La República pierde la Guerra Civil y el
xeneral Franco, como bon dictador, asume’l mandu del Estáu Español. Pésllase tou
un ciclu n’acuñación de monedes; anque ya entamare durante la República, y más
na guerra, ye a partir d’equí cuando ya desaparecen dafechu los metales nobles
de la fabricación de monedes de cursu llegal, quedando l’oru y la plata
relegaos a la fabricación de pieces meramente conmemoratives y de colleición.
Una vez finada la guerra, les monedes
acuñáes pola República dexaron de ser llegales y nun podíen ser canxeáes poles
monedes del nueu réxime. L’estáu solo reconoció les pieces acuñaes enantes de
1931 por ser d’oru, plata y cobre, metales per necesitaos pa llevantar el país
de la so llaceria (como exemplu, dicir que con la fundición de les monedes de
cobre recuperáronse 800 tonelaes del preciadu metal pa lleutrificar les llínies
ferroviaries de Madrid a Ávila y Segovia). Poro, la llei obligaba a tou
ciudadanu a cambiar diches monedes poles nueves pesetes (principalmente en
billetes) so pena de multa o cárcel al que nun lo fixere. Menudu cambiu, cinco
pesetes de plata por un papel col mesmu valor facial, asina aparecien col pasu
del tiempu dellos tesorucos escondios en cases y tenaes.
No que se refier a l’acuñación de monedes
nel periodu franquista, pue dixebrase en tres series, una de posguerra y otres
dos de tipu personalista, esto ye, cola efixe’l dictador, cuan nueu rei, nes
pieces.
Desaparecen tamién toa referencia al Fiel
de Balanza y los Ensayadores, asina como posibles diseñadores, y la marca de la
ceca madrilana (la estrella seis puntes) torna a los diseños na segunda y
tercer series.
Primer serie: Monedes de
Postguerra (1940-1946)
A la moneda de 25 céntimos de 1937 (la del
Bancu de Burgos) sumáronse-y tres nueves monedes de cinco y diez céntimos y una
peseta. La so acuñación, asina como toles posteriores, ya foi esclusiva de la
Fábrica Nacional de Moneda y Timbre de Madrid. El diseñu de los nuevos tipos
corrió a cargo de Carlos Mingo, grabador xefe de la mesma fábrica.
Los céntimos
Los céntimos entamaron a acuñase en 1940,
pero nun circularon hasta 1943. L’aleación emplegada foi d’aluminiu (975
miésimes) con níquel.
 |
| Xinete d'Osca (Huesca) |
Nel reversu
volvemos a ver esi ideal nacional nel escudu grabáu; de tipu seuduimperialista, tá inspiráu
nel de los Reis Católicos (pas de la patria, decíen); poro, podemos ver l’aigla
de San Xuán col so nimbu y que foi símbolu de la princesa d’Asturies Isabel
(llueu reina de Castiella y Llión) arropiando l’escudu nacional, asina como les
fleches (símbolu de Fernandu) y el xugu (d’Isabel) atropaos llueu pola Falanxe
Española como propios. L’escudu central ye una semeya del de los reis, esto ye,
les armes de Castiella y Llión en dos cuarteles ximielgos y en diagonal, y les
armes d’Aragón y Navarra n’otros dos; pa remate final, l’escudu Granada.
Verdaderamente ye un escudu que nos recuerda al de aquellos años
pre-imperiales. Per enriba la tiesta l’aigla va una estola col llema UNA GRANDE
LIBRE y a dambos dos llaos de la rapaz, les Columnes d’Hércules con estola y
llema PLUS ULTRA.
El cantu
ye llisu con unes marques en relieve.
El pueblu conservo-yos los nomatos de Perrina y Perrona n’alcordanza de los céntimos del llión. N’agostu de 1959
foron retiraes de la circulación.
