2022: Primer vuelu Atlánticu Sur

Semeya: collectorcoin

Motivu conmemorativu: Centenariu de la primer travesía aérea sobre l’Atlánticu Sur

Tirada: 1.015.000           Fecha d’emisión: 30 marzu

 

     El 30 marzu de 1922, los aviadores portugueses Sacadura Cabral, como pilotu y Gago Coutinho, como navegante, salieron n’un hidroavión, de nome Lusitania, dende Belem, na desembocadura del ríu Tejo y guiaos namás que por un sextante con horizonte artificial, inventu de Gago y que revolucionó la navegación de la época. La so fazaña coincidía cola cellebración del centenariu de la independencia de Brasil, polo que la intención yera amerizar en Rio de Janeiro. Averíes, naufraxos y mala mar, fixeron que’l viaxe, d’unos 8.383 kilómetros, durare 79 díes y tovieren qu’emplegar dos hidroaviones más, el Patria y el Santa Cruz. Dos héroes que sirvieron d’inspiración al pilotu Lindberg y a los españoles del Plus-Ultra.

     Nel intre la moneda apaez un hidroavión tipu Fairey IIID Mk II con motor Rolls-Royce, l’emplegáu na fazaña. Alredor lléese la lleenda TRAVESSIA DO ATLÂNTICO SUL. So la nave, el nome del país emisor, PORTUGAL, colos años de la efeméride1922-2022 (esti caberu, l’añu emisión tamién) y la constelación Crux (Cruz). Finando la vuelta, el nome del diseñador y la marca de la ceca: Esc. JJ BRITO CASA DA MOEDA.

     Nel aniellu esterior les doce estrelles de la Xunión Europea.

 

     Fontes: Wikipedia. Primera travesía aérea del Atlántico Sur (castellán)

                   Numismática visual (castellán)