 |
| Una perrona de 1870 |
Alcuérdome de bien mozu, cuando
mio pá me falaba de reales, perrines y
perrones. “Una peseta son cuatro reales”,
decíame elli. ¡Reales! ¿Qué yeren reales?; pues yeren unes monedes que circulaben pel Estáu español enantes de l’aparición de la peseta en 1868 y cuyu
cambiu foi afitáu pol gobiernu de la época en: una peseta igual a cuatro reales. “Una perrina son cinco céntimos y
una perrona diez”. ¡¿Céntimos?!; ¡¿perrines y perrones?!. La peseta dixebábase en cien céntimos,
fraición que tovía me tocó ver, pero apenes emplegar, ya que foron desaniciaos
bien llueu de la circulación, en plena Transición democrática y que los nuesos
mayores tamién tornaben a reales: "un real, veinticinco céntimos; dos reales,
cincuenta". ¡Ah!, y perrines y perrones yeren los nomatos colos que conocíen a les monedes de 5 y 10 céntimos de 1870, pol llión grabáu n’elles (la xente decía qu’asemeyaba más a una perra qu’a un llión). Col pasu del tiempu, el diseñu de los tipos foron camudando delles vegaes, pero’l nomatu caltúvose.
¿Y falar en duros? Un duru yeren cinco pesetes, polo que nun yera un res
abegoso falar de cinco duros, diez, veinte (les cien pesetes), cuarenta, o mil
duros (el billete cinco mil pesetes)... ¡Qué bien se mos daba la tabla
multiplicar del cinco!
Magar que nun lo paeza, l’apaición de la peseta foi
daqué revolucionario pa la época. Nació nun momentu revoltosu de la nuesa
hestoria y de la man d’un Gobiernu Provisional (y ya se sabe qué típico español ye eso de facer una chapucina
“provisional” pa que llueu seya definitiva). Mas la chapucina nun salió un res
mal: finó colos na menos que cuatro sistemes monetarios que furrulaben
en Las Españas d’Isabel II y, sobre too, averomos a Europa al adoptar el
novedosu "inventu" francés nomáu Sistema Métricu Decimal.
Pues sí: durante’l reináu d’Isabel, la 2ª,
inda circulaben pel Estáu español una triba de monedes englosaes en cuatro
sistemes monetarios basaos nel maravedí, el real, l’escudu y, pa Catalunya, el cuartu. Un auténticu enguedeyu pa la población, si tenemos en cuenta tolos
múltiplos y submúltiplos a manexar en ca sistema (hasta ventiún), asina como
les equivalencies ente ellos a la hora cambiar de divisa. Pa muestra, un botón:
Un escudu de plata equivalía a 10 reales
de vellón, o a 5 reales vieyos, o a 340 maravedinos.
Tamién había delles Cases de la Moneda o
ceques: Sevilla, Segovia, Barcelona, Madrid… que daben serviciu a tol
territorio nacional, lo que dificultaba el control de falsificaciones.
Per aquellos tiempos, los países
europeos ya se rexíen polos dictaos de la Xunión Moneteria Llatina, qu'ente
otres coses, impuso’l Sistema Métricu Decimal como base pa l’actividá económica,
asina como una triba normes pa que los países formantes de la Xunión acuñaren
monedes equivalentes. Esti sistema
entraría tamién n’España y sedría factor decisivu pal nacimientu de la nueva
moneda.
L’orixe del nome
A ciencia cierta, nun se sabe bien
l’orixe del nome peseta. Dellos investigadores atribúinlo a les pallabres piecette, en francés o pezzeta, n’italianu, anque la teoría más
fiable ye que’l so orixe tea na pallabra catalana peçeta (piecina), diminutivu de peça (pieza). Dende’l sieglu XV venía usándose de nomatu pa
les monedes de plata. Nel sieglu XVIII, denominaben asina a los reales d’a dos
de plata en Catalunya, y depués, a los reales d’a cuatro de vellón. Ensin embargu, el diccionariu de la RAE defiende’l so orixe como diminutivu del términu peso.
