2020: Serie Rexones Etnográfiques Lituanes: Aukštaitija

 

Semeya: collectorcoin

Motivu conmemorativu: Rexones etnográfiques de Lituania: Aukštaitija 

Volume d’emisión: 500.000         Fecha d’emisión: 3^er trimestre

 

    Recordatoriu: Lituania apúntase tamién a la bona idega d’homenaxear les sos rexones como anda faciendo Alemaña o la so vecina Letonia. Ensin embargu, el casu lituanu tién daqué especial, ya que les llendes d’estes rexones ye de lo más impreciso; nun conformen unidaes alministratives nin polítiques al estilu de, por exemplu, les Comunidaes Autónomes o les provincies del Estáu español, sinon que se rixen por aspeutos históricos y etnográficos del tipu tradiciones, estilu de vida local, cancioneru, cuentos ya inclusu la fala del territoriu (ésta última non tan rigurosa).

 

     Hai cinco rexones lituanes, poro, vamos ver cinco monedes conmemoratives del fechu.

     Tres la rexón de Žemaitija (2019), la segunda rexón homenaxeá ye la d’Aukštaitija que vién a significar Tierres Montañoses. Asitiada na parte nororiental del país entra tamién, como rexón cultural, en territorios de Letonia y Bielorrusia. La so fala, l’aukštaitián, ye considerada pol Estáu lituanu como un dialéutu del letón, dixebráu a la vez en dos subdialeutos: el sudoviu y el dzūkián. La rexón d’Aukštaitija ta considerada como la cuna del estáu letón.

 

     Nel intre aparez l’escudu identificativu de la rexón, un caballeru con espada y a caballu llindiáu por dos ánxelos proteutores; fina con una estola y la lleenda PATRIAM TUAM MUNDUM EXISTIMA (Considera que la to patria ye’l mundu enteru). Riba, el nome del país emisor LIETUVA y l’añu emisión; baxo, el nome de la rexón homenaxeá AUKŠTAITIJA y la marca de la ceca. El diseñu ye de Rolandas Rimkūnas.

     Nel aniellu esterior, les doce estrelles de la Xunión europea.

     Fontes: Wikipedia: Aukštaitija (castellán)

                   Diariu oficial de la XE, a traviés d’Eurocoinland (castellán)

                   Numismática visual (castellán)