2017: Compañía de Carabineros

Motivu conmemorativu: 200 Aniversariu de la Compañía de Carabineros del Príncipe

Tirada: 15.000               Fecha d’emisión: 13 payares

     La Compagnie des Carabiniers du Prince foi formada en 1817 pol príncipe Honorato IV como proteición del principáu. El so antecedente hai que buscalu nos Papalins, ex-soldaos de los antiguos Estaos Pontificios llicenciaos tres la xuntanza d’Italia y acoyíos nel principáu como fuercia militar. Los carabineros d’anguañu conformen un piñu de 112 unidaes, dixebráu en 3 oficiales, 15 suboficiales y 94 soldaos. La defensa militar de Mónacu depende de Francia, lo que fai que, polo xeneral, los axentes sirvieren enantes nel exércitu francés. El so primer trabayu ye la defensa del príncipe como del so palaciu, asitiáu na parte vieya de la capital, Mónacu –Ville. Tamién s’encarguen de la proteición de los miembros del poder xudicial y de les patrulles pela costa y sableres del país. 

     El Cambiu de Guardia nel palaciu ya ye un espectáculu turísticu. La guardia la conformen 2 oficiales y 8 carabineros y cámbiase tolos díes a les 12:00 del mediodía col previu anunciu por parte d’8 trompetistes, integrantes de la Banda de Música Militar (Fanfare) qu’apiña un total de 27 músicos.

     Nel intre la moneda aparecen un Papalin y un carabineru col Palaciu de Mónacu a les sos espaldes. No cimero, el nome del país emisor MÓNACO allendáu poles marques de la ceca de Pessac (Francia) y la del so direutor. Abaxo, los años 1817 (añu fundacional) y 2017 (añu tamién d’emisión) cola lleenda CARABINIERS DU PRINCE.

     Nel aniellu esterior les doce estrelles de la Xunión Europea.

Nota: Tan solo s’acuñaron monedes en calidá prueba, polo que’l preciu en mercáu d’una pieza ronda los 140 euros (más gastos d’unvíu).