Les cares nacionales

Disposiciones pal diseñu de les cares nacionales

     En 1996 el Conseyu d’Europa alcordó que la futura moneda d’Europa debería tener un anversu con un diseñu propiu de cada país emisor (cara nacional) y un reversu común a tous (cara común). Na cara nacional deberíen tar representaes les doce estrelles de la bandera de la XE. Esta norma, xunto cola que regulaba les carauterístiques de les monedes (módulos, pesos, aleaciones, cantos...) foi espublizá nel Reglamentu del Conseyu Européu (CE) N^u 975/98. Un añu más tarde, espublizose una modificación al mesmu: (CE) N^u 423/1999.

     Nel añu 2003 el Conseyu dictó unes recomendaciones (poro, de cumplimiento non obligatoriu) acerca de les modificaciones de les cares nacionales, detacando que nun se pue facer ninguna modificación de les cares tipu hasta’l final de 2008, a nun ser que’l xefe d’estáu cuya efixe s’alcuentre na moneda muerra o cese nel cargu enantes de la fecha; asina mesmo, ca estáu emisor tién d’informar a la Comisión de dichos cambios como mínimu con seis meses d’antelación.

     Nel 2005 se dicten nueves recomendaciones, ente elles que les cares nacionales destinaes a la circulación deben llevar una identificación del estáu emisor, bien el so nome, bien una abreviatura del mesmu. Tamién que nun deberá repetir nenguna indicación de la denominación de la moneda, o de partes de la mesma (nin el nome la moneda nin el so valor facial, que va too nel reversu común) a nun ser que s’emplegue un alfabetu distintu al llatinu.

     La lleenda’l cantu la moneda de 2 € pue llevar un indicativu de la denominación y el valor si s’emplega la cifra 2 y/o la pallabra EURO nel alfabetu pertinente.

    

     Y pa les monedes que s’acuñen a partir del 2010: “Les doce estrelles de la Xunión Europea, qu’arrodien los diseños de la moneda, deben arrodiar tamién tolos elementos que formen parte de la identificación de la mesma, esto ye, les marques de la ceca y marques personales si les toviere; l’añu d´emisión o acuñación, y el nome o abreviatura identificativa del país. Asina mesmo, les estrelles tienen d´aparecer alliniaes de la mesma forma que tan na bandera de la Xunión”. No referente a les efixes de los xefes d’estau de  dalgunos países, solo puen modificar el diseñu cada 15 años, salvo qu’esti cese por dalguna causa (muerte, abdicación, cambiu de sistema políticu...).

      Toes estes recomendaciones van finar siendo d’obligáu cumplimientu a partir de la espublicación del Reglamentu (UE) N^u 566/2012 del Conseyu; eso sí, los países veteranos con diseños del 2002, que nun fixeren los cambios, tienen ¡¡¡hasta’l 2062!!! pa ponese al día.

Los anversos nacionales

     Hai que tener en cuenta l’añu impresu na moneda; según que país, pue ser l’añu d’acuñación o l’añu d’emisión. Magar que les monedes entamaron a circular nel añu 2002, dellos países ya teníen monedes acuñaes dende l’añu 1999 y asina bien reflexao nel exergu la moneda. Poro, los países con fecha 1999 y posteriores, marquen l’añu d’acuñación; el restu, dende’l 2002, l’añu d’emisión.

     La mayoría de los países emisores optaron pol esquema 2-3-3 a la hora de diseñar y acuñar les monedes, esto ye, que les monedes d’1 y 2 euros comparten el mesmu diseñu salvando la diferencia del bimetalismu; les de 10, 20 y 50 céntimos comparten un segundu diseñu, y les d’1, 2 y 5 céntimos comparten un tercer diseñu.

Los primeros pa col Euru (01-01-1999)

     El primeru de xineru de 1999, once países de la XE aceutaron la nueva moneda y afitaron el cambiu de les sos divises nacionales pa col Euru conformando la denominada Zona Euru o Eurozona: Alemaña, Austria, Bélxica, España, Finlandia, Francia, Irlanda, Italia, Luxemburgu, Países Baxos y Portugal. El doceavu país n’entrar foi Grecia, que nun lo fexo hasta’l  primeru de xineru de 2001, a tiempu pa poner en circulación la nueva moneda el  primeru de xineru de 2002.

     N’esta tabluca facemos un resume de los países coles sos divises desaniciaes y el so afitamientu pa col euru:  

Nuevos socios a partir del 2004

     En mayu de 2004 la XE aceutó l’ingresu de diez miembros más pasando a ser una Xunión de 27 países. Dellos d’estos países ingresaron también na zona euru emitiendo les sos propies monedes.

     El 1^u xineru de 2007 Eslovenia entamó a pagar n’euros;
     el 1^u xineru de 2008 Xipre y Malta;
     el 1^u xineru de 2009 Eslovaquia;
     el 1^u xineru de 2011 Estonia;
     el 1^u xineru de 2014 Letonia, y
     el 1^u xineru de 2015 Lituania.

El cambiu afitáu pa col euru de les sos divises foi’l siguiente: 

Euros fora la Xunión Europea

     Dellos estaos fora de la XE adoptaron la nueva moneda (desaniciando la so moneda nacional) a traviés d’un alcuerdu cola mesma Xunión, principalmente pola so dependencia comercial y financiera con países de la zona euru (Italia y Francia). Esti alcuedu incluyía tamién la posibilidá d’acuñar los sos propios euros n’igualdá de condiciones que’l restu países de la XE. Poro, el primeru de xineru del 1999 Ciudá del Vaticanu, Mónacu y Sanmarín, afitaron el cambiu de la so divisa pa col euru del mesmu mou que lo fixeren los países de la XE. Nun foi nada complicao, ya que les llires vaticanes y sanmarines taben ya equiparaes a la llira italiana, y lo mesmo pa Mónacu cuyu francu monegascu taba equiparáu al de Francia. 

      Como les tiraes d’estos países son tan llimitaes, finen convirtiéndose en rareces mui codiciaes polos colleicionistes de monedes, polo que dichos estaos solo emitíen series en cartones o estuches pa satisfacer dichu mercáu, teniendo asina qu’emplegar los sos ciudadanos los euros del restu países pa les sos transacciones cotidianes. Esto foi prohibío pola XE a partir del añu 2012 a traviés del nuevu reglamentu (UE) n.^u 651/2012, nel que llimita’l númberu monedes pa colleición nun 5% de lo acuñao.

     Kosovu (territoriu non reconocíu como estáu por dellos países de la XE, ente ellos España) y Montenigru, van trabayar con euros pola so dependencia d’Alemaña, pero ensin poder acuñalos.

Entra Andorra (01-01-2014)

     Andorra adoptó l’euru como moneda de cambiu nel so territóriu a partir del 2002 pola so dependencia d’España y Francia, pero nun foi hasta l’añu 2014 cuandu, previu alcuerdu cola XE, entamó a acuñar moneda propia. L'antígua moneda andorrana llamábase diner, pero solo s’acuñaba pal mercáu del colleicionismu; les divises emplegaes nel intre el país foron la peseta española y el francu francés, hasta’l so desaniciu pol euru, que pasó a ser la nueva divisa comercial del Principat.