2020: Investigación Médica

 

Semeya: collectorcoins

Motivu conmemorativu: Investigación Médica

Volume d’emisión: 300.000         Fecha d’emisión: Ochobre

     Esti diseñu ye obra del Grabador Xeneral de Monedes de la Monnaie de Paris, dende esti añu 2020, Joaquín Jiménez. Según les sos pallabres, la idega yera facer rescamplar la vitoria del home escontra les enfermedaes. Pa elli, esta llucha dase dende l’espaciu européu y ye por ello que’l so diseñu algame tamién al círculu de les estrelles de la Xunión.

     Esta moneda complementa a una medaya, fecha tamién pola ceca de Paris en primavera, n’agradecimientu a tolos profesionales involucraos na llucha escontra el COVID-19. N’esti casu, l’homenaxe va pal personal sanitariu, asina como pa científicos ya investigadores. La moneda nun va ponese’n circulación sinon que va vendese solo pal colleicionismu en tres blíster complementarios; la parte solidaria, ye que por cada moneda vendía, dos euros van dir pa la Fondatión de France, una axencia alministrativa creada pol Gobiernu francés pa fomentar el medre de la filantropía privada, asina como les fundaciones privaes n’esti sen.

     Nel intre la moneda aparez una rapaza güeyando un migayu d’ADN supuestamente amplificáu por un microscopiu. Ente les sos guedeyes aparez la pallabra UNION. Riba, ente estrelles, l’abreviatura del país emisor RF y baxo, l’añu d’acuñación 2020 coles marques de la ceca, el diseñador de la moneda y el direutor de ceca.

     Nel aniellu esterior, les doce estrelles de la Xunión europea.

     Fontes: Numismática visual (castellán)

                  Diariu oficial de la XE a traviés d’eurocoin