Ajuntament de Sarroca

     Sarroca de Lleida ye un conceyu de la comarca del Segrià, la so principal actividá ye l’agricultura.

     Esti ye un casu daqué particular. L’ayuntamientu de la localidá nun emitió moneda propia, poro, foi’l Sindicat Rural Cooperatiu l’encargáu d’acuñar estes monedes. Ye por ello qu’aparezan grabaes nes monedes les siegles del sindicatu, S.R.C. (que curiosamente coincide n’orde coles consonantes del nome del pueblu).

     Son unes pieces bien rares de ver y con una bayura de valores acuñaos; en céntimos, aparecen valores de 5, 10, 15, 25, 50 y curiosamente, de 100, aunque too esto tién la so hestoria. Hai tamién una moneda d’1 peseta, que, por ciertu, ye la única qu’aparez identificada como tala con una P, ya que nos céntimos nun aparez ninguna lletra identificativa del submúltiplu en cuestión. El material emplegáu pa los sos cospeles foi’l zinc, aunque hailes tamién feches en lata. 

     

Detalle reversu

Toles monedes son bracteaes, esto ye, que son perfines, polo que al acuñales pel anversu aparecen abultiaes pel reversu, poro, son tamién unifaces a al fuercia. Otru detalle a destacar ye que toes son del mesmu módulu y lleven la mesma lleenda.

     Estes son les monedes tipu orixinales y, a partir d’equí, cuntamos la hestoria:

5 céntimos

10 céntimos

15 céntimos

25 céntimos

1 peseta

     Esiste una piza con valor 50 (céntimos). En realidá ye una modificación d’una pieza de 5 céntimos a la que se contramarcó con un 0 a la so manzorga; a la mandrecha se-y ve un furacu de 2 mm, polo que lleemos .50 (50 céntimos).

     Hai otra pieza, inda más rara, de 50 céntimos; n’esti casu a la pieza de 5 se-y contramarca con un 0 a manzorga y un circulín a mou de coma; a mandrecha lleva otru 0. Dellos numismáticos la consideren un error y non una moneda tipu, aunque bien podría catalogase como una variante.

     La estraña moneda de 100 céntimos ye simplemente una modificación de la de 15, a la que se-y añadieron dos ceros, ún d’ellos enrriba’l 5. Daquién quier ver en esta modificación l’emplegu d’estes monedes, ya de por sí con un valor atípicu, un intentu d’ampliar la cantidá de pieces con valor d’una peseta y, enantes de borrar el 5 (ya sabemos eso de la picaresca…) troquela-y dos ceros a mou indicativu y certeru, de que 100 céntimos equivalen a 1 peseta.

     Si son monedes o son fiches yo ya lo dexo al repunantín de turnu. Lo cierto ye que foron emplegaes como monedes y asina vienen reflexaes nel Catálogo de las monedas obsidionales emitidas en Cataluña durante la Guerra Civil (1936-1939) del autor Leocadio de Olabarria García-Rivero de 1973.

Fontes: Monedas durante la II República y La Guerra Civil Española (1931-1939). Javier Ovelleiro

              Imperio Numismático. (Foru numismáticu)