Primer serie (2014- )
Estraoficialmente, Andorra ya adoptare l’euru como moneda nel so
territoriu. Fixere lo mesmo qu’antanu fexo cola peseta española y el francu
francés: usales como divisa ensin nengún tipu d’alcuerdu pa colos países
vecinos. Esto foi una de les causes poles qu’Andorra nun tuvo permitío acuñar
euros propios como sí fixeren otros microestáos européos. Foi a metá del 2011
cuandu un alcuerdu cola XE, permite que l’euru seya moneda oficial nel
Principáu y qu’esti pueda acuñar los suyos propios.
El Govern
del Principat d’Andorra promovió un concursu nacional pa definir los tipos de
los sos euros, esceutu el de la moneda
de 2 euros, que se reservó pa grabá-y l’escudu nacional. La temática pa les
otres monedes diba ser:
1 euru: Casa de la Vall (sée
del Consell General), detalles del intre o fachada.
50, 20 y 10 céntimos: Arte Románicu
andorranu.
5, 2 y 1 céntimu: Paisaxe, natura, fauna
y flora del país pirenaicu.
Un xuráu
formáu por téunicos de los Ministerios de Finances y de Cultura, representantes
del INAF (Institut Nacional Andorrà de Finances) y presidíu pol ministru cultura Albert
Esteve, foron los encargáos de la escoyeta del diseñu ganaor y l’envíu del
mesmu al Govern pala so aprobación. Los diseños ganaores foron:
Nes monedes d’1, 2 y 5
céntimos aparez la tiesta d’un rebecu pirenaicu (rupicapra pyrenaica) o isard en catalá xuntu
a un aigla esnalandu. El diseñu foi d’ un estudiante universitariu, Ruben da
Silva Caupio.
Les de 10, 20 y 50
céntimos recueyen la imaxe de Samartín de Tours del frescu románicu asitiáu na
ilesia de Sant Martí de la Cortinada, asina como la ilesia Románica de Santa Coloma, diseñu del
estudiu Moles Disseny.
Na d’1 euru, aparez
la Casa de la Vall (la Cá’l Valle), diseñada por Jordi Puy.
La UE nun dio’l so preste al diseñu de los
céntimos mayores. Pol principiu d’igualdá relixosa, Samartín tenía de desaparecer de les monedes, o polo menos el
nimbu qu’identifica la imaxe como Santu cristianu. La decisión final foi
eliminalu del diseñu y sustituilu pol arcu d’entrada a la ilesia de Santa
Coloma.
Nel diseñu
final aparez como identificación del país emisor el so nome: ANDORRA. L’añu
qu’aparez na moneda ye’l d’emisión.
Como
Andorra nun tién ceca propia, la RCM-FNMT española encargarase d’acuñar les
monedes d’1, 2 y 5 céntimos, asina como la d’1 euru; del restu va encargase la
Monnaie de París.
1, 2 y 5 céntimos
Les monedes d´1, 2 y 5 céntimos lleven un rebecu
pirenaicu o isard (rupicapra pyrenaica)
acompañáu d’una rapaz esnalando y la fastera d’un monte de fondu; identificador
del país: ANDORRA y l’añu d’emisión, too ello arrodiao poles doce estrelles de
la XE.
10, 20 y 50 céntimos
Les monedes de 10, 20 y 50 céntimos
muestren la ilesia románica de Santa Coloma
asina como l’arcu entrada; identificador del país: ANDORRA y l’añu d’emisión,
too ello arrodiao poles doce estrelles de la XE.
1 y 2 euros
Na moneda d´1€ aparez la imaxen de Casa de la Vall; identificador del
país: ANDORRA y l’añu d’emisión, too ello arrodiao poles doce estrelles de la XE.
La
moneda de 2€ reproduz l’escudu
del Principat d’Andorra; identificador del país: ANDORRA y l’añu d’emisión,
too ello arrodiao poles doce estrelles de la XE.
Nel cantu la moneda de 2 euros aparez el
típicu conxuntu del valor nominal de la moneda coles estrelles ximielgues (como
los cantos español y francés):
No hay comentarios:
Publicar un comentario