Segundu numberariu 1849-1854
A partir de 1838 van crease delles comisiones pa iguar el problema del numberariu español. Del vieyu sistema colonial hispanu había que pasar al puxante sistema métricu que diba afitándose per toa Europa. Ya’l nuesu paisanu, el Conde de Toreno, intentó delles reformes allá pel 1834, pero como que les coses taben bien enguedeyaes. El resultáu foi que percorría pel país un escesu de moneda estranxero, principalmente francés, lo que orixinaba una escesiva dependencia del país vecín no referente a los altibaxos de la economía.
Les monedes de la reforma de 1848
En
1847 el Marqués de Salamanca fexo’l primer intentu d’implantar el sistema
decimal na ordenación monetaria, pero frayó pola cayía del Gobiernu del momentu
y la fuerte oposición al so intentu de devaluar la moneda hispana. Durante’l
Gobiernu de Narváez, y siendo’l so Ministru de Facienda Manuel Beltrán de Lis,
decretose en 1848 que la unidá de cuenta diba ser el real de plata, axustándose
en llei y valores al francu francés. Al ser decimal, un real equivaldría a 10
décimes. Ye n’esti momentu, onde –y vamos decir alón al maravedí como moneda y
como unidá de cuenta del sistema hispánicu, anque seguríense acuñando, como
toes les del sistema anterior y emplegándose na praútica. Esta ye la tabla
coles nueves monedes:
Cobre: Les décimes de real
Desaparez el maravedí como submúltiplu
(anque nun se dexe d’acuñar) y el real, como unidá de cuenta, dixébrase en 10
décimes (igual a 34 maravedinos). El diseñu de la moneda tipu va a ser el mesmu
pa tolos valores, camudando namás que’l valor facial de la moneda, l’añu
acuñación y la marca de la ceca. detacar dos cosines: nun aparez la efixe de la
reina, sinon l’escudu real hispánicu y, entama a grabase REINA y non REYNA.
Tolos diseños foron grabaos por Remigio Vega.
 |
| Mediu real DG n’anversu |
Hay un primer diseñu col valor de mediu
real fechu en Madrid que parez ser una suerte de preba (dafechu, esisten tres
variantes madrilanes col añu d’acuñación de 1848). Nel so anversu aparez un escudu hispánicu borbónicu coronáu y engalanáu
con una especie de mantu floríu cola lleenda ISABEL SEGUNDA, dos estrelles de 6
puntes y la marca D.G. (Departamentu de Grabáu). Nel reversu aparez centráu’l valor de la pieza MEDIO REAL con cañines
de lloréu y coronáu con una especie d’españíu a mou de flor con una estrella 6
puntes nel intre y que corta la lleenda REINA DE LAS ESPAÑAS. Aparez tamién
l’añu d’acuñación 1848. El cantu ye
llisu.
 |
| Mediu real DG nel reversu |
La segunda moneda madrilana ya torna a les
lleendes comunes del anterior sistema, un anversu
col escudu llindiáu pola lleenda ISABEL 2ª POR LA G. DE DIOS y una estrella 6
puntes y un reversu cola lleenda Y
LA CONST. REINA DE LAS ESPAÑAS col añu acuñación ente dos estrelles de 6 puntes
separaos del valor facial de MEDIO REAL CINCO DECIMAS. por un cordoncín que
fina na marca D.G.
 |
Mediu real M
|
La tercer variante camuda les iniciales
D.G. pola M como marca de ceca de Madrid.
Dexando de llau la particularidá
madrilana, el diseñu de la moneda tipu va a ser el mesmu pa tolos valores,
camudando namás que’l valor facial de la moneda, l’añu acuñación y la marca de la
ceca. Nel anversu aparez un escudu
de la monarquía hispánica con escusón central de la Casa de Borbón y corona
real. Retomen de nuevu el títulu d’ISABEL 2ª POR LA GRACIA DE DIOS. Nel reversu resuelven la lleenda del títulu:
Y LA CONST. REINA DE LAS ESPAÑAS y l’añu d’acuñación. Nel centru figura’l valor
de la moneda con una corona lloréu y la marca de la ceca nuna llende floral El cantu ye llisu.
La media
décima de real, la décima de
real y la doble décima de
real acuñáronse solamente na ceca de Segovia ente los años 1850 y 1853.
Media décima de real
Décima de real
Doble décima de real
Los medios
reales, aparte de los de Madrid, tamién foron acuñaos en Segovia y Xubia.
Les marques de diches ceques
identifíquense del mou ya conocíu: l’acueductu pa Segovia y les iniciales de la
ciudá pa Xubia y Madrid (que tamién s’identifica coles iniciales D.G.)
Los reales de plata
La perda de la mayor parte de les colonies
americanes amenorgó l’ingresu de plata nes ceques españoles. Aparte,
aparecieron nueves vetes d’oru n’importantes zones de California y Australia,
lo que fexo que baxare’l preciu del oru y xubiere’l de la plata. Les mines en
tarrén peninsular nun yeren a xuplir la falta material. A too esto hai que
suma-y que les monedes hispániques calteníen mayor cantidá de plata que les
franceses, polo que’l cambiu d’un real a un francu nun yera, no que se refier
al material emplegáu, xustu. Ello fexo que los extranxeros colaren d’españa con
reales, los fundieren y los tresformaren en francos franceses que tornaben de nuevu
a la circulación incluyíu’l territoriu español.
