Entamu. A mou Presentación

     Decíen los nuesos antepasaos que les Ayalgues yeren riqueces escondies polos moros. Otres vegaes, yeren rapacines (princeses) encantaes y con riqueces, que vivien, o taben prisioneres, en cueves. Y pa finar, el maxín astur completó’l cuadru con un Cuélebre, que facía de guardián de l’Ayalga.

  Representación d'un cuélebre na Ilesia de San Meteriu de Sietes (Villaviciosa) añu 1555. Semeya d'Ástur Paredes

       Aprovechando esti pequeñu enguedeyu de la bayurosa Mitoloxía Asturiana, naz el nome (o títulu) d’esti Blog: L’AYALGA DEL CUÉLEBRE. 

     Y cuando ún fala d’ayalgues, fala de perres, de monedes (y billetes); poro, ideal pa la tema a tratar n’esti cuadernu: el colleicionismu de monedes, que suel nomase, un pocuñín a lo xole, Numismática. Y nun ye lo mesmo, non. Nun ye lo mesmo facer una colleición de monedes (o cromos, o chapes de cerveza, o etiquetes de sidre...) que dedicase a la Numismática, que ye una estaya científica de la Historia nacía precisamente pa descubrimos dellos retayos del nuesu pasáu a traviés de la observación y estudiu d’estos prestosos discos metálicos. 

     Ye verdá: el subtítulu del Blog ye Blog Numismáticu, y suena daqué pretencioso, pero ye que, aparte de que suena meyor que Colleición de Monedes (o daqué asemeyao), tamién va haber un migayín d’estudiu, dalguna qu’otra curiosidá y dellos datos específicos de cada moneda, polo qu’esti Blog nun va ser una mera llista de países y valores, magar que tampoco va ser un fonderu estudiu académicu, sinon que va ser una escoyeta datos, de caleyar per casa, pa esclariamos dalguna dubia o curiosidá que mos faga mirar pa eses perruques sueltes que llevamos pel bolsu’l pantalón con más atención.

 

      La idega primera ye facer un blog dedicáu a la vieya moneda que circulaba pel Estáu español enantes de la entrada de la nueva moneda europea, la peseta. Pero tamién un percorríu pola nueva divisa nomada euru. Más alantre ya veremos, si sacar monedes antígües, idees pa curiar la nuesa colleición... hai tanto.... y tan pocu tiempu... ya veremos.

 

 

 

     La idega sobre la tema la peseta, ye la de facer una serie de capítulos bien definíos onde poder lleer daqué sobre’l momentu de la so acuñación (episodios históricos, reis...) pa llueu pasar a ver unes especificaciones propies del diseñu les monedes, xuntu a una llista de semeyes de les mesmes y un enllaz a una ficha téunica por moneda, onde poder identificar les lleendes, iniciales, ceques, años d’emisión y acuñación, variantes... vamos, un pocuñín más detallao.

     Tamién habrá un apartáu dedicáu a les Prebes: monedes que se diseñaron y acuñaron pero que nunca circularon.

     No referente a los euros, falaré un pocu de la so nacencia, especificaciones téuniques..., pa llueu pasar a la llista países emisores d’euru y falar de los sos diseños. 

 

     Casu y capítulu aparte van ser les monedes conmemoratives de 2 € que s’emiten, ya que son como un subgrupu con historia propia dientro del bayurosu mundu de la divisa europea.

     Pola falta tiempu, voi dexar pa prau les monedes conmemoratives d'oru y plata que salen tolos años (ya nel Estáu español son una bona duerna, asina que como pa meteme con toles europees...). Aunque nunca se sabe.

   

 

 

     Pa finar, espero que seya La Rede, cuan Cuélebre virtual, la encargada de caltener esti blog per secula seculorum magar que seya pal preste de los ayalgueiros y del mio mesmu.

     Y agora sí, preséntovos equí el primer Blog numismáticu en Llingua Asturiana. Que vos preste.

    

     PD. Almítese tou tipu de crítica siempres que seya constructiva y valga p’ameyorar esti proyeutu.