Cuartu numberariu 1865-1868
Tres los fracasos anteriores, entámase una
nueva reforma del numberariu de la man del Ministru de Facienda Pedro de
Salaverría, del gabinete de Alejandro Mon; n’esti casu va tomase como unidá de
cuenta al escudu con una equivalencia de 10 reales, lo que fexo que’l real
pasare a ser dixebriegu de la nueva divisa. Nel cuadru siguiente vemos un
resume de los nuevos metales y los sos valores:
A
partir d’equí empégase ya’l patrón del sistema decimal pa los pesos,
abandonando el tradicional de marcos y granos. Por supuestu y otra vez, el
referente ye’l francu francés.
El nuevu sistema y les nueves monedes,
pónense en furrulamientu a la par que nun s’anulen los anteriores, poro,
l’enguedeyu ente la población aumenta y a la hora facer los cambios ente
sistemes nun ye tan fácil pola constante fluctuación de los valores nos mercaos
internacionales (dende 1772 hasta 1864 sucediéronse nel Estáu español 7
sistemes monetarios distintos, polo que circulaben pel país 97 clases de
monedes ensin cuntar les estranxeres, principalmente franceses, pero tamién
italianes, ingleses y portugueses); cola suma del nuevu numberariu, el caos
yera tal que facía que la circulación de moneda per España fuere la más
heteroxénea y confusa de toa Europa. Mentantu, el restu países de la derrolada
aconceyaben na ya formada Xunidá Monetaria Llatina (1865) lliderá por Francia y
cola idega ya prematura d’atopar un sistema monetariu internacional.
Realmente esta cabera reforma isabelina
diba per bon camín averándose a eses idees europees del momentu, pero frayó
principalmente pola so escasa actuación na anulación del numberariu de los
sistemes anteriores, asina como los caberos problemes políticos que finaron
inclusu col reináu d’Isabel II. Hebo qu’esperar al Gobiernu Provisional formáu
tres la revolución nomada La Gloriosa,
pa que toos estos enguedeyos s’iguaren col nacimientu de la peseta como unidá
del nuevu sistema moneteariu (1869).
El cobre
En realidá ye bronce (cobre y estañu) con
cinc. L’anversu representa a una
reina d’estilu Victorianu mirando a
mandrecha arrodiada por una gráfila de puntos que l’aislla de la lleenda ISABEL II POR LA GRACIA DE DIOS
Y LA CONST, l’añu acuñación (1865-66) y la marca de la ceca con estrelles,
siendo estes les de Barcelona, Jubia, Madrid y Segovia. El reversu caltién un escudu hispánicu coronáu y posáu en lloréu,
arrodiáu por una gráfila puntos y la lleenda
REINA DE LAS ESPAÑAS y el valor de la pieza (MEDIO CENTIMO DE ESCUDO, 1 CENTIMO
DE ESCUDO, 2½ CENTIMO DE ESCUDO o 5 ESCUDOS) xunto cola marca de la
ceca.
Les marques de ceca van ser toes con
estrelles; Madrid estrella con 6 puntes, Barcelona con 8 y Sevilla con 7. Les
novedaes son Segovia, a la que-y quiten l’acueductu pa suplilu por una estrella
3 puntes y Xubia con una de 4.
Detalle de les nueves marques de les ceques de Segovia y Xubia
Mediu céntimu (ceques de Barcelona y Madrid)
1 céntimu (ceques de Barcelona, Madrid, Segovia y Xubia
2 ½ céntimu (ceques de Barcelona, Madrid y Xubia)
5 céntimos (ceques de Barcelona, Madrid, Segovia y Xubia
Esiste una segunda variante d’estes acuñaciones, batida
ente 1866 y 1868 que nun difieren de les anteriores non más que por l’aparición
de les sigles OM nel reversu, embaxo l’escudu y propies de la firma belga
Oeschger, Mesdach y Cía, encargada de la so fabricación. De magar, les monedes
acuñáronse nes ceques españoles de Barcelona, Xubia, Madrid, Segovia y Sevilla,
identificaes poles ya conocíes estrelles.