Al entamu del sieglu XVIII, durante la Guerra de
Sucesión (1705-1714), el pretendiente al tronu de los Austria, l’archiduque
Carlos, fexo acuñar en Barcelona inxentes cantidaes de reales d’a dos que, una
vez ocupada Barcelona pol vencedor, Felipe d’Anjou, inundaron el territoriu
castellán onde se popularizó la forma escrita "peseta" del vocablu catalán. Una Pragmática con fecha 13 de xunetu de 1718, ye’l primer documentu oficial que fai
referencia a la peseta. Venti años más tarde, el Diccionariu d’Autoridaes de 1737 define la peseta
como "la pieza que val dos reales de
plata de moneda provincial, fecha en forma redonda. Ye voz modernamente
introducida".
Les primeres monedes col nomatu
peseta
Les primeres pieces cola pallabra
peseta grabada apaecieron durante la
Guerra d’Independencia (1808-1814) na ceca de Barcelona y por mandáu del rei
Xosé I Bonaparte. Yeren pieces en plata d’1, 2½ y 5; la de 20 pesetes yera
d’oru. Ye tamién la primer vez que s’emplega’l castellán n’acuñación de
monedes en llugar del llatín.
 |
| Pesetes de plata de Xosé I Bonaparte (Barcelona) |
 |
| 20 pesetes d’oru. Xosé I |
El bandu español tamién acuñó pesetes; dafechu, la primer moneda foi
acuñada en Girona durante’l so asediu poles tropes franceses.
 |
| Duru de Girona (1808) |
Vién troquelada
col valor de un duro, en vez de cinco
pesetes, xunto a la ceca y proclama a Fernandu VII como rei d’España. La
moneda de cinco pesetes heredó’l nomatu de duru
por ser d’igual módulu y pesu que los antiguos rales d’a ocho, conocios n’América como pesos duros.
 |
| 5 pesetes. Tarragona (1808) |
Nos asedios de Lleida y
Tarragona tamién s’acuñaron monedes por valor de 5 pesetes.
 |
| 5 pesetes baleares (1823) |
Años más tarde, inda s’acuñaríen monedes de 5 pesetes, como nes Islles
Balears.
 |
| Peseta d’Isabel II (1836) |
Nos años 1836 y 37, la recién coronada reina Isabel II acuñó pesetes en
Barcelona pa pagar a les tropes institucionales que llucharon na primer Guerra
Carlista; a los soldaos-mercenarios que llucharon al llau de la reina,
nomáronlos posteriormente peseteros.
Como vemos, toes estes monedes de peseta foron acuñaes en Catalunya o nel so área d’influyencia, lo que mos demuestra que ciertamente yera una pallabra perusada n’estos países, fincando asina la teoría catalana del orixe del nome.
En 1868 Isabel II abandona el tronu español y el nuevu gobiernu, conocíu
nos llibros d’historia col nome de Gobiernu
Provisional (hasta la llegada d’un nuevu rei o reina), ye l’encargáu de
poner en marcha el proyeutu de la nueva moneda que va tar con nós a lo llargo
133 años, hasta la llegada d’una nueva moneda, l’euru.
Les dixebres estayes poles que pasó la peseta, colos sos consiguientes
cambios, puen concentrase nun llistáu tal qu’asina:
- Amadéu I
Magar d’esta dixebra, hai otra triba de subdixebres dientro los propios periodos, nomaos Series, y que nun son más que cambios nel tipu de la moneda acuñada, según van camudando dellos aspeutos de la vida (avieyamientu del Xefe d’Estáu, fabricación de monedes con nuevos metales o aleaciones, nuevos diseños...). Cuando espublice les estayes, diremos viendo les series.
No hay comentarios:
Publicar un comentario