L'AYALGA DEL CUÉLEBRE: La Catalunya napoleónica

Catalunya siempres foi platu aparte; perteneciente a España y cobiciada por Francia, foi’l primer territoriou peninsular en ser ocupáu y el caberu en ser lliberáu. Napoleón Bonaparte naguaba por recuperar les vieyes llendes carolinxes na Península Ibérica. Poro y según los alcuerdos de Bayona roblaos en mayu de 1808, l’emperador reservábase pa so, el control direutu, dende París, de los territorios al norte del ríu Ebro, dende Guipuzkoa a Catalunya. Esto nun –y prestó un res al so hermanu y futuru rei Xosé I d’España, el cual exisía reinar nuna España coles sos llendes tradicionales. Napoleón, que facía lo que-y daba en gana, nomó Gobernadores pa Guipuzkoa, Nafarroa, Aragón y Catalunya, dexando bien nidio que solo rendiríen cuentes ante elli, de mou confidencial, y que los impuestos cobraos diríen direutamente a les arques de los exércitos d’ocupación. No referente a Catalunya, asignose el so Gobiernu al mariscal Augereau, que venía ya con una serie premises dictaes pol emperador: crear una alministración provisional, xuplir la enseña española pola catalana y la francesa, declarar oficial la llingua catalana, vetar toa intromisión del rei d’España (Xosé I) y los sos ministros na zona (lo cual nun foi dificultoso, ya que les comunicaciones ente Barcelona y Madrid taben frañaes dende l’entamu la invasión) y encarrilar el braeru proyeutu imperial de “obrar cola idega que quiero xuntar esta provincia a Francia”. P’Angereau los catalanes yeren “los franceses d’España” polo qu’empapó la so xestión d’un catalanismu cuasi nacionaliegu (Patria catalana, actes del Ayuntamientu en catalán, lo mesmo que’l “Diario de Barcelona” que pasó a ser “Diari de Barcelona”). Esti catalanisnu duró bien poco, pues Augereau foi xuplíu pol mariscal Macdonald, el cual recuperó el castellán como llingua vehicular xunto col francés y se centró na tema militar y de la loxística, cola fin d’ocupar tol territoriu catalán, afrancesalu y facilitar asina la so anexón a Francia. En marzu de 1810 Angereau entraba en Barcelona y meses más tarde yera xuplíu por Macdonald, en 1811 dábase por concluida la ocupación de Catalunya (les sos capitales, porque la zona rural yera incotrolable) y en 1812 dábense los primeros pasos pa l’anexón francesa, cola dixebra del territorio en cuatro Departamentos y delles modificaciones alministratives. A partir del 1813, les coses tornáronse pa los franceses; n’agostu d’esi añu, un exércitu anglo-español recuperaba Tarragona y sitiaba Barcelona, que nun cayó hasta’l 28 mayu de 1814 (depués de la primer abdicación de Napoleón, n’abril y dos selmanes depués de la llegada de Fernandu VII a Madrid). Foi la cabera plaza en ser abandonada pol exércitu francés.

¿Quién mandó acuñar les monedes franceses en Catalunya?

