Ciudá del Vaticanu (Estáu Pontificiu)

Enllaz: 2 euros conmemorativos vaticanos

     El Vaticanu alcuéntrase llegalmente nuna xunión monetaria con Italia, polo que tién drechu a qu’esti país –y acuñe una cantidá determináo de monedes. Poro, si nun tienen ceca propia, tá nidio entós quién va encargase de les acuñaciones... Caro, la ceca de Roma.

Primer serie (2002-2005)

     La primer serie (l’añu grabáu na impronta ye’l d’emisión) reproduz la efixe de So Santidá el papa Xuan Pablu II. Alreor de la efixe, aparez el nome del país emisor, CITA’ DEL VATICANO con 12 estrelles y l’añu d’emisión. La ceca de Roma vién identificada cola lletra R. La única diferencia ente los diseños de los tipos tá nel asitiamientu del nome del país, les estrelles y l’añu emisión alredor del bustu del papa, lo que nos lleva al típicu esquema 2-3-3 y que, pa enriba, nun cumple cola norma europea no referente a les estrelles la bandera.

     Nes monedes aparez tamién grabada la inscripción GV • UP INC qu’equival a les iniciales del diseñador Guido Veroi (GV) y la grabadora Uliana Pernazza (UP); no que se refier a l’abreviatura INC hai dos posibilidáes: puede equivaler a INCISORE (grabador n´italianu) o INCIDIT (grabolo, en llatín).

     Nel cantu la moneda de 2 euros aparez un 2 y una estrella delles vegaes.

Segunda Serie (2005)

     Cola muerte del papa Xuan Pablu II y a la espera del nuevu papa, el Vaticanu emite una segunda serie de monedes nomada Sée Vacante.

      Na segunda serie, emitía en xunu del 2005, vese l’escudu d’armes del Camarlengo, títulu del temporal alministrador de los bienes de la Santa Sée qu’ostenta un Cardenal, escoyíu d’antemanu pol Papa, mentantu s’escueya nuevu sucesor de Pedru. Alredor del escudu aparez la lleenda SEDE VACANTE y l’añu emisión en númberos romanos MMV (2005). Ente l’escudu d’armes y l’añu d’emisión figura la marca de la ceca R.

      El diseñu ye obra de Daniela Longo (nel estremu inferior izquierdu de la moneda aparez la so identificación: D. LONGO). 

     Tamién aparecen les iniciales de los grabadores, cuatro pa ocho monedes, a mandrecha nel estremu inferior acompañáes pola abreviatura INC (ya sabeis, INCIDIT o INCISORE):

 

         

 M.A.C., Maria Angela Cassol nes monedes d’1 y 20 céntimos

  

LDS, Luciana De Simoni nes de 2 y 50 céntimos

           

ELF, Ettore Lorenzo Frapiccini nes de 5 céntimos y 1 euru

          

 M.C.C., Maria Carmela Colaneri nes de 10 céntimos y 2 euros

     Na parte superior de la corona circular aparecen doce estrelles dispuestes nuna semicircunferencia, y na parte inferior, el nome del país emisor CITTA’ DEL VATICANO, polo que sigue ensin cumplise la norma con respeutu a la bandera europea.

     N’esti casu el Camarlengo foi’l Cardenal rioxanu Eduardu Martínez Somalo y el so escudu tién dos campos: a manzorga 3 flores de lis y a mandrecha dos bandes blanques en fondu bermeyu; La cruz doble tres l’escudu indica que tamién ye Arzobispu, y el sombreru (nomáu galeru) coles dos riestres de quince borles cada una ye’l símbolu de los Cardenales.  Les llaves de San Pedru y la sombrilla abierta (el canopeu), son les señes que lu identifiquen como Camarlengo. Sol escudu hai una vitola cola lleenda CARITAS ET VERITAS (Amor y Verdá), lema delCcardenal.

Tercer Serie (2006-2013)

     La tercer serie del Vaticano, emitía n’abril de 2006, muestra la efixe de so Santidá’l Papa Bendictu XVI. El nome del país emisor CITTA’ DEL VATICANO ye l’únicu detalle que varía de sitiu sigún el grupu de monedes, polo que tamién sedría un típicu esquema 2-3-3. Alredor, les 12 estrelles de la bandera la XE van asitiaes sigún la normativa europea pal 2008.

