Primer serie (2002- )
Sanmarín alcuéntrase llegalmente nuna
xunión monetaria con Italia, polo que tién drechu a qu’esti país –y acuñe una
cantidá determináo de monedes. Poro, la ceca encargada de les acuñaciones ye la
de Roma.
Les monedes d’euru de Sanmarín foron
diseñaes pol artista Frantisek Chochola y representen principalmente los
monumentos del país. En toles monedes aparez la identificación del país emisor:
SAN MARINO y la lletra R de la ceca. Aparecen tamién
les iniciales del diseñador (Ch) y les del
grabador Ettore Lorenzo Frapiccini (ELF)
xunyu a l’abreviatura INC (que puede ser d’INCISORE, grabador n’italianu, ó
INCIDIT, grabolo en llatín). L’añu qu’aparez na impronta ye´l d’emisión, poro,
les primeres monedes daten del 2002.
1, 2 y 5 céntimos
Na moneda d’1 céntimu aparez la Torre de Montale del sieglu XIV.
Montale ye’l más piquiñu de los tres picos del Monte Titano. Nel so cumal eríxese
una de les tres torres qu’aparecen tanto na bandera nacional como nel escudu d’armes
de Sanmarín. Alredor del diseñu van les 12 estrelles de la XE.
Na
moneda de 2 céntimos aparez la Estatua
de la llibertá (1896) del escultor Stefano Galletti y asitiada nel centru
de la Piazza della Libertà de Sanmarín. Alredor del diseñu van les 12
estrelles de la XE.
Na moneda de 5 céntimos aparez la Torre de Guaita o Rocca. La fortaleza
de Guaita ye la más antigua de les tres torres construyíes nel Monte Titano.
Foi fecha nel sieglu XI y usose como puestu de guardia y prisión. A manzorga,
puede vese otra torre más baxa, ye la Torre
Campanaria, nomada asina por abeyugar una campana nomada el Campanone. La Guaita ye una de les tres torres qu’aparecen tanto na bandera
nacional como nel escudu d’armes de Sanmarín. Alredor del diseñu van les 12
estrelles de la XE.
10, 20 y 50 céntimos
Na moneda de 10 céntimos aparez la Basílica de Sanmarín, del sieglu XIX,
fecha enrriba les ruines d’una ilesia anterior dedicada tamién al patrón del
país. Nel so intre tan los restos del santu. Alredor del diseñu van les 12
estrelles de la XE.
Na moneda de 20 céntimos aparez el detalle
principal de la pintura Sanmarín
diáconu, del pintor de Cento Bartolomeo Gennari. Esti santu. D’orixe
croata, vivió haza’l sieglu III d. X. Foi a trabayar al monte Titano como
canteru y finó fundando ellí una ilesia dedicada a San Pedru. Alredor del
diseñu van les 12 estrelles de la XE.
Na moneda de 50 céntimos aparecen les Tres Torres o Les Fortaleces de Sanmarín. La primera ye la Guaita (o Rocca), del sieglu XI y con muria almenada.
La segunda ye la de La Fratta (o la Cesta) del sieglu XIII, ye la más alta les
tres y acueye’l Museu de les Armes Antigües. La última ye la Torre Montale del
sieglu XIII y tá separtada de les otres. Alredor del diseñu van les 12
estrelles de la XE.
1 y 2 euros
La moneda d’1€ tién como motivu l’escudu d’armes oficial de la Serenísima
República de Sanmarín. Nel centru los tres montes coles tres torres y tres
plumes d’avestruz enriba. La corona cimera ye símbolu de soberanía. Cañines de
lloréu y carbayu arrodien l’escudu, finando so elli con una estola cola pallabra
LIBERTAS (llibertá). Alredor del diseñu van les 12 estrelles de la XE.
La moneda de 2 € reproduz el Palazzo Pubblico (1884-1894), diseñáu
pol arquiteutu romanu Francesco
Azzurri. Fai de Casa Conceyu de la Ciudá a la par que d’edificiu oficial del
Gobiernu de Sanmarín. Equí tienen llugar les ceremonies oficiales del estáu y
ye tamién la sée de les principales instituciones asina como de l’alministración
de la república: los Capitanes Rexentes, el Conseyu
Grande y Xeneral, el Conseyu de los Doce y el Congresu d’Estáu. Alredor del
diseñu van les 12 estrelles de la XE.
Nel cantu la
moneda de 2 euros aparez la repetición típica del 2 y la estrella:
Enllaz: 2 euros conmemorativos sanmarinos
No hay comentarios:
Publicar un comentario