.jpg)
Tres el
derrocamientu de la reina Isabel II confórmase un Gobiernu Provisional, que ye’l
que toma les riendes d’actualizar España en materia monetaria. El 19 d’ochobre
de 1868, el Ministru de Facienda del Gobiernu del xeneral Serrano,
Laureano Figuerola, robla’l decretu pol que s’implantaba la peseta como unidá
monetaria nacional adscrita al Sistema Métricu Decimal nel contestu de la
Xunión Monetaria Llatina.
Centralízase
tamién la producción de monedes nuna sola ceca, la de Madrid, semiente de la
posterior Fábrica Nacional de Moneda y Timbre-Real Casa de la Moneda
(FNMT-RCM). La ceca Barcelona caltiénse solo pa la producción de monedes de
cobre.
La Xunión Monetaria Llatina
La Xunión
Monetaria Llatina nació en 1865, promovida pol rei francés Napoleón III, ante la
necesidá de xunir les monedes que circulaben per Europa dientro d’unos cánones
comunes no referente al valor, el pesu y la llei (les monedes d’antanu taben
acuñaes n’oru, plata y cobre). Tomose como referencia el francu francés, ya
qu’esti país foi pioneru n’Europa no que se refier al procesu d’erradicación de
los sos dellos sistemes numberarios, heriede del Antíguu Réxime.
La idega básica a
aplicar yera creyar una unidá monetaria propia en cada país (francu, llira…) y,
aplicando’l Sistema Métricu Decimal, dixebrar dicha unidá en 100 partes (céntimos o
centavos). Axuntaron tamién los valores a acuñar, bien nes dixebres decimales (1, 2, 5,
10, 20 y 50 ) bien en valores d’unidá (1, 2, 5, 10, 20, 50 y 100).
Teniendo en
cuenta que la mayoría de les monedes que s’acuñaben yeren d’oru, plata y cobre,
afitose tamién la llei a emplegar pa ca valor, a la par del pesu y el módulu (diámetru) de la pieza.
Y con esto, ya
tenemos una xuntanza monetaria europea. Podíes mercar n’otru país usando la
moneda del tuyu y viceversa... ¿Suénavos?
La nueva unidá monetaria española
España nun entró,
de factu, na Xunión, pero axustó la so nueva divisa a les normes d’ésta. Asemeyó la peseta al francu francés y dixebrola en
100 céntimos, afitando’l cambiu definitivu en 1 peseta igual a 4 reales de
vellón (y d’equí, esa manía de los nuesos mayores de falar en reales).
Poro, basándose
nes normes de la Xunión Monetaria Llatina, les monedes a acuñar, según el
Decretu de 1868, sedríen los siguientes 14 valores:
El tener esta llista valores nun quería decir qu’había qu’acuñalos toos; dafechu, nunca nun s’acuñaren monedes d’oru de cinco pesetes, ya ensin embargu, acuñáronse monedes n’esti noble metal con valor de 25 pesetes, valor que sedría esclusivu del caprichu español.
Cambia hasta l’escudu nacional
(Sic) “...
conviene olvidar lo pasado rompiendo los lazos que a él nos unían y haciendo
desaparecer del comercio y del trato general de las gentes, aquellos objetos
que pueden con frecuencia traerlo a la memoria.” Esto reza’l Preámbulu del Decretu la
peseta; poro, esi desaniciu del pasáu va vese tamién reflexáu n’acuñación de
les nueves monedes.
 | |
| Escudos de Carlos III ya Isabel II |
La principal diferencia márcala el
cuarteláu del escudu: nel hispánicu apaecen dos cuarteles de Castiella y dos
de Llión, col remate inferior del símbolu del Reinu de Granada y escudetu central
de la Casa de Borbón (tres flores de lis); nel d’España, dos de los cuarteles
integren les armes d’Aragón y Navarra, calteniendo la granada y eliminando
l’escudetu de los Borbones. La corona real del anterior escudu ye tamién
sustituyía por una corona mural (forma de castiellu con muria y torres). A
dambos dos llaos apaecen les Columnes d’Hércules xuníes con una estola cola
lleenda PLUS ULTRA, heriede de los Columnarios, los 8 reales de plata de
tiempos del Imperiu.
 |
| Escudu oficial de 1868 |
El nuevu escudu foi encargáu a la Real Academia de la
Historia pol nuevu gobiernu.
Les primeres acuñaciones (1869-1870)
Pa decidir los tipos que debíen apaecer nes nueves monedes, convocose un concursu internacional. Los proyeutos premiaos pal cobre, de Luis Plañiol y pal oru, de José Esteban Lozano, sirvieron de modelu pal diseñu definitivu del grabador xefe de la ceca española, l'italianu Lluis Marchionni , que ya trabayare nes caberes monedes d’Isabel II y que foi l’encargáu tamién del diseñu de les monedes de plata, al quedar desiertu esti premiu. Nes monedes de plata y oru vienen tamién troquelaes unes iniciales identificatives del Xuez de Balanza (l’encargáu de pesar el metal enantes y depués de la so acuñación) y los Ensayadores (siempre dos, qu’aseguraben el pesu y llei del metal de la moneda).
