Conceyu de Marchena

     Marchena asítiase na provincia de Sevilla. Tién un interesante conxuntu patrimonial históricu artísticu y la so actividá indusrial va dende’l campu a la manufactura.

     Una sola moneda de 25 céntimos s’acuñó en Marchena, más conocida pol nomatu de Real de Marchena. Realmente nun yera una moneda, ya que nun tenía el respaldu de ninguna alministración pública (nin ayuntamientu, nin provincia y muncho menos del Gobiernu) sinon que foi un vale en forma de chapa encargáu por una fábrica gaseoses al plomberu del pueblu, Don Antonio Pliego y fechu con unes fiches de latón recoyíes na fábrica militar de Sevilla. Tal foi la bona acoyida que tuvo, non solo en Marchena sinon tamién nos conceyos de la derrolada, qu’hebo d’ampliase la so fabricación. El porqué del so ésitu hai que buscalu primero na falta de moneda oficial fraccionada pa les merques cotidianes del pueblu y, segundo, que la gaseosa yera un productu mui popular, poro, la fábrica servía-yos como aval.

     Esiste una bayura de monedes acuñaes col valor 25 C pola so ya camentada popularidá, aún asina, hai que tener curiáu coles falsificaciones que, por ciertu, aparecen con una fechura meyor tovía que les orixinales ya qu’estes últimes fixérense d’un mou tan rudimentariu que nun salió una igual.

    Les que sí son más rares (y más llambiones pa los falsificadores) son unes fiches acuñaes col valor 025 C; al parecer debieron ser les primeres n’acuñase hasta que se decataron del erru y lu iguaron. Pa finar, al parecer esisten unes poques monedes d’esti tipu feches en cobre a mou de preba, seguramente.

     Decatase de que’l so tipu nos recuerda un pocu a les acuñaes n’Arahal, esto foi debío a que’l real marcheniegu ya taba bien fincáu ente la población araliega enantes de qu’esti conceyu entamare a acuñar les monedes propies de so.

 Fontes: Monedas durante la II República y La Guerra Civil Española (1931-1939). Javier Ovelleiro
 

               Imperio Numismático. (Foru numismáticu)