Escelente de la Granada

      1492 ye un añu que marca un puntu d'inflexón na hestoria del reinu de Castiella. La toma del caberu reinu musulmán de la Península Ibérica, Granada y el descubrimientu de nueves tierres, el Nuevu Mundu, por parte del mariñán Cristóbal Colón, permiten l'espoxigue d'esti reinu convirtiéndolu na nueva potencia comercial y, futuramente, militar d'Europa. Pa ello, no que se refier a la tema monetaria, Castiella debería abandonar la so tradicional dependencia de la métrica árabe y axustar la so divisa, el castellán o escelente, a la mérica ponderal d'Europa, marcada pol ducáu venecián. Equí xugó un papel perimportante'l rei Fernandu V, ya que na so tierrina, Aragón, ya llevaben bien de tiempu axustando'l so numberariu a lo mandao nel continente. 

Escelente

      A la muerte Enrique IV, Castiella yera un caos monetariu (ente otres coses). Isabel I, la so sucesora, tuvo d'encargase de la igua de tal enguedeyu. Pa ello contó cola inestimable ayuda del so maríu, Fernandu V, rei de Sicilia y futuru rei d'Aragón. Mientres que Castiella seguía acuñando según la metroloxía andalusí, Aragón ya fixere tiempu qu'axustaba les de so a les monedes dominantes nel Mercáu européu, los ducaos venecianos. El primer pasu foi axustar los cambios de les divises estranxeres na moneda del reinu, emplegando pa ello la so unidá de cuenta, el maravedí. Llueu, ente mayu y xunu de 1475, apeben l'acuñación de moneda nueva al so nome, afitando los valores y el diseñu a grabar n'oru, plata y vellón.

Xuana I y Carlos I

 

 

    En 1506 Felipe I y Xuana I pasaron a ser reis de Castiella, poro, el so primoxénitu Carlos, foi tituláu Príncipe d’Asturies como herederu de la Corona. Esi mesmu añu morrería el xoven rei y Fernandu d’Aragón, el Católicu, torna pa Castiella y declárase rexente del reinu en nome del so ñetu Carlos, inda menor d’edá pa garrar el cargu. Nun tuvo dificultá nenguna en desfacese de la so fiya Xuana; si enantes de la muerte Felipe ya taba catalogá de lloca, tres la muerte d’elli les acusaciones foron a más. Asina que Fernandu enzarrió a la so fiya nun palaciu de Tordesillas (Valladolid) y féxose col control del reinu hasta la so muerte nel añu 1516. Ensin embargu, la reina titular de Castiella, pa les Cortes castellanes, seguía siendo Xuana, polo que Carlos nun podría ser entronizáu con ella viva. Agora diba ser el fiu el que traicionare a la reina enplegando nuevamente la estratexa de la llocura. El 13 d’abril de 1516, Carlos ye tituláu rei de Castiella como Carlos I sí, pero xunto a so ma, que nun perdió’l títulu de reina, magar que fuere nominal,  hasta la so muerte en 1555 (Carlos I morrería en 1558, pero dende 1556 yera’l so fiu Felipe el que controlaba’l reinu, poro, práuticamente reinaron xuntos hasta la fin).

     Esto ye lo referente a Castiella, porque Carlos tamién heredó tolos reinos y territorios de so pá Felipe, el so güelu Fernandu y consiguió que lu escoyeran rei de los romanos pa llueu ser tituláu emperador del Sacru Imperiu Romanu Xermánicu. Muncho poder pa un solu home, y asina –y salieron milenta enemigos.

 

Fernandu V y Xuana I (1506-1516)

     Tres la repentina muerte del rei Felipe I, el 25 setiembre de 1506, el control del reinu pasa a manes del Cardenal Cisneros y el Conseyu Real. La reina Xuana, dolía pola perda del so maríu, nu atendía a razones de gobiernu, poro, nun yera posible nin tan siquier apellidar a Cortes, polo que se barruntaba un perídu d’inestabilidá. La solución final foi llamar de nuevu al defenestráu rei Fernandu V, el Católicu, valiéndose de les normes establecíes nel testamentu de la reina Isabel, que declaraba Gobernador de Castiella y los sos domeños a Fernandu, asina como rexente, en nome de la heredera Xuana I, si ésta anduviere ausente o incapacitada temporalmente pal cargu.