 |
| OM sol escudu real n'estos 5 céntimos |
La plata
Pue decise que nel numberariu de plata esisten unes hermanes menores, identificaes col valor en céntimos d’escudu, y
una mayor identificada pol valor de 2
escudos. Dixébrense tamién pola so aleación o conteníu en plata, mientres que
los céntimos lleven una pureza de 810 milésimes, la de 2 escudos algama les 900
milésimes. Ensin embargu, el tipu ye’l mesmu, un anversu de bustu clásicu y la lleenda
ISABEL 2ª POR LA G. DE DIOS Y LA CONST. y l’añu d’acuñación (ente 1865 y 1867).
El reversu lleva un escudu hispánicu
coronáu y la lleenda REINA DE LAS
ESPAÑAS col valor de la pieza (10 CENTS DE ESCO, 20 CENTS
DE ESCO, 40 CENTS DE ESCO y 2 ESCUDOS) allendáu
poles marques de la ceca n’estrelles (Barcelona, Madrid y Sevilla).
10 céntimos (ceques de Madrid y Sevilla)
40 céntimos (ceques de Barcelona y Madrid)
2 escudos (ceca de Madrid)
Sí, en 1868 tamién s’acuñaron estes monedes, pero n’esti añu
introdiciose una novedá que diba a heredar la futura moneda nomada peseta y que
llegaría hasta les primeres acuñaciones del rei Xuan Carlos I (ente 1977 y
1982, añu esti de la serie conocía col nomatu de La del Mundial): l’añu d’acuñación aparecería identificáu con unos
númberos grabaos dientro les estrelles identificatives de la ceca nel reversu,
pasando l’añu qu’aparez nel anversu a ser l’indicativu del añu d’emisión, esto
ye, l’añu nel que se promulga la llei que permite batir moneda. Tan solo Madrid
acuñó n’esti añu, poro, lo que vamos ver son dos estrelles de 6 puntes
allendando’l valor de la pieza, onde la estrella de la izquierda incluyirá un 6
y la de la drecha un 8 (añu 68).
 |
| Dientro les estrelles, les dos caberes cifres del añu 1868 |
L’oru
L’acuñación n’oru siguió siendo bayurosa debío a la baxa del so valor
frente a la plata. No que se refier al tipu, ye continuista del de 1863, anversu del bustu
real clásicu cola lleenda ISABEL 2ª
POR LA G. DE DIOS Y LA CONST. y l’añu d’cuñación (ente 1865 y 1867) y reversu con escudu de la monarquía
hispánica y escusón de los Borbón nel centru y arriquecíu con una corona real,
el collar del Toisón y acoyío too nun mantu y llindiao pola lleenda REINA DE LAS ESPAÑAS y el valor facial coles marques de les
ceques de Madrid y Sevilla (les estrelles). N’esti casu los valores vienen
reflexaos n’escudos (2 ES, 4 ES y 10 ES).
2 escudos (ceca de Madrid)
4 escudos (Madrid y Sevilla)
10 escudos (Madrid y Sevilla)
Lo mesmo que con la plata, en 1868 l’añu d’acuñación vién
grabáu dientro les estrelles de la ceca de Madrid, un 6 y un 8. Esiste una
rareza, una moneda de 10 escudos con un 7 y un 3 grabaos nes estrelles.
Fontes:
Wikipedia. Isabel II (castellán)
ANTECEDENTES DEL SISTEMA MONETARIO DE LA PESETA. Dr. D. Javier de Santiago Fernández. Catedráticu
d’Epigrafía y Numismática. Universidá Complutense de Madrid. (Castellán)
Isabel II y sus marcas de ceca. www. Numismáticodigital.com (Castellán)
Blog sobre Isabel II de Javier
Martínez (Castellán)
COMPETENCIA ENTRE MONEDAS:EJEMPLOS DEL SIGLO XIX – Joaquín Pérez Cano (Castellán)
No hay comentarios:
Publicar un comentario