5 céntimos
10 céntimos
Les pesetes
La peseta data del añu 1944 y ye de cobre
(900 milésimes). L’escudu del reversu
ye igual que’l de los céntimos. Nel anversu
detaca un gran 1 arrodiáu por una greca entellazando les armes de los antiguos
reinos de Castiella, Llión, Aragón, Navarra y Granada asina como’l xugu y les
fleches. En numismática esta pieza ye conocía como la del uno. El cantu ye
estriáu.
Col mesmu formatu tamién s’acuñó una
moneda de 2,50 pesetes.
2,50 pesetes
Segunda serie: Bustu de Franco y Reino de España (1946-1965)
Finada la guerra, el futuru políticu del
país yera enforma inciertu, pues los mesmos vencedores nun teníen un res nidio
qué sistema de gobiernu instaurar. El manifiestu democratizador y autonomista
del herederu a la corona española Xuan de Borbón, fexo que Franco rompiere
relaciones con elli y xirare haza una dictadura personalista. Poro, Franco
recuperó el nome de Reino de España
pal país, pero con un Xefe del Gobiernu vitalciu que nun tenía un res que ver
cola familia real, elli mesmu. Y cuan “monarca” escoyó, en 1969, al so sucesor
nel tronu: baltiando a Xuan, escoyó al so fiu, Xuan Carlos de Borbón; eso sí,
sedría rei cuando elli morriere.
Surden dellos cambios con respeutu al
periodu anterior: les monedes de postguerra conviértense en provisionales hasta
que les nueves les suplan; aparez de nueu la plata p’acuñar delles pieces a mou
de preba, y grábase la efixe’l dictador mirando a mandrecha. Obra del escultor
Mariano Benlliure, la efixe tuvo que ser retocada por grabador xefe de la FNMT
Manuel Marín debío al so escesivu relieve.
LLibrose solo la moneda de cincuenta céntimos de
llevar la cara’l dictador: diseñada por Carlos Mingo, taba dedicada a la Mariña
Española y la xente entamó a nomala dos
reales (pol so furacu central, foi usada finalmente polos neños p’añudar
los cordeles y favorecer el llanzamientu de les peonces). Esisten dos versiones de la pieza; la primera llevaba les puntes de les fleches del escudu haza baxu, cosa que, sigún cuenten, nun-yos prestó un res a los falanxistes, polo que tuvo de facese un segundu diseñu coles puntes haza riba.
Les
cinco pesetes de 1945 fracasó debío a
que yera más caro el níquel emplegáu na so fabricación que’l valor nominal de
la moneda. Asina que Salió un nuevu duru
en 1957.
Y ye precismente en 1957 cuando entamen a
acuñase, aparte del duru, les monedes de mayor valor: 25 y 50 pesetes. Nestes
tres monedes ya aparez un cambiu nel
escudu del reversu: desaparez el seuduimperial y tórnase al del Estáu Español,
esto ye, un cuartel por cada reinu: Castiella, Llión, Aragón y Navarra, xuntu
cola picolina de Granada. Al escudu flanquéenlu les columnes d’Hércules cola
estola PLUS ULTRA y remátalu la corona de los Reis Católicos; too ello queda
arrodiao pol aigla San Xuan nimbáu y la estola UNA GRANDE LIBRE, y el xugu y
les fleches, nos sos pies.
50 céntimos (fleches pa baxo)
50 céntimos (fleches pa riba)
5 pesetes (1949)
5 pesetes (1957)
Tercer serie (1966-1975)
Juan de Ávalos foi’l diseñador del nuevu bustu de Franco, un vieyu de 74
años. Acuñáronse n’esta serie les úniques monedes de plata, col valor de 100
pesetes y cola efixe’l dictador, aparte d’unes nueves d’1 peseta na que solo cambia l’anversu, ya que mantién l’escudu seuduimperial. Tamién
desaparez la de 50 céntimos mariñana, sustituyía finalmente pola efixe Franco
d’Ávalos.
No hay comentarios:
Publicar un comentario