La peseta del Gobiernu Provisional (1869)
 |
| La Hispania d'Adriano |
La primer peseta de cursu llegal foi acuñada en 1869 baxo’l títulu de GOBIERNO PROVISIONAL. L’anversu ta inspiráu nuna moneda del emperador romanu Adriano del añu 127 d. C. y dedicada a la so provincia de nacencia: Hispania. Nel diseñu de Marchioni suponse qu’Hispania ta recostada sobre los Pirineos y a los sos pies ta’l Peñón de Xibraltar, como llendes del país.
Aparez tamién n’esta pieza un coneyu ente los pies de la dama, quiciás pola idega de qu’hispania ye una pallabra fenicia que quier decir “tierra coneyos”, según dellos etimólogos.
 |
| Una Peseta (1869) |
Les pesetes d’España (1869-1870)
Esi mesmu añu de 1869 la peseta camudó’l
títulu de GOBIERNO PROVISIONAL pol d’ESPAÑA, daqué revolucionario pa la época,
ya qu’enantes toles monedes se referíen al monarca de turnu colos sos títulos
d’HISP(ANIARUM) ET IND(IARUM) REX, o seya, rei de Las Españas y de Las Indias (poles provincies americanes). Isabel II foi la
única que grabó los títulos en castellán (reina de Las Españas solo, escaeciéndose
de les ya amenorgaes colonies).
Caltiense l’escudu nel reversu tal cual la primer peseta.
Caltiense l’escudu nel reversu tal cual la primer peseta.
Lo mesmo que
pasare nes caberes acuñaciones d’Isabel, dientro les estrelles identificatives
de la ceca va apaecer grabáu l’añu d’acuñación, calteniéndose namás que les
ceques de Madrid (la principal, cola so marca d’estrella de 6 puntes) y la de
Barcelona (pal cobre y cola so estrella d’ocho puntes)
Prebes pa los céntimos
Nos años 1869 y 1870 fixéronse 2 prebes pa les monedes de 10 céntimos que llueu nun s’acuñaren pa circular. Diseñaes por Plañiol, difieren principalmente del posterior diseñu pola orientación d’Hispania nel anversu y la pose del llión nel reversu. La preba de 1869 trae nel anversu el nome del diseñador PLAÑIOL, mientres que la de 1870 trae les iniciales del grabador Atanasio carrasco (A.C.). Les prebes foron fabricaes pola firma Oeschger, Mesdach y Cía., cuyes iniciales OM apaecen na preba de 1870.
Los céntimos definitivos
Les pieces d’1, 2, 5 y 10 céntimos son de cobre de 950 milésimes. La so fabricación contratóse cola firma Oeschger, Mesdach y Cía., cuyes iniciales, OM, van grabaes nes monedes, si bien la ellaboración de punzones, troqueles y viroles taba centralizao na ceca de Barcelona (la marca ye una estrella d’ochu puntes) enantes de xunise too en Madrid, y nun lleven grabáu l’añu d’acuñación.
L’anversu
ye Hispania como matrona sentada sobre los Pirineos y con Xibraltar a los
sos pies; agarra una cañina d’olivu na mandrecha y tién la manzorga llevantada. Nel reversu apaez el llión de les Cortes
llevantáu de los sos cuartos traseros mirando a mandrecha y que finca les pates
delanteres sobre l’escudu d’España con forma ovalada. El pueblu confundía’l
llión con un perru, polo que-y punxeron el nomatu de perrina (perra
chica en castellán) a la moneda de 5 céntimos, y perrona (perra
gorda en castellán) a la de 10. El Cantu
ye llisu.
1 céntimu
5 céntimos (Perrina)
10 céntimos (Perrona)
Les pieces de 20 y 50 céntimos son de plata de 835 milésimes y asemeyen nel diseñu a les pesetes de plata de 1869. Éstos foron acuñaos en Madrid. El Cantu ye estriáu.
20 céntimos
50 céntimos
Les Pesetes
N’esta estaya acuñáronse monedes con valor
d’1, 2 y 5 pesetes en plata. Les d’1 y 2 pesetes, con una llei de 835 milésimes,
siguieron acuñándose con esti tipu durante’l reináu d’Amadéu I y la I República
ya inclusu la de 2 pesetes fasta l’entamu del reináu d’Alfonsu XII. La de 5
pesetes acuñose con una llei de 900 milésimes.
1 peseta
Acuñáronse tamién namás que 12 monedes de 100 pesetes n’oru, con una llei de 900 milésimes, como preba. Detaca n’esta moneda el reversu, onde l’escudu d’España va arropiáu con simboloxía monárquica (corona, mantu y Toisón d’oru) daqué raro pa un réxime políticu de tipu revolucionaru que quería francer col pasáu, anque ye cierto que la Constitución aprobada poles Cortes en 1868, aparte de reafirmar el principiu de Soberanía Nacional, tamién reafirmaba el d’una Monarquía Constitucional.
100 pesetes
No hay comentarios:
Publicar un comentario