  A la mandrecha de la imaxen aparez l’añu d´acuñación y la marca la ceca R. A manzorga, les iniciales de la diseñadora Daniela Longo (D.L). 



     Tamién aparecen les iniciales de los grabadores acompañáes pola abreviatura INC :

M.A.C., Maria Angela Cassol nes monedes de 20 y 50 céntimos;

 LDS, Luciana De Simoni nes d’1 y 2 céntimos;

  

ELF, Ettore Lorenzo Frapiccini nes de 5 céntimos y1 euru;

M.C.C., Maria Carmela Colaneri nes de 10 céntimos y 2 euros,

Sée Vacante (2013)

    L’11 febreru del 2013 Benedictu XVI anunciaba la so renuncia como papa a partir de les 20:00 hores del día 28 febreru. El 13 marzu los cardenales elleutores escoyeron a Jorge Mario Bergoglio como papa Xicu I. El periodu ente los dos acontecimientos foi marcáu como Sée Vacante y presidíu pol Camarlengo Tarcisio Pietro Evasio Bertone. Nun se sacó una serie de monedes sinon que se fexo una moneda conmemorativade 2 euros  como testimoniu (el Reglamentu (UE) n^u 566/2012 nun permite emitir series de monedes en períodos d’interregnos, gobiernos provisionales o sées vacantes).

Cuarta Serie (2014-2016)

     A pesar del monótonu tema del tipu (en toes aparez el Papa Xicu), esti conserva l’esquema 2-3-3 al variar los diseños ente monedes d’un mou más apreciáu que nos anteriores casos. Alredor del bustu aparez el nome del país emisor: CITTA’ DEL VATICANO. A mandrecha la efixe aparez la marca la ceca R y l’añu d’emisión. Les marques del diseñador tan a mandrecha nos tres diseños, y les marques del grabador a manzorga. Alredor, les 12 estrelles de la bandera la XE.

     Nos céntimos piquiños el Papa aparez mirandu a manzorga; el diseñu ye de Gabriella Titotto (G. TITOTTO) y foi grabáu por Ettore Lorenzo Frapiccini (ELF INC.)

     Los céntimos mayores, con vista’l frente, son obra de la diseñadora Orietta Rossi (O.ROSSI) y la grabadora Luciana De Simoni (LDS INC.)

     Los euros, con xiru de ³/₄  a mandrecha, tan diseñados por Patrizio Daniele (P. DANIELE) con Maria Carmela Colaneri (MCC INC.) como grabadora.

Quinta serie (2017- )

     Xicu I sigue frayando esquemes. Si na so primer serie xiraba’l so bustu a un llau o a otru según el valor de la moneda (faciendo un esquema 2-3-3) agora da-y por sacar una nueva serie de monedes cola monotema del so escudu colos atributos que lu identifica como soberanu del Estáu de la Ciudá del Vaticanu. 

     Dientro l’escudu, y con fondu azul, aparez na parte cimera’l símbolu de la Compañía de Xesús, Orde relixosa a a que pertenez el papa Xicu; ello ye un sol rellumante y flameante coles lletres bermeyes IHS, monograma de Xesucristu adornáu con una cruz y unos clavos al so pie. Baxo’l sol aparecen una estrella, símbolu de la Virxe María y de la Ilesia, y una flor de nardu, símbolu propiu de San Xosé, patronu de la Ilesia Universal (o seya, l’escudu aconceya a La Sagrada Familia). La estola sol escudu lleva’l so llema: Miserando atque eligendo (Mirolu con misericordia y escoyolu) recoyía d’una homilía de San Beda’l venerable. Los atributos papales van representaos pola mitra con estoles bermeyes y les llaves d’oru y plata de San pedru.

     El restu del diseñu complétase col nome del país emisor CITTA’ DEL VATICANO, la marca de la ceca de Roma, R y l’añu emisión. Too ello va arrodiao poles doce estrelles de la Xunión Europea.

Enllaz: 2 euros conmemorativos vaticanos