única ya venía intentándose dende hai unos añinos.
 |
| Napoleón III |
El
primer proyeutu seriu pa xunir monedes nació allá pel sieglu XIX. Dellos países
europeos aconceyárose pa fundar la Xunión Monetaria Llatina. La precursora
d’esta idega foi la Francia de Napoleón III y el so novedosu “inventu” nomáu
Sistema Métricu Decimal (Francia dexare de llau tolos sistemes del Antiguu
Réxime gracies al triunfu de la so Revolución). La idega yera cenciella: ca
país emitiría la so divisa nacional, solo que debía de tener en cuenta una
serie condiciones como l’aleación de los metales (les monedes yeren
mayoritariamente d’oru, plata y cobre), el pesu, diámetru, grosor... Asina,
cuando un mercader d’un país toviere nes sos manes una moneda d’otru, con ver
les sos dimensiones y pesala, ya -y valdría pa saber que yeren equivalentes (hay
que tener en cuenta que’l valor real de la moneda -y lu daba la so aleación
d’oru o plata y non el valor facial que venía grabáu n’ella). Too esto
esbarrumbose cola Gran Guerra (la Primer Guerra Mundial) y
l’aparición de nuevos metales y aleaciones, non nobles, usaos pa facer monedes.
Nun sedría hasta l’añu 1975 cuando Europa
entama a falar de xunir divises; dafechu,esti añu nacería la EUA (European Unit of Account-Unidá de Cuenta Europea), una moneda
cesta creada pa usu internu del Bancu Européu d’Inversiones. Esta moneda nun cotizaba internacionalmente
nin yera tratada como divisa canxeable, sinon que yera namás q’un cómputu sacáu
de facer la media ente les divises más poderoses de la entoncies CEE (Comunidá
Económica Europea).
Nel
añu 1979 créase l’EMS (European Monetary System-Sistema
Monetariu Européu) cola fin de dotar d’estabilidá a les distintes monedes
europées de cara a una xunión monetaria. Ello provoca el desaniciu de la EUA y
el nacimientu del ECU (European Currency Unit- Unidá Monetaria
Europea), cuyo logu yera ₠.
Seguía siendo una moneda cesta, pero con visos de facese real.
 |
| Moneda 5 ecu (Bélxica) |
Nel añu 1993 entra en vigor el Tratáu de la Xunión, nel cual se prevée
la creación d’una Xunión Económica y
Monetaria (XEM; UEM en castellán; EMU n’inglés) y
la introducción ya d’una moneda única. Nun primer momentu dicha moneda diba ser
nomada ecu (y dafechu, dellos
países emitieron moneda ecu, aunque como
mera moneda de colleición n´oru y plata). El nome escoyíu prestó-yos a los
franceses, pues asina nomaben ellos al Escudu, moneda fuerte hai dellos
sieglos, pero n’otros países daba pie a dellos xuegos de pallabres (pa los
alemanes ein kuh, ye una vaca; pa los
portugueses é cú, ye culu). Foi’l 15
d’avientu de 1995 cuando los estaos miembros de la Xunión europea (XE) alcordaron crear la moneda común europea nomada
definitivamente, euru.
El primer pasu foi eliminar los sistemes
monetarios de los distintos países acoyíos al proyeutu y afitar un cambiu non
variable y definitivu ente les divises nacionales y la nueva moneda. Asina, el
primeru de xineru de 1999 l’euru conviértese en moneda única en dellos países
de la Xunión, conformando un grupu denomináu a posteriori Zona Euru o eurozona. Magar que nos tres primeros años
foi una moneda que nun circulaba y que s’usaba solo a efeutos contables como,
por exemplu, nos pagos lletrónicos, dellos países ya acuñaren monedes (nes
primeres pieces apaez l’añu 1999 grabáu nel exergu); mas los ciudadanos nun
vimos la moneda físicamente, nin entamamos a emplegala nes nueses transacciones
ordinaries, hasta’l primeru de xineru de 2002.
En total, foron 12 países de la XE los qu’entamaron pa col
euru (Alemaña, Austria, Bélxica, España, Finlandia, Francia, Grecia,
Irlanda, Italia, Luxemburgu, Países Baxos y Portugal), más otros tres fora
de la XE, pero con tratáu pa poder acuñar los sos propios euros (Ciudá del Vaticanu,
Mónacu y Sanmarín). Aparte, hai otros dos países onde podemos usar la nueva divisa, por mor de la so dependencia d’Alemaña: Montenigru y Kosovu (esti últimu
nun ta reconocíu como tal por dellos países de la XE, ente ellos España).
Coles sucesives ampliaciones de la XE (a
partir del 2004), el club d’euroadictos tamién foi xubiendo, poro, según vaiga
aumentando la familia, equí diremos espublizándolo. Pol momentu, diremos
desglosando los títulos que vienen a continuación:
- Les cares nacionales: Disposiciones y llista países emisores.
- Monedes conmemoratives de 2 €: Disposiciones
- Monedes conmemoratives de 2 €: Disposiciones
No hay comentarios:
Publicar un comentario