2021: Héroes de la pandemia

 

Semeya: collectorcoin

Motivu conmemorativu: A los héroes de la pandemia COVID-19

Tirada: 60.000           Fecha d’emisión: 2 d’agostu

     Malta, a semeyanza d’Italia,  apúntase tamién al reconocimientu de los sos sanitarios de primer llínia frente al COVID-19. Los personaxes grabaos na moneda son reales; trátense de les enfermeres malteses,  Doreen Zammit y Charmaine Cauchi, vestíes colos sos correspondientes equipos de proteición, dándose un abrazu de sofitu (y de xuru que rezando) enantes de tratar a pacientes con coronavirus nel Hospital Mater Dei de Malta. La semeya foi tomada pola so compañera Diane Faenza, cola idega de rescamplar el momentu d’estrés, miéu y coraxe ente los trabayaores sanitarios ante una enfermedá desconocía y nel momentu más duru de la primer fola de la pandemia.

 

 

 

   El 29 xunetu, el Bancu Central de Malta, de la man del so Gobernador, Edward Scicluna, entregó una d’estes monedes al Viceprimer Ministru y Ministru de Salú maltés, Chris Fearne, en nome de los profesionales médicos. Tamién a les tres enfermeres protagonistes.

     Nel intre la moneda, apaez l’abrazu de les dos enfermeres. Enriba d’elles, la lleenda HEROES OF THE PANDEMIC, y enbaxo, el nome del país emisor y l’añu d’acuñación MALTA 2021. A mandrecha apaecen les iniciales de la diseñadora y grabadora Maria Anna Frisone (MAF).

     Nel aniellu esterior les doce estrelles de la Xunión Europea.

     Esta moneda solo va salir en calidá BU en coincard, poro, nun va circular. N’estienllaz podéis ver el diseñu de la tarxeta, obra del artista Melvin Bugeja y que tamién ye bien guapu, asina como’l murial de Justin Bonnici, nel que ta basáu.

     Fonte: Numismática visual (castellán)

                 Bancu Central de Malta (inglés) 

                 Newsbook.com.mt (inglés)

                 bay.com.mt (inglés)