Tres la muerte de Fernandu VII en 1833, xube al tronu español la so fía María
Isabel Luisa de Borbón y Borbón-Dos Sicilias col nome d’Isabel II y tan solo
tres años (menos 11 díes). De magar, foi so má María Cristina de Borbón-Dos
Sicilias la rexente del reinu hasta 1840, añu na que foi suplía pol xeneral
Espartero, qu’a la so vez foi obligáu a abandonar el cargu en 1843, pasando
esti a ser controláu por un Gobiernu provisional hasta la mayoría d’edá de la
reina a los 14 años (bono, realmente tenía 13 pos el Gobiernu decidió
proclamala reina en 1843, un añu antes). Esto nun –y prestó un res al so tíu
Carlos María Isidro, pretendiente elli al tronu tamién, asina que dende 1833 y
hasta 1840, anduvo en guerra escontra la so sobrina, fechu conocíu anguañu como
Primer Guerra Carlista. Tres un reináu llongu pero enllenu de griesques
coloniales, corrupción política y económica y un escasu despegue modernizador
del país, Isabel foi depuesta pola Revolución de 1868, conocía col nomatu de La Gloriosa, qu’orixinó la llegada d’un
Gobiernu Provisional. La reina coló pa París (Francia) y nun tornaría más;
morrió ellí en 1904.
