2020: Batalla de les Termópiles

 

Semeya: colectorcoin

Motivu conmemorativu: 2500 Aniversariu de la Batalla de les Termópiles

Volume d’emisión: 750.000         Fecha d’emisión: Xineru

 

     A esti altor, quién nun conoz la fazaña del rei Leónides y los sos 300 espartanos. Pel branu del 480 e.C. el rei Xerxes I de Persia llevó un gran exércitu terrestre y marín cola fin d’ocupar tol territoriu griegu dientro de la estaya hestórica conocida col nome de Segundes Guerres Médiques. Esparta per tierra y Atenes per mar, comandaron una lliga de polis griegues n’oposición a la invasión. L’exércitu de tierra asitiose nel, en principiu, únicu pasu viable pa los perses na zona de les Termópiles (Puertes Calientes, poles fontes termales del llugar) escoyendo’l puntu más estrechu y angostu del pasu, poro, más fácil de defender. Tres díes dicen que duró’l combate, nos que’l pesu la griesca cayó sobre Leónides y los suyos; en realidá, el pasu taba perdíu pa los griegos a causa d’un traidor qu’indicó a los perses un pasu pelos montes y cayer éstos pela retaguardia de los defensores. Los espartanos pasaron a la gloria porque foron los encargaos de retener el puxu del invasor mientres el gruesu del exércitu diba retirándose pal sur. Cuenten que de los 300 nun quedó ún vivu. El resultáu final foi que Xerxes I entró n’Atenes, pero la ciudá taba vacía gracies al tiempu ganáu polos espartanos.

 

     Nel intre la moneda aparez un cascu d’hoplita corintiu con penachu de crin de caballu y allendáu por una típica greca griega en circunferencia. Al so frente vese l’añu d’acuñación 2020 y la marla la ceca. Pel cuellu aparez el monograma del diseñador Georgios Stamatopoulos. Alredor, la lleenda 2500 XPONIA AΠO TH MAXH TΩN ΘEPMOΠYΛΩΝ (2500 años de la batalla de les Termópiles) y el nome del país emisor ΕΛΛΗΝΙΚΗ ΔΗΜΟΚΡΑΤΙΑ (República Helena).

     Nel aniellu esterior, les doce estrelles de la Xunión europea.

     Fontes: Wikipedia. Batalla de les Termópiles

                   Numismática visual (castellán)

                   Diariu Oficial de la XE a traviés d’eurocoin