Otra vegada más sedrá la moneda de 20 reales, como moneda
identitaria del numberariu, la que presente los nuevos cambios pal nuevu
sistema. Nel anversu vese’l bustu
d’una reina ya moza, dafechu, con 20 años y obra de Remigio Vega. Ye l’únicu
cambiu apreciativu, ya que’l resto’l diseñu empasta col del anterior sistema,
lleenda ensin abreviatures ISABEL 2ª POR LA GRACIA DE DIOS Y LA CONSTITUCIÓN y
l’añu d’acuñación, y reversu cola
lleenda REINA DE LAS ESPAÑAS llindiando l’escudu hispánicu borbónicu con
Toisón, el valor facial 20 RS y les marques de la ceca y los
ensayadores. Nel cantu lleemos DIOS
PATRIA REY. Foi acuñada nes ceques de Madrid y Sevilla en 1850. La
identificación de les ceques como siempres, les iniciales de la ciudá.
Ensin embargu esta moneda diba ufrir un
segundu cambiu más fondu y que diba condicionar el diseñu definitivu de la
serie de reales de plata. Remigio Vega retocó un pocu’l bustu la reina, apareciendo
nel anversu una xoven daqué
rellenina y con un peináu que l’avieya enforma (dicen los entendíos qu’esti
ye’l bustu que más va averáu a la fisonomía real de la reina, que al parecer
nun yera tan curiosa como nos queríen vender). Llíndiala la lleenda ISABEL 2ª
POR LA GRACIA DE DIOS Y LA CONST xunto col añu d’acuñación. Nel reversu resuelven la lleenda del
títulu: REINA DE LAS ESPAÑAS allendando un escudu hispánicu coronáu y el valor
facial de la pieza asina como la marca de la ceca.
Equí atopamos la novedá de que les ceques
ya nun s’identifiquen con símbolos o lletres, sinon con estrelles con delles
puntes que varíen en cantidá según la ceca que representen: nel casu d’estos
reales, les ceques y les identificaciones foron, Barcelona con estrella d’8
puntes; Madrid con 6 puntes y Sevilla con 7 puntes.
Les pieces de 20 y 10 reales dixebren un pocu de les otres al llevar
l’escudu la compaña de les Torres d’Hércules y la estola col llema PLUS ULTRA,
n’alcordanza del pasáu imperial. El valor facial lleese al completu 20 REALES,
10 REALES ente dos estrelles identificatives de la ceca. Foron acuñaes en
Barcelona, Madrid y Sevilla ente 1850 y 1856. Nel cantu lleemos LEY PATRIA REY.
20 reales. Barcelona, Madrid y
Sevilla
10 reales. Barcelona, Madrid y
Sevilla
El restu la serie, caltién el mesmu tipu, anque les
columnes y la estola súplense pol valor facial abreviáu 1 RL, 2
RS y 4 RS.
Les estrelles de la ceca tan sol escudu. Foron acuñaos en Barcelona, Madrid y
Sevilla ente 1852 y 1855. El cantu
ye estriáu.
1 real. Barcelona, Madrid y
Sevilla
2 reales. Barcelona, Madrid y
Sevilla
4 reales. Barcelona, Madrid y
Sevilla
La moneda d’oru. El Doblón.
La xuba del preciu la plata y el
descubrimiento de nuevos yacimientos d’oru en California y Australia fexo que’l
valor d’esti doráu metal cayere’n picao y qu’aparecieren monedes con valores
abultaos. N’esta estaya aparece en primer llugar el conocíu como Doblón d’Isabel, asina indicao
mesmamente na moneda. Nel anversu aparez
esa reina sana como un coral mirando a manzorga y arrodiada pola ya conocía lleenda ISABEL 2ª POR LA GRACIA DE DIOS
Y LA CONST. xunto col añu d’acuñación (foron acuñaos ente 1850 y 1851). El reversu vien col ya conocíu escudu
d’armes de Carlos III de los 80 reales coronáu y arrodiáu pol collar del Toisón
d’Oru, too ello llindiao pola leenda
REINA DE LAS ESPAÑAS. DOBLON DE 100 RS. Les ceques encargaes de
batiles foron les de Barcelona, Madrid y Sevilla, identificaes pola inicial.
Aparecen tamién les sigles del ensayador.
La segunda tirada, d’ente 1851 y 1855,
caltién l’anversu de la primera; nel
reversu desaparez el Toisón suplíu
por un marcu y unes plumbes. El valor de la pieza, 100 RS, va llindiáu
pola marca de la ceca, esta vez identificada con estrelles (Barcelona, Madrid y
Sevilla). Nun aparecen ensayadores.
Fontes:
Wikipedia. Isabel II (castellán)
ANTECEDENTES DEL SISTEMA MONETARIO DE LA PESETA. Dr. D. Javier de Santiago Fernández. Catedráticu
d’Epigrafía y Numismática. Universidá Complutense de Madrid. (Castellán)
Isabel II y sus marcas de ceca. www. Numismáticodigital.com (Castellán)
Blog sobre Isabel II de Javier
Martínez (Castellán)
COMPETENCIA ENTRE MONEDAS:EJEMPLOS DEL SIGLO XIX – Joaquín Pérez Cano (Castellán)
No hay comentarios:
Publicar un comentario