(Sic) “…Españoles; reuníos todos; ceñíos a mi Trono; haced que disensiones intestinas no me roben el tiempo, ni distraigan los medios que únicamente quisiera emplear en vuestra felicidad". Bandu real fecháu en Vitoria el 12 xunetu de 1808, al poco d’entran na Península y que proclama la so designación como "Rey de las Españas y de las Indias".
Pues eso, Giuseppe Napoleone Buonaparte, hermanu mayor del bien famosu emperador francés Napoleón Bonaparte, foi designáu como rei d’España pol so hermanu, tres el refugu de los otros dos hermanos, primeros candidatos escoyíos pol emperador pal cargu, a saber, Lluis (rei d’Holanda) y Xerónimu (rei de Westfalia). Xosé yera rei de Nápoles y taba faciéndolo perbien allá, pero decidió camudar la corona de la so tiesta, práuticamente obligáu.
Sobre la fortuna del reináu d’esti home, percorrieron gran bayura de chistes, chances y postures patriotes estremaes, qu’eclipsaron la realidá del suxetu. Anguañu, los historiadores anden tous d’alcuerdu en qu’España perdió un bon rei y una oportunidá única pa, de verdá, ser una nación avanzada y puntera n’Europa. Pero caro, eso vémoslo güei y non nel momentu. Per aquellos tiempos, Napoleón fexo abdicar al rei d’España, Carlos IV y al so fíu, el príncipe d’Asturies Fernandu, pasando la corona al so poder, pa llueu cedésela al so hermanu Xosé. Eso foi’l 5 mayu, trés díes depués del alzamientu del pueblu de Madrid escontra los ya ocupantes del país. Hasta finales de xunetu Xosé nun llegó a la so nueva corte, lo que facilitó, n’esi periodu d’interregnu, que los españoles s’aconceyaren en Xuntes Provinciales ya fixeren frente al invasor, consiguiendo una más qu’alzamoral vitoria en Bailén. El rei fuxó pa Vitoria y l’emperador entró a sacu nel país. Resultáu, mayor control al so hermanu mayor, que nun pudo facer les reformes que tenía preparaes y descontrol de los xenerales franceses pe lterritoriu nacional, mangoneando al so preste, pasando del rei y col parabién del emperador. L’incrementu del odiu haza los franceses taba bien ganáu. Xosé I entró en 1808 pa ser rei y hebo de salir en 1813 escorríu pel duque de Wellington. L’11 payares d’esi mesmu añu, Napoleón vengose de los españoles proclamando rei a Fernandu VII (qué caro díbemos pagalo y seguimos pagando).
El numberariu del rei
La revolución francesa traxo una innovadora ferramienta, güei bien conocida y emplegada, nomada Sistema Métricu Decimal. La fabricación de moneda, nun diba escapar al novedosu sistema y na Francia revolucionaria impondríase’l francu como unidá monetaria, desaniciando tolos demás sistemes imperantes nel denomináu Antíguu Réxime. Poro, allá onde llegaren los exércitos de Napoleón, allá s’implantaba el nuevu sistema, tomando como referencia monetaria al francu francés. Otra cosa foi España. Los fuertes raigaños del sistema español, basáu nel escudu pal oru y el real pa la plata, asina como la so reconocencia como divisa internacional, fexo que’l nuevu monarca optare por una reforma intermedia: caltener les medíes de la pieza, pero camudar los valores impresos n’elles. Asina, a traviés d’una Orde datada el 18 d’abril de 1809, nes monedes d’oru desapaecía la denominación tradicional d’escudos pasando a ser identificada en reales, unificándolos asina coles monedes de plata. La unidá de cuenta emplegada pa tala modificación foi la del real de vellón, qu’inda se usaba pa calcular cambios y equivalencies nel reinu. Salvaríase solamente la moneda cobre, que seguiría nomándose maravedí.
Les ceques encargaes de la so acuñación sedrán les de Madrid, Segovia y Sevilla, apaeciendo les sos marques nes monedes: M coronada, S y acueductu (pa Segovia).
L’oru
Les monedes d’oru son les que sufren el cambiu más detacáu, la pieza d’ocho escudos, conocía popularmente como onza, pasa a identificase col valor de 320 reales y la de dos escudos, como d’80 reales.
Detacar nos sos diseños que la d’80 reales tién dos tipos dixebros, nes primeres acuñaciones, de 1809 y 1810, apaez un bustu real ensin ornamentu nengún, ensin embargu, nes posteriores, del 1811 al 1813, apaez con una diadema de llazu na nuca, emplegáu tamién nes acuñaciones de los 320 reales. Polo demás, salvo lo referente al valor y metroloxía, ye too igual. Nel anversu, llindiando’l bustu, apaez la lleenda IOSEPH NAP(OLEONE) D(EUS) G(RATIA) HISP(ANIARUM) ET IND(IARUM) R(EX) y l’añu acuñación. Nel reversu, l’escudu real coronáu y llindiáu pol Toisón d’Oru y la lleenda IN UTROQ FELIX AUSPICE DEO (Baxo la mirada de Dios, felices n’un y otru mundu) en referencia al Vieyu y Nuevu mundu (Europa y América). Apaecen equí tamién la marca la ceca, M coronada (l’oru acuñose namás que’n Madrid) el valor nominal y les iniciales de los ensayadores.
