2024: Serie Patrimoniu de la Humanidá: Sevilla

 

Semeya: collectorcoins

Motivu conmemorativu: Patrimoniu de la Humanidá. Sée Catedral, Alcazar y Archivu d’indies de Sevilla

Tirada: 1.500.000           Fecha d’emisión: 1^er trimestre

 

     El Cascu Vieyu de Sevilla ye’l más estensu del Estáu español, ensin embargu, nun forma parte del gran catálogu de ciudades históriques Patrimoniu de la Humanidá, solo la Sée-Catedral (incluyía la Xiralda), el Real Alcázar (residencia oficial de la familia real) y l’Archivu d’indies, ostenten tal privilexu dende 1987.

     La Catedral entama a construyise pel añu 1433, finándose les obres en 1506 y consagrándose en 1507. D’estilu góticu, siguió creciendo según pasaben los sieglos con nueves actuaciones nel estilu de moda del momento (Renacimientu, Barrocu, Neoclásicu, Neogóticu…) Enantes, nel so llugar, asitiábase una gran mezquita d’orixe almohade, que foi emplegada polos cristianos como llugar de cultu tres la conquista de la ciudá en 1248. El so estáu ruinosu foi la causa del so esbarrumbe pa facer el nuevu templu cristianu, salváronse namás que l’alminar (güei torre-campanriu de la Catedral y conocía como la Xiralda) y el Patiu Les Naranxales)

     L’Alcázar ye un gran recintu zarriáu con muria. La so parte más vieya data del sieglu XI, pero sedría nel XII, colos almohades na ciudá, cuando espoxiga y crez. Tres la conquista castellana, siguen les construcciones palaciegues nos estilos Góticu y Mudéxar. Algamó el título de Real, por ser residencia oficial de los reis españoles dende la so ocupación por Fernandu III. Precisamente una de les sos estancies, conocía como Patiu de les Doncelles, ye la escoyía pal diseñu del grabáu d’esta moneda.

     L’Archivu xeneral d’Indies nació en 1785 por deséu del rei Carlos III, cola fin d’atropar y xuntar tola documentación alministrativa referente a los domeños hispánicos d’ultramar, nun mesmu llugar. Una auténtica ayalga de millones de fueyes y miles de mapes y debuxos referentes a les provincies americanes y les Islles Filipines.

 

     Nel intre la moneda apaez un detalle del Patiu de les Doncelles asitiáu nel Real Alcázar. Riba, la lleenda SEVILLA cola marca de la ceca. Debaxo, el nome del país emisor ESPAÑA y l’añu acuñación 2024.

      Nel aniellu esterior les doce estrelles de la Xunión europea.

 

Fontes:

        Wikipedia: Sevilla. Catedral. Real Alcázar (castellán). Archivu Xeneral d'Indies

         Numismática Visual (castellán)