Primer serie (2014- )
A pesar d’entamar a circular nel 2014,
Letonia ya tenía diseñáos los tipos de les sos monedes dende’l 2008.
 |
| Diseños del 2008 |
Enantes de la so puesta na cai, decidieron facer dellos retoques:
Los céntimos del 2008 son práuticamente
iguales a los que s’acuñaron ya oficialmente, salvo el cambiu de posición de la
fecha d’emisión nes monedes d’1, 2 y 5 céntimos que pasa de tar a dambos dos
llaos del escudu a tar a manzorga y en vertical.
No refernte a les monedes d’1 y 2 euros,
la fecha emisión pasa de tar ente les estrelles a tar nel discu interior y
cumplir asina cola direutriz europea de dexar l’aniellu esterior llibre de
cualisquier marca que nun seyan les estrelles de la XE.
 |
| Los 2 € desaniciaos |
Nun orixe, la moneda de dos euros diba
tener otru diseñu totalmente distintu; n’ella diba aparecer el Monumentu a la
Llibertá (asitiáu en Riga), representada por una muyer que los letones llamen cariñosamente Milda y qu’atropa nes sos manes tres estrelles, representación de les tres rexones del país. El problema vieno porque estes estrelles
interferíen coles estrelles de la bandera la XE, creando confusión.
 |
| 5 lat (1929) |
A la fin optose por facer el mesmu diseñu que pa les monedes d’euru. El diseñu ye de Guntars Sietiņš, basáu a la so vez na imaxe grabada na moneda de 5 lati de plata del añu 1929, obra del artista Rihards Zariņš (1869-1939). La doncella qu’aparez na moneda ye Zelma Brauere (1900-1977), correutora de la imprenta nacional y musa del artista.
Que los letones tengan anguañu a esta dama con paxeyu tradicional como
símbolu nacional nun foi por otra causa que la de ser la imaxe de la vieya
moneda, sustituyía de sutruque ya ensin avisar por rublos soviéticos durante la
ocupación y anexión de Letonia por la URSS tres la II Guerra Mundial. La xente
quedó con un montón de lati ensin valor (salvu el del metal de la mesma: plata)
nos bolsiellos polo que se convirtió nun símbolu de la resistencia escontra los
invasores. Per ello, nun ye raro que ganare nes votaciones populares d’escoyeta
de diseños la nomada Doncella letona.
Los diseños definitivos
El diseñu definitivu ye’l típicu 2-3-3.
Como Letonia nun tién ceca propia, son les ceques de Stuttgart y Karlsruhe
(Alemaña) les encargáes d’acuñar los tipos.
Los diseños de los céntimos son obra de Laimonis
Šēnbergs y básense nel Escudu Nacional de Letonia: nel campu superior aparez un
riscar, símbolu del país dende 1918; nos campos inferiores vienen representáos
los animales totémicos de les tres rexones primixenes del país, un llión
(símbolu de Kurzeme o Curlandia) y un Grifu (símbolu de Latgale o Latgalia y Vidzeme),
los mesmos que custodien l’escudu nos céntimos gordos. Les tres estrelles que
coronen los escudos tamién son una representación de les tres rexones.
1, 2 y 5 céntimos
Escudu
d’armes de Letonia coronáu por
tres estrelles que simbolicen les tres rexones primixenes del país (Kurzeme,
Latgale y Vidzeme); el Sol Naciente como identidá del nacimientu de la nación, y los animales heráldicos de les rexones letones. El diseñu ye de Laimonis Šēnbergs. Sol escudu vién el nome
del país emisor, LATVIJA, y a manzorga l’añu d’emisión. Alredor, les 12 estrelles
de la XE.
10, 20 y 50 céntimos
Escudu
d’armes de Letonia coronáu por
tres estrelles que simbolicen les tres rexones primixenes del país (Kurzeme,
Latgale y Vidzeme) col Sol Naciente y custodiáu por un llión (símbolu de Kurzeme) y un grifu (símbolu de Latgale y Vidzeme). El
diseñu ye de Laimonis Šēnbergs. Sol escudu vién l’añu d’emisión y el nome del
país emisor, LATVIJA. Alredor, les 12 estrelles de la XE.
1 y 2 euros
El
pueblu letón, representáu pol
bustu de La Dama letona, diseñu de
Guntars Sietiņš. La identificación del país
emisor vién más completu: LATVIJAS
REPUBLIKA. L’añu d´emisión ta a manzorga, tres la guedeya la rapaza. Nel
aniellu esterior, les 12 estrelles de la XE.
Nel cantu de la moneda de 2 euros aparez la lleenda: Dios, Santu, Letonia con
estrelles.
Enllaz: 2 euros conmemorativos letones
No hay comentarios:
Publicar un comentario