2021: Serie Rexones Etnográfiques Lituanes: Dzūkija

 

Semeya: collectorcoin

Motivu conmemorativu: Rexones etnográfiques de Lituania: Dzūkija 

Volume d’emisión: 500.000         Fecha d’emisión: 9 setiembre

     Recordatoriu: Lituania apúntase tamién a la bona idega d’homenaxear les sos rexones como anda faciendo Alemaña o la so vecina Letonia. Ensin embargu, el casu lituanu tién daqué especial, ya que les llendes d’estes rexones ye de lo más impreciso; nun conformen unidaes alministratives nin polítiques al estilu de, por exemplu, les Comunidaes Autónomes o les provincies del Estáu español, sinon que se rixen por aspeutos históricos y etnográficos del tipu tradiciones, estilu de vida local, cancioneru, cuentos ya inclusu la fala del territoriu (ésta última non tan rigurosa).

     Hai cinco rexones lituanes, poro, vamos ver cinco monedes conmemoratives del fechu.

 

     Tres les rexones de Žemaitija y Aukštaitija, la tercer rexón homenaxeá ye la de Dzūkija o Dainava, que vién a significar País de los cancios. Asítiase al sudeste del país y entra tamién, como rexón cultural, en territorios de Bielorrusia y Polonia. La so fala ye nomada dzūkian,  y ye considerada pol Estáu lituanu como un dialéutu. La so capital ye Alytus, y eso que dientro les sos llendes asítiase Vilnius, la capital de Lituania.

 

     Nel intre apaez l’escudu identificativu de la rexón, un caballeru con alabarda y escudu llindiáu por dos lliones en pie; fina con una estola y la lleenda EX GENTE BELICOSISSIMA POPULUS LABORIOSUS (D’una tribu perbelicosa, (sal) xente llaborioso). Riba, el nome del país emisor LIETUVA y l’añu emisión 2021; baxo, el nome de la rexón homenaxeá DZŪKIJA y la marca de la ceca. El diseñu ye de Rolandas Rimkūnas.

     Nel aniellu esterior, les doce estrelles de la Xunión europea.

 

     Fontes: Wikipedia: Dzūkija (inglés)

                  BCE. El euro (castellán)

                  Numismática visual (castellán)