Felipe I y Xuana I (1505-1506)

 

     En 1495 los Reis Católicos casen a la so fiya Xuana con Felipe de Flandes. Enantes, la hermana de Felipe, Margarita, casárese con Xuan, fiu de los Católicos y herederu de los reinos de Castiella, Llión y Aragón. Por aquelles feches, Xuana yera la tercera na llínea de sucesión al tronu de Castiella. Ensin embargu, una filera de llamentables decesos, la muerte del Príncipe d’Asturies en 1497 ensin sucesores, la de la so hermana Isabel en 1498 y la del so sobrín Miguel de la Paz (fíu d’Isabel y Manuel I de Portugal, y herederu de los tronos de Castiella, Aragón y Portugal) en 1500, fixeron que Xuana pasare a ser Princesa d’Asturies y heredera del reinu de Castiella.

     Y entama l’enguedeyu sucesoriu. Enantes de morrer, y viendo la situación, Isabel I dexa escrito, bien nidio, que la reina sucesora de Castiella yera Xuana, otorgando al so maríu Felipe la condición de rei consorte y dexaba la de rexente al so maríu Fernandu en casu d’ausencia de Xuana. El 26 de payares de 1504 muerre la reina Isabel, Fernandu proclámase rexente de Castiella y a la so fiya Xuana, reina. Un añu más tarde, el 24 payares de 1505, roblarase La Concordia de Salamanca, onde se-y reconoz a Felipe’l títulu de rei n’igualdá cola so esposa y Fernandu pasaría a ser Gobernador perpétuu. Equí, al paecer, la reina Xuana ya daba señales de llocura, polo que nuna cláusula extra, dexose bien nidio que’l reinu diba ser gobernáu por Felipe y Fernandu xupliríalu na so ausencia. Como a Felipe tampoco –y  prestó un res lo roblao, embarcó nel mes de xineru de 1506 camín de Castiella cola so muyer, onde namás posase en A Coruña, foron recibios pola mayoría de los nobles castellanos y proclamaos reis de Castiella y Llión. Felipe y Fernandu ya nun se podíen nin ver, polo que l’aragonés finó renunciando al tronu de Castiella y colando pal so reinu, tres la robla de les capitulaciones de Benavente y Villafáfila en xunu de 1506. Felipe foi proclamáu rei de Castiella y Llión Iure Uxoris nes Cortes de Valladolid como Felipe I, Cortes que, por ciertu, se negaron a declarar incapaz a la reina Xuana por llocura, lo que nun esmoleció al Austria, qu’entamariá a gobernar el reinu al so preste. Poco disfrutó Felipe I de la so nueva posición como rei de Castiella y herederu al tronu d’Aragón, ya qu’a finales de setiembre d’esi mesmu añu de 1506 morrería en Burgos a la edá de 28 años. La causa de la so muerte, foi siempres un misterio ¿envenenáu por orde de Fernandu? ¿dalguna afección pulmonar tres xugar a la pelota nun espaciu fríu de la ciudá? ¿enfermedá venérea pola so afición al muyeríu?... Les caberes investigaciones apunten a la Peste, enfermedá qu’asoló la ciudá esi branu.

Numberariu de los Reis Católicos (1474-1502)

     Enrique IV dexa un desastrosu enguedeyu monetariu en Castiella: constantes devaluaciones, escesu de ceques ensin control, acuñaciones con una llei probetaya, bayura de monedes falses… y sobremanera, l’enfadu xeneralizáu de la población. Cola xuba de los Reis Católicos (Isabel I y Fernandu V) al tronu, entamará un procesu renovador que, bien lluéu, fadrá que la divisa castellana seya de les más fuertes d’Europa y, col pasu los sieglos, del mundu.

 

     Les monedes físique que circulaben per Europa taben feches d’oru, plata, vellón (plata con cobre) o simplemente cobre. L’intercambiu de monedes ente países por cuenta’l mercadéu o pagos de soldaes, principalmente a mercenarios estranxeros, obligaben a tener una referencia monetaria pa calcular el valor dau a ca divisa y facer asina los cambios al numberariu llocal. Pa ello emplegábase lo que denominamos una “moneda de cuenta”, esto ye, una ficticia a la que da-y un valor col que poder devaluar o implementar el valor d’una pieza d’oru o plata, según el preciu nel mercáu de dichos metales nobles, asina como según la pureza (llei) de la mesma. Nel casu de Castiella, la moneda de cuenta foi’l maravedí.

 

     Lo primero que fain los reis, ye afitar unos precios y cambios acordies a la realidá del momentu, quedando los cambios de les monedes del momentu de la siguiente manera según la Carta de Precios del 20 febreru de 1475, fecha en Segovia: