Pugesa

     Falar de moneda pugesa ye falar de Lleida, Agramunt, Urgell, Girona… oseya, de los Condaos catalanes, y tamién del reinu d’Aragón. El so orixe hai que buscalu nos condaos de la vieya Marca Hispánica que los francos afitaron al norte de la Península Ibérica o, lo que ye lo mesmo, al sur de los Pirineos. La falta de control real na zona, fexo que los condes francos se comportaren como auténticos monarques de miniestaos y cola potestá de llabrar moneda propio (el propiu rei autorizó delles vegaes esta potestá principalmente pa cubrir la carencia de numberariu na zona y como recompensa poles conquistes y afitamientu de fronteres frente al poder musulmán por parte d’estos condes).

     La nacencia d’esta moneda hai qu’asitiala nel territuriu del Poitou, nel Mediudía francés. Los condes pictavienses acuñaren unes monedes menudes d’escasu valor pa que circularen ente’l pueblu pa les sos transacciones cotidianes. El constante mercadéu ente dambos dos llaos de los Pirineos, fexo qu’estes monedes circularen tamién pelos condaos catalanes. Les monedes franques nomaes pictes valíen 1/4 de denier, lo que pa los catalanes yera diner y pa los castellanos dinero. Poro, diches monedes teníen la mesma equivalencia, lo que facilitaba la so espansión.

     Dellos estudiosos asocien el so orixe etimolóxicu a la ciudá occitana de Lo Puèi de Velai (le Puy-en-Velay, en francés), llugar famosu na Edá Media por ser un centru Marianu de peregrinaxe, asina como ún de los pueblos francos d’áu arrancaba’l Camín de Santiago. Ciertu o non, a la moneda pugesa tamién la conocíen con otros nomes: pogesus, pogesia, pogesius… precisamente sedrá’l Camín l’encargáu d’esparder estes monedes pelos reinos hispanos.

     La primer referencia d’esta moneda data del sieglu XI, nun documentu del añu 1195 citáu na Historia d’Avignon, fai reflexu d’un pagu d’oveyes con pugeses. Ensin embargu, ye a partir del sieglu XIII cuando se tién constancia física de la presencia de pugeses, fechu que llegará hasta’l sieglu XVI.

     La popularidá y estensión d’estes monedes pelos Condaos catalanes ya incusu pel Reinu d’Aragón foi primeramente pola so probitú, esto ye, taba fecha con d’aquella metales probes como’l cobre, anque tamién les había de llatón y estañu; rondaba los dos o tres gramos de pesu, y el so valor yera d’un cuartu de diner (si tenemos en cuenta qu’el diner ya yera de por sí una moneda de vellón probe con un 25 % de plata, ya podemos imaxinamos la pugesa). Ye por ello que fore bien popular ente la xente probe del llugar que yera más bien la mayoría. Acuñáronse tamién medies pugeses. 

     Otru de los factores claves na so estensión foi que podía ser acuñada por cualquiera que toviere posibles y toviere el preste del rei. Un casu claru al respeutu tenémoslu col rei Alfonsu IV d’Aragón y la so “llixereza” a la hora dar llicencies pa batir moneda inclusu a particulares: esisten dos prerrogatives, por exemplu, d’esti rei dando-yos el preste p’acuñar moneda a Ramón Cortit de la villa y valle d’Ager en 1328 y a Pedro Ferrer d’Agramunt en 1331 (ver moneda agramuntesa, pugesa incusa).

     Esta política tan pocu acertada, fexo que dellos acuñadores nun respetaren les proporciones marcaes pa tala moneda, lo que yera un enguedeyu qu’alteraba de contínuu el mercadéu.

     Ensin embargu, sedrá Lleida, perteneciente d’aquella al Condáu d’Urgell, la villa a la que se-y asociará la fabricación de pugeses; col ya camentáu valor d’un cuartu de diner, circuló con calter de fiduciaria, esto ye, que nun circuló pol so valor intrínsecu, sinon como vale canxeable en moneda oficial garantizada por un depósitu nos conceyos aú se fabricaba (magar que Lleida o Almenar, foron les primeres, depués finaron acuñando pugeses les poblaciones cercanes como Agramunt, Ponts, Cubells, Balaguer o Camarasa) . Yeren bien identificaes al llevar l’escudu de la ciudá, una cañina con tres llírios, asina como la lleenda PUGESA DE LEIDA nel anversu; el reversu repetía el tipu de les flores, pero yera anepígrafu y con una grafila de bolines.

