 |
| Semeya: collectorcoins |
Motivu conmemorativu: Bicentenariu de la Revolución griega
Volume d’emisión: 1.500.000 Fecha d’emisión: Abril
Nel añu 1453 cayía Constantinopla en manes otomanes (turcos) y frayávase asina la hestoria del que entá yera conocíu como Imperiu Romanu d’Oriente o Bizanciu. Los alzamientos escontra’l nuevu amu foron contínuos a lo llargo casi 400 años, pero toos de baldre. Habría d’esperar al entamu del sieglu XIX y a l’asimilación de les idées revolucionaries que circulaben per Europa, gracies, sobremanera, a la Revolución francesa, pa que nos griegos despertare un proyeutu propiu bien rebollicáu de nacionalismu. Poro, ente 1821 y 1830 asoceda la conocía como Guerra d’Independencia o Revolución griega escontra el so opresor, l’Imperiu Otomanu. De man les coses nun escomencipiaron perbien pa los griegos, toa revuelta yera aplachá polos turcos, hasta que les potencies europées decidieron entrar nel conflictu, principalmente pola estremada violencia emplegada por turcos y exipcios nel territoriu griegu (creo que toos conocemos daqué d’esi odiu turcu-griegu qu’inda pue vese na islla de Xipre). Guerra ente potencies mundiales (Gran Bretaña, Francia y Rusia per un lláu; l’Imperiu otomanu y los sos países vasallos del Mediterráneu pel otru), guerres intestines ente facciones griegues, asesinatos de políticos… a la fin Grecia algamó la so Independencia en 1830, pero baxo control de les potencies ganadores qu’impuxeron un rei bábaru (Otón I) y fixeron roblar a los independentistes un tratáu en 1832 coles llendes del país bien amenorgaes, en comparanza cola so suañada Hélade cosa que, por ciertu, nun –yos prestó un res.
Nel intre la moneda apaez la bandera griega llindiá por unes cañes de lloréu. So la bandera apaez la robla del diseñador Georgios Stamatopoulos y más abaxo, la marca de la ceca. Alredor, los años de la feméride 1821-2021 (esti caberu, tamién ye l’añu acuñación) y la lleenda 200 XPONIA AΠO THN ΕΛΛΗΝΙΚΗ EΠANAΣTAΣH (200 años de la Revolución griega) y el nome del país emisor ΕΛΛΗΝΙΚΗ ΔΗΜΟΚΡΑΤΙΑ (República Helena).
Nel aniellu esterior, les doce estrelles de la Xunión europea.
Fontes: Wikipedia. Guerra d’Independencia de Grecia
Numismática visual (castellán)
No hay comentarios:
Publicar un comentario