2024: Arquitectura finlandesa

 

Semeya: Colectorcoins

Motivu conmemorativu: Homenax a l’arquiectura finlandesa: Herman Gesellius, Armas Lindgren y Eliel Saarinen.

Volume d’emisión: 400.000         Fecha d’emisión: 4^u trimestre

 

     De lo que se suel entender como edificios históricos o antíguos, Finlandia anda bien escasa. Detaquen dellos castiellos, siendo’l de Turku el más vieyu (sieglu XIII). Tamién hai catalogaes unes 73 ilesies medievales. Toos estos edificios tan fechos en piedra, magar que l’arquitectura tradicional del país emplega, principalmente, maera (tueros mayormente) dalgo percomún pelos sieglos XVII y XVIII pa facer barrios residenciales nes ciudades ya inclusu ilesies (la de Petäjävesi, 1765 ye Patrimoniu de la Humanidá). Nel sieglu XIX y baxu control del territorio por Rusia, naz el Gran Ducáu de Finlandia, faciendo de Helsinki, d’aquella una anónima ciudá, capital en 1812 y encargándose del so espoxigue al arquiteutu alemán Carl Ludwig Engel, convirtiéndola nuna gran capital al estilu clasicista.

     Ensin embargu, la braera revolución arquitectónica del país vendía a entamos del sieglu XX de la man del Modernismu (Art Nouveau). Por estes dómines apaecería una robla d’arquitectura nomada Gesellius, Lindgren, Saarinen y formada precisamente polos arquitectos Herman Gesellius, Armas Lindgren y Eliel Saarinen. Fundá en 1896, féxose famosa pol so diseñu del Pabellón de Finlandia na Espo de París de 1900. La robla franció en 1905, pero n’esti curtiu periodu dio-y tiempo a dexar dellos exemplos como la mansión Hvitträsk, centru d’estudiu y residencia de los tres arquiteutos y les sos families. El Muséu Nacional de Finlandia foi’l so caberu diseñu.

 

Pabellón de Finlandia na Espo de 1900 en París

     Nel intre la moneda apaecen les siluetes de cuatro edificios: pabellón de la Espo de 1900, la mansión Hvitträsk, la casa Tallberg y el Muséu Nacional. Ente ellos, el nome la robla d’arquieutos Gesellius, Lindgren, Saarinen y, de seguío, FI, como iniciales del país emisor, la marca de ceca y l’añu acuñación 2024.

     Nel aniellu esterior, les doce estrelles de la Xunión europea.

     Fontes: Wikipedia: Finlandia (castellán). Gesellius, Lindgren, Saarinen (inglés)

                   Numismatica visual (castellán)