Tipu de les primeres pugeses de Lleida

Media pugesa

     Col tiempu a les flores de lliriu del anversu añadióse-yos una llende romboidal. Les lletres de la lleenda tamién camuden a un nuevu estilu bien estendíu per Europa, el nomáu Góticu. 

Pugesa de Lleida, final del XIII entamu del XIV. Muséu d’Art Nacional de Catalunya.

 

Pugesa de Lleida. Sieglu XV

      Les últimes pugeses acuñaes daten de la época del reináu de Fernando II el Católicu (1479-1516), tiense constancia qu’en 1510 el rei reafirmó los privilexos de la ciudá Condal d’acuñar moneda de plata y menudo, ente elles pugeses. Coinciden anversu y reversu; decatase que n’esti casu la lleenda ta escrita con lletra gótica mayúscula regular; n’esti casu pa referise a Lleida la denomina LEDA. (PUG::ESA::DEL::EDA::)

Otres Pugeses

     Pugeses de Lleida son les que más se conserven anguañu, dafechu, de les monedes acuñaes por Cortit y Ferrer (riba mentaos) nun hai constancia física, y les de Barcelona tan catalogaes como rareces por escases.

     Del Condáu d’ Urgell, Balaguer tamién acuñó les sos pugeses. Esta primera foi acuñada a nome de Teresa d’Entenza, condesa d’Urgell nel sieglu XIV. Fecha en llatón ya incusa, detaca l’escudu d’armes d’Urgell cola lleenda TE-.C-.OM

Pugesa de Teresa d’Entenza

     Esta ye otra muestra de pugesa de concesión personal, permitida a un tal Guillem de Cervera de Balaguer, d’ehí lo del ciervu allendáu poles borles típiques d’Urgell.

Pugesa de Guillem de Cervera (s. XIV)

     Otra pugesa “privada”, n’esti casu el rei Alfonsu III d’Aragón y Catalunya da-y llicencia de batir a Ramón Portell, de la Vila de Pons, allá pel añu 1328. Esti noble acuñó na moneda, como non, el so idntificativu heráldicu, un gochu (d’ehí lo de Porcel). Como encametemos riba, yera bien típico de los reis catalano-aragoneses da-yos el preste a dellos personaxes pa qu’acuñaren moneda propio. Poro, tamos ante autentiques rareces polo escaso de la tirada y les condiciones de conservación propies de monedes fráxiles feches con materiales probes.

Pugesa de Pons

     El señoríu de Bellpuig tamién tenía reconocíu el so drechu a batir moneda propio por concesión del Conde Borrell de Barcelona en 986, poro, sábese qu’ellí tamién acuñaron pugeses pel añu 1330.

Pugesa de Bellpuig

     Pa finar, una pugesa de Cubell incusa de llatón. Nel anversu vense unes llaves enriba un barreñu o cubu col nome la villa: CVB-ELS

     Como curiosidá, y ya que nun atopo semeya, de Girona conócense pugeses con feches ente 1479 y 1516 con lleenda en dambes dos cares: PUGESA DEU con un pesu de 2,87 gr. y un diámetru de 17 mm.

      Lo común a toles pugeses ye qu’hai una bayura pesos y diámetros de les mesmes. Ello ye debío principalmente al tipu de metal con que foron feches, cobre o llatón principalmente, asina como’l grosor del cospel; magar que tamién el mou tan artesanal de trabayar contaba. A pesar d’ello y teniendo en cuenta la probitú de les pieces, yeren almities ensin problemes nel so emplegu cotidianu.

Fontes: Wikipedia. Puy-en-Velay (castellán)

                                 Pugesa (castellán)

               Museu d’Art Nacional deCatalunya (castellán)

               Foru Imperio Numismático (castellán)

            QUINA LA FEM?  Blog de JM. Mir - jmir1@xtec.cat [1177] La Lleida de la conquesta imedieval (català)

               Historia de la moneda. La pugesa de Lleida (castellán)

               TRATADO DE LAS MONEDAS LABRADAS EN EL PRINCIPADO DE CATALUÑA CON INSTRUMENTOSJUSTIFICATIVOS. POR EL DOCTOR DON JOSEF SALAT. Tomu I. Añu de 1818 (castellán, català y llatín)

               LES MONEDES DE BELLPUIG I BARONÍA. Jaume Torres i Gros (català)

               AUREO & CALICÓ (subastes numismátiques)

               Numismatic Gold and Silver Online