…Y “nació” la primer moneda física con nome “peseta”. Pues sí, Barcelona tién l’honor d’acuñar les primeres pesetes. Dende hai tiempu, en Catalunya conociase a la moneda de cuatro reales de vellón como peçeta, que derivó al castellán como peseta tres la Guerra de Sucesión (1701-1714). Y polo que se ve, nació, físicamente, de la man de los franceses. Pero ¿quién ordenó tales acuñaciones? Nes pieces nun apaez identificación nenguna d’autoridaes y pa enriba, la lleenda vien en castellán. Na mayor parte de cartafueyos numismáticos, asina como de páxines web especializaes, estes monedes apaecen asignaes a Xosé Napoleón I, pero, según lo mentao anantes, Xosé I nun gobernó Catalunya de factu, dafechu, el rei percorrió Castiella y Andalucía nes sos campañes militares, a la so entrada y salida del país fincose en Vitoria y pasó la frontera por Hendaya, pero enxamás pisó tarrén negún del vieyu Reinu d’Aragón, territorio controláu direutamente pol emperador a traviés de Gobernadores. El primer Gobernador de Catalunya foi el mariscal Augereau, pero nun entró en Barcelona hasta marzu del 1810, mientres qu’estes monedes entamáronse a acuñar ya dende 1808, añu en que les primeres tropes franceses entraben en Barcelona. ¿Y pa qué la so acuñación? Sábese que Xosé I acuñó moneda propio nes ceques de Madrid, Sevilla y Segovia, territorios que controlaba, más o menos, pero Catalunya taba lloñe y aislada, ensin comunicación cola corte española, dafechu, yera más fácil comunicase dende Barcelona con París. Sábese tamién que Barcelona yera la única capital catalana controlada polos franceses de primeres (la entrada foi pacífica, al engañar a les autoridaes catalanes cola escusa de que diben anular un desembarcu inglés en Andalucía). Hasta 1809 nun cayeron les otres tres capitales de provincia. Poro, ye de suponer que tales acuñaciones fueren de tipu local y de necesidá, ante l’aisllamientu de la ciudá y la falta de moneda nacional (lo que nun sedría raro, ya que nes ciudades sitiaes de Girona y Tarragona, acuñáronse duros o cinco pesetes de plata a nome de Fernandu VII, pola mesma necesidá).

Duru de Girona (1808) y cinco pesetes de Tarragona (1809)

Sedría’l xeneral francés Philibert Guillaume Duhesme, el que mandare batir numberariu, siendo el capitán xeneral de Cataluña, José Manuel de Ezpeleta, designáu pol rei Carlos IV y que taba na ciudá a la llegada de les tropes, de man, aliaes, l’encargáu d’abrir la ceca barcelonesa tres la convocatoria d’una Xunta el día 20 d’agostu, compuesta pol Real Alcuerdu, El Caballeru Intendente, la Xunta de Moneda y l’Ayuntamientu de la ciudá. Cola so apertura, autorizábase a tolos ciudadanos convertir les sos xoyes y cacía d’oru y plata en moneda provincial d’igual pesu, llei y tamañu que la moneda acuñada en Madrid. Precisamente pola so condición de provincial, nun facía falta indicar autoridaes emisores, nin identificaciones nacionales, tan solo da-y un valor nominal, d’alcordies col so conteníu en metal noble y que tol que lo emplegare s’afayare d’inmediatu (la idega inicial yera esparder les monedes per tol Principáu catalán, pero na práutica nun pasó de la Ciudá Condal). Polo que se ve, en Catalunya afayábense meyor a falar en pesetes y cuartos que’n reales.

En resume, pue asegurase que son monedes de necesidá, d’esclusivu emplegu pa Barcelona, acuñaes na ceca d’esta ciudá y dientro del periodu napoleónicu de Catalunya.

Pesetes…

Les pesetes barceloneses foron acuñaes n’oru y plata, siendo los valores acuñaos 1, 2 ½ y 5 en plata, y 20 n’oru. Los tipos son semeyos pa toes, un anversu onde apaez el valor facial con dellos ornamentos florales y la lleenda EN BARCELONA col añu acuñación. Nel reversu bien l’escudu la ciudá lloreáu. Les primeres monedes ya apaecieron en 1808, siguiendo la so acuñación hasta’l caberu añu de la retirada francesa, 1814 (les de Xosé I, finaron en 1813, añu nel que se retiró de Madrid a Vitoria).

Peseta

2 pesetes y media

5 pesetes

20 pesetes

Metal	Llei (mlm)	Valor (pesetes)	En reales	Pesu (g)	Diámetru (mm)
Oru	875	20	80	6,64	22
Plata	903	5	20	27,00	39
	903	2 ½	10	12,00	32
	812	peseta	4	5,80	26

Tabla metrolóxica de les pesetes y equivalencia en reales

… Y quartos

En Catalunya yera percomún, ya dende’l sieglu XV, denominar quarto (cuartu) a la moneda de cuatro maravedinos. Ensin embargu, nunca nun s’acuñare moneda nenguna con esta denominación hasta esta época. Feches tamién na ceca Barcelona y de cobre, acuñáronse pieces con valores d’½, 1, 2 y 4 quartos, con unos tipos asemeyaos a los de les pesetes.