2024: Policía Nacional española

 

Semeya: colectorcoins

Motivu conmemorativu: 200 Aniversariu de la formación del Cuerpu Nacional de Policía

Tirada: 1.500.000           Fecha d’emisión: 1^er trimestre

 

     Fernandu VII foi l’encargáu de promulgar el Real Decretu pol que nacía la “Superintendencia Xeneral de Policía”; yera’l 13 xineru de 1824 y dotaba principalmente a Madrid d’una estructura de comisaríes dixebrada en Distritos (cuarteles). Cola redaición de los “Reglamentos de Policía” n’esti mesmu añu, conformábense tamién cuarteles policiales nes provincies, controlaos por Intendentes, y subdelegaciones provinciales (Comisaríes provinciales y llocales). El so másimu responsable yera l’Intendente Xeneral o Superintendente. La doble función d’esti cuerpu, yera, per un llau, curiar pol llibre exerciciu de los drechos ciudadanos y, per otru, un Serviciu Públicu de Seguranza. Ensin embargu, na práutica, foi un cuerpu emplegáu fondamente na persecución y control de los Lliberales (según el Decretu, “...compromiso de reprimir el espíritu de sedición...”).

     A lo llargo’l sieglu XIX, la so estructura va camudar delles vegaes, apaeciendo policía uniformada y otra civil (o “de paisano”) coles sos funciones bien definíes. Sobre los años 50 tará controlada pol Ministeriu de la Gobernación y polos Gobernadores Civiles nes provincies. Pel 1863, incorporarase un cuerpu forense. En 1870, la parte uniformada (y militarizada) pasa a depender del Ministeriu de la Guerra.

     En 1912 ye asesináu’l Presidente Xosé Canalejas, lo que obliga a facer una fondera reestructuración del cuerpu, especializándose na llucha escontra los atentaos, principalmente anarquistes. Durante la Guerra Civil, la policía del llau subleváu, nun camudó debío, principalmente, porque les sos funciones d’orde públicu foron xuplíes polos militares. Nel llau republicanu, xuntábense les dos rames policiales nun Cuerpu de Seguranza y nel que según les funciones a tratar, unos diríen de paisano y otros uniformaos (Guardia d’Asaltu). Na Dictadura franquista diríen xuniendo toles estayes policiales nuna sola nomada Policía Armada y baxo’l control de la Direición Xeneral de Seguranza.

 

     Cola llegada de la democracia y la Constitución de 1978, naz el Cuerpu Nacional de Policía, colos preceptos principales de protexer el llibre exerciciu de los drechos y llibertaes de la ciudadanía, asina como garantizar la so seguranza. Popularmente, ye más conocíu como Policía Nacional, nome que se-y da tamién al so personal, y que pasó a ser oficial nel 2015, xunto col orixinal. Les sos sigles, CNP.

 

     Nel intre la moneda apaez l’escudu de la fuercia policial. Riba, la lleenda POLICIA NACIONAL xunto colos años de la efeméride y el d’acuñación 1824-2024. Debaxo, el nome del país emisor ESPAÑA y la marca de la ceca.

     Nel aniellu esterior les doce estrelles de la Xunión Europea.

 

Fontes: Wikipedia: Cuerpo Nacional de Policía (castellán)

              Numismática Visual (castellán)

              Na web de la policía: www.policia.es/_es/tupolicia_bicentenario.php