Malta (República)

Enllaz: 2 euros conmemorativos malteses

Primer serie (2008- )

     Malta escoyó los sos diseños por votación popular mediante’l teléfonu o los SMS. Tan solo los céntimos de cobre son obra d’un diseñador, Noel Galea Bason (NGB nes monedes) el restu diseños son de dominiu públicu. L’esquema de los tipos ye’l típicu 2-3-3.

     Malta nun tién ceca propia, poro, el Bancu Central de Malta (Bank Ċentrali ta’ Malta) manda acuñar les sos monedes en Pessac (Francia); la so marca ye una F na estrella de les seis en puntu. La identificación del país ye’l so nome: MALTA. L’añu de la impronta ye’l d’emisión.

Eslovaquia (República)

Enllaz: 2 euros conmemorativos eslovacos

Primer serie (2009- )

     A pesar d’emitir euros propios a partir del primeru de xineru del 2009, los diseños de les monedes ya se fixeren públicos en 2005 siguiendo’l clásicu esquema 2-3-3. La ceca eslovaca tá asitiada en Kremnica (Mincovňa Kremnica)

     Eslovaquia escoyó (por votación popular) pa les sos cares nacionales los sos másimos símbolos: el cumal más guapu del país (que non el más altu), el castiellu real y la cruz del escudu nacional. Cada tipu lleva grabáes les siegles de los diseñaores, aparte de la de la ceca.

Xipre (República)

Enllaz: 2 euros conmemorativos xipriotes

Primer serie (2008- )

     L’artista grecuxipriota Tatiána Sotirópoulos (Τατιάνα Σωτηρόπουλος), en collaboración col estadounidense Erik Maell, foron los encargaos de diseñar los tipos de los euros de Xipre nel típicu  esquema 2-3-3.

     Xipre nun tién ceca propia, poro, de l’acuñación encárgase la de Vantaa (Finlandia); nes monedes nun vién ninguna identificación. Sí vién comu identificador del país el so nome en griegu y en turcu: KYΠPOΣ – KIBRIS. La fecha de la impronta ye la d’emisión, poro, les primeres monedes daten del 2008.

Eslovenia (República)

Enllaz: 2 euros conmemorativos eslovenos

Primer serie (2007- )

     Eslovenia foi el primer país, tres l’ampliación del 2010, n’aceutar la nueva moneda europea. Les monedes eslovenes, aparte de tener la so propia cara nacional, diben  aplicar los nuevos cambios de la cara común aprovaos pol BCE pal añu 2008. Les primeres monedes aparecen col añu 2007 grabáu na impronta, poro, trátase del añu d’emisión.

Portugal (República)

Enllaz: 2 euros conmemorativos portugueses

Primer serie (2002- )

      N’esti país escoyéronse tres diseños diferentes pa la cara nacional del euru ente les opciones presentáes nun concursu d’ámbitu nacional. El ganador foi’l diseñador Vítor Manuel Fernandes dos Santos (VS na moneda), quien s’inspiró en símbolos tomaos de la historia portuguesa y nos sellos del primer rei, Don Alfonso Henriques. La marca la Ceca de Lisboa (Imprensa Nacional – Casa de Moeda) vién impresa na moneda coles sigles INCM. L’añu que vién na impronta ye’l d’emisión, poro, les primeres monedes son del añu 2002. L’esquema de los tipos ye’l típicu 2-3-3.

Paises Baxos (Reinu)

Enllaz: 2 euros conmemorativos neerlandeses

Primer serie (1999- 2013)

     Les cares nacionales de les monedes de los Países Baxos, por llei, han de mostrar siempre la efixe del xefe l’estáu col so nome y el títulu Koning/Koningin (rei/reina) der Nederlanden (de los neerlandeses) que-y sirve tamién como identificador nacional. Pa los euros neerlandeses, Bruno Ninaber van Eyben diseñó dos imáxenes distintes de la reina Beatriz.

Luxemburgu (Gran Ducáu)

Enllaz: 2 euros conmemorativos luxemburgueses

Primer serie (2002- )

Yvette Gastauer-Claire recibió l’encargu de diseñar les monedes tres un alcuerdu ente la casa ducal reinante y el gobiernu de Luxemburgu. La so marca privada vién grabada nos tipos (GC). Toles monedes de Luxemburgu, por llei, han d’acuñase cola efixe de so Alteza Real el gran duque (n’esti casu, Henri I), ya inclúin l’añu d’emisión (poro, les primeres monedes son del 2002) y el nome’l país escritu en luxemburgués (Lëtzebuerg).