Un percorríu pel numberariu d'Isabel II (6/6)

Numberariu de Les Islles Filipines

     La unidá monetaria pa les provincies d'ultramar yera’l pesu, que se dixebraba en 100 centavos siguiendo’l patrón, ya asimiláu n’España, del sistema métricu y que caltenía la equivalencia pa cola metrópoli d’8 reales, alcordanza del vieyu y desaniciáu sistema del ya inesistente Imperiu.

     Nes Filipines nun esistía Casa de la Moneda, venía too de Méxicu, ya que la colonia asiática dependía del Virreinatu de Nueva España. Cola independencia de los territorios americanos, les autoridaes españoles tuvieron que tirar de les divises de los nuevos países y resellales en Manila. Ante la desconfianza de la llei y el pesu de les monedes, decidiose entós crear una ceca nes islles. El 19 marzu de 1861 inaugúrase la Casa de la Moneda de Manila cola autorización pa llaboriar monedes d’oru baxo la direición de la Casa de la Moneda de Madrid; dende esi mesmu añu entamaría l’acuñación. El permiso pa llabrar plata otorgose al añu siguiente, acuñándose numberariu de 10 y 20 centavos en 1864 y de 50 centavos de pesu en 1865. Los cuños foron diseñaos pol Grabador Xeneral de les Cases de la Moneda Españoles Luis Marchionni y fabricaos na Casa de la Moneda de Madrid. En Manila sedría el grabador José Gallardo del Pino l’encargáu de que los cuños llegaren en bon estáu y d’igualos en casu contrariu. Nun taba permitío qu’esti numberariu circulare pela metrópoli, yera esclusivu de les islles.

El cobre

     No referente al cobre, esiste poca información del so llugar de fechura. Díxose yá que nun esistió Casa de la Moneda en Filipines hasta 1861, y que les monedes emplegaes nel archipiélagu taben acuñaes en Méxicu (Nueva España); pero tamos falando de pieces acuñaes n’oru y plata; les monedes de cobre yeren trataes como puxarra nes provincies americanes, polo que nun tuvieron futuru ellí y foron desaniciaes; poro, nun ye lóxico que se fabricaren pal territoriu asiáticu. En dellos escritos aparez como más común qu’estes monedes foren acuñaes por dalgún taller, que non ceca, na China; básense en qu’esisten numberoses variantes d’estes monedes y que suelen venir con fallos ortográficos a causa del desconocimientu del alfabetu llatinu por parte los fabricantes. Seya o non, de la estaya d’Isabel II conócense monedes acuñaes ente 1834 y 1835 con valores d’1, 2 y 4 cuartos. Un real español equivalía a 4 cuartos filipinos. El tipu yera igual pa tolos valores: nel anversu vese un llión coronáu y agarrando una espada y con dos boles sol pechu que representen los hemisferios del mundu a semeyanza de los antiguos columnarios. Arródialu una gráfila de puntos que lu separa de la lleenda UTRAQ·UIRT·PROTEGO (dambos poderes pa protexer) y una F (posiblemente de Filipines), l’añu acuñación y la marca de la ceca de Manila, M^A. Nel reversu vién l’escudu de la monarquía hispánica con escusón de los Borbón coronáu y llindiáu pola lleenda YSAB·II·D·G·HISPA·ET IND·R· (Isabel II pola Gracia de Dios reina de Les Españes y Les Indies) y les desconocíes iniciales M·R· que dalgún estudiosu axunta al Governador Xeneral n’esos años, el Sr. Mariano Ricafort, ya que nun yera común nes ceques españoles grabar les siegles de ningún ensayador o fiel de balanza nes pieces de cobre.

1 cuartu (1835)

 

2 cuartos (1835)

 

4 cuartos (1835)

 

Marca de la ceca Manila

La plata: Céntimos de Pesu

     Ente 1864 y 1868 acuñáronse los centavos de plata a semeyanza de los reales españoles. Nel anversu, la reina Isabel con corona lloréu arrodiada pola lleenda ISABEL 2ª POR LA G. DE DIOS Y LA CONST. col añu d’acuñación. Nel cuellu aparecen les iniciales del diseñador Luis Marchionni, L. M. El reversu, camuda según el valor de la moneda. No que se refier al diseñu, ye’l mesmu que pa los reales de plata del reaxuste de 1858 adautáu a les islles: el típicu escudu hispánicu con escusón de los Borbón coronáu, lleenda REINA DE LAS ESPAÑAS y la marca de la ceca Manila, esta vez, una estrella de 5 puntes, emplégase nes pieces de 10 y 20 céntimos de pesu (10 C^S. DE P^O. y 20 C^S. DE P^O.) grabao a dambos dos llaos del escudu. El cantu ye estriáu.

 

10 céntimos

 20 céntimos

50 céntimos

 

L’oru

     Les monedes d’oru filipines acuñáronse ente 1861 y 1868 con valores d’1, 2 y 4 pesos. Al cambiu cola metrópoli, un pesu yera igual a 8 reales. Nel anversu vese a una reina d’estilu clásicu y arrodiada pol so títulu ISABEL 2ª POR LA G. DE DIOS Y LA CONST y l’añu d’acuñación. Tamién equí aparecen les sigles L.M. nel cuellu. Nel reversu aparez un escudu hispánicu con escudetu central de la familia Borbón y coronáu. N’esti casu va llindiáu poles Columnes d’Hércules cola vitola PLUS ULTRA. Complétase la lleenda col títulu de REINA DE LAS ESPAÑAS, la marca de la ceca por duplicao (estrella 5 puntes) y el nome de la colonia, FILIPINAS. El valor facial va identificáu pol numberal y la lletra P (1 P., 2 P. y 4 P.). El cantu ye estriáu.

 1 pesu

  

2 pesos

 4 pesos

Fontes:  

     Wikipedia. Isabel II (castellán) 

  

     ANTECEDENTES DEL SISTEMA MONETARIO DE LA PESETA. Dr. D. Javier de Santiago Fernández. Catedráticu d’Epigrafía y Numismática. Universidá Complutense de Madrid. (Castellán) 

     Isabel II y sus marcas de ceca. www. Numismáticodigital.com (Castellán) 

     Blog sobre Isabel II de Javier Martínez (Castellán)

     COMPETENCIA ENTRE MONEDAS:EJEMPLOS DEL SIGLO XIX – Joaquín Pérez Cano (Castellán)

     Las últimas de Filipinas. Rubio Santos, Enrique. Numisma.org. (castellán)