|
Valor (reales) |
Llei (‰) |
Pesu (g) |
Diámetru (mm) |
|
80 |
875 |
6,75 |
22 |
|
320 |
27 |
35 |
Tabla metrolóxica pal oru
 |
|
80 reales. Tipu 1 |
 |
|
80 reales. Tipu 2 |
 |
|
320 reales |
La Plata
Equí mos atopamos con un pequeñu enguedeyu. Esiste una pieza con valor 8 reales y que caltién la mesma metroloxía que la de 20 reales. Ello ye porque la d’ocho ye un auténticu real d’a 8, de pesu duru, el tradicional qu’acuñaba la monarquía hispánica y que yera divisa mundial dende los tiempos de los Columnarios. Acuñáronse namás que nos años 1809 y 1810, pa dexar sitiu a la so suplente, la pieza de 20 reales y asina unificar toles monedes en valores de plata de vellón. Teniendo en cuenta esti detalle, en plata acuñaríense pieces con valores d’1, 2, 4, 8, 10 y 20 reales, siendo la de 20 la sustituta de los famosos reales d’a 8 o duros. El diseñu del anversu, el sabíu bustu real ensin ornamentos y llndiáu pola lleenda IOSEPH NAP(OLEONE) D(EUS) G(RATIA) HISP(ANIARUM) ET IND(IARUM) R(EX) y l’añu acuñación. Nel reversu, l’escudu real coronáu difier según el valor de la pieza; pa los valores altos, escudu colos seis cuarteles; nos valores baxos, l’escudu típicu de la Monarquía Hispánica, Castiella, llión y Granada, desapaeciendo el restu reinos; escusón de la familia Bonaparte nos dos y llindiaos pola lleenda HISPANIARUM ET IND(IARUM) REX (o lo que cupiere d’ella). Apaecen equí tamién les marques les ceques, o bien Madrid o bien Sevilla, el valor nominal y les iniciales de los ensayadores.
|
Valor |
Llei (‰) |
Pesu (g) |
Diámetru (mm) |
Ceca |
|
1 real |
812 |
1,50 |
15 |
M |
|
2 reales |
3,00 |
20 |
M |
|
|
4 reales |
6,00 |
26 |
M, S |
|
|
8 reales |
903
|
27,00 |
40 |
M |
|
10 reales |
13,00 |
32 |
M |
|
|
20 reales |
27,00 |
40 |
M, S |
Tabla metrolóxica pa la plata
 |
|
20 reales |
 |
|
10 reales |
Esti ye’l real d’a 8 de pesu duru y que nun debemos confundir con 8 reales, que suel ser la identificación de los de plata de vellón. Dafechu, vese que ye la única pieza que al grabar el so valor nominal faemos lleer primero la lletra y llueu el númberu (real 8) y non al revés, como nes de vellón.
 |
|
Real d’a 8 (pesu duru) |
 |
|
4 reales |
 |
|
2 reales |
 |
|
1 real |
El Cobre
El cobre solía acuñase na ceca de Segovia. No que se refier al rei Xosé Napoleón, acuñáronse solo pieces d’ocho maravedinos y basáu nos diseños típicos emplegaos dende Carlos III; nel anversu, bustu real, valor de la pieza y la marca la ceca, cola lleenda IOSEPH NAP(OLEONE) D(EUS) G(RATIA) HISP(ANIARUM) R(EX). Nel reversu, cruz de Pelayu coles armes de Castiella y Llión y escusón de los Bonaparte llindiao por una corona floral.
|
Valor |
Pesu (g) |
ceca |
|
|
8 maravedinos |
11,00 |
31 |
Acueductu |
Tabla metrolóxica de los 8 maravedinos
 |
|
8 maravedinos |
Cola fin del reináu de Xosé Napoleón I y la xuba al tronu del Borbón Fernandu VII, tornaríase de nuevu al sistema tradicional, cosa que a los españoles nin –yos esmoleció, ya que nin –yos dio tiempo a prebar el cambiu.
Fontes:
Kiddle. Enciclopedia pa neños. Reináu de Xosé I d’España pa neños
www. telemundo62.com. Ayalga de XoséBonaparte en New Hope, Pensilvania (EE.XX)
Coinstrail.com. Cartafueyu de monedes de Xosé I Bonaparte (1808-1813)
Numista.es. Cartafueyu de monedesde Xosé I Bonaparte (1808-1813)
Ceres.mcu.es 20 reales de vellón de Xosé I
Numismática Mayor 25. Monedes d’oru de Xosé Napoleón I
Numismática baiget. Xosé Napoleón 1808-1813
Enumismatic.com. Maestros de ceca y ensayadores
No hay comentarios:
Publicar un comentario