Moneda de necesidá na Guerra Civil (1936-1939)

          Entamada la Guerra Civil y ante la imposibilidá del Gobiernu de la República d’abastecer al país con moneda de cursu llegal, delles comunidaes y conceyos decidieron emitir la so propia moneda hasta poder canxeala por pesetes del Estáu.

     El bandu rebelde fexo lo mesmo en dellos conceyos andaluces ocupaos, ante la imposibilidá d’emplegar moneda del Bancu de Burgos (el bancu de Franco).

     La verdá ye que’l campu les Monedes de necesidá ye perbayurosu, podría facese un blog solo d’elles, polo qu’equí voi llimitame a les emisiones acuñáes por dellos Conseyos o Gobiernos y dellos Conceyos, básicamente los que salen espublizaos nos catálogos de moneda española típicos.

     Munches fabriques y comercios tamién emitieron moneda de necesidá, pero na so mayor parte yeren meros vales canxeables emplegaos dientro les propies instalaciones del emisor, poro, yo nun voi meteles equí, pol momentu.

     Debío a lo rudimentario de la so fabricación y la so escasa emisión, estes monedes algamen delles vegaes un altu valor nel mercáu numismáticu, poro, delles colleiciones suelen ser prohibitives pa los nuesos bolsiellos. Aparte, tamién debemos de tener cuidao coles falsificaciones, tan bayuroses n’estes emisiones.

Les monedes de los Gobiernos y Conseyos rexonales republicanos

     Tres l’españíu de la guerra, el bandu subleváu pudo asislar delles zones republicanes d’otres. Esti foi’l casu de la zona norte, onde rexones como Asturies, Santander y Euskadi, xunto con dellos conceyos de Llión, Palencia y Burgos, lleales a la República, quedaron aislaes del centru (Madrid) y este (Aragón) polo que los sos respeutivos gobiernos tovieron que buscase la vida p’abastecer a la población de tolo necesario, incluyía l’acuñación de monedes. Nesti grupu aparecen los siguientes Gobiernos o Conseyos:

          - Gobiernu d’Euzkadi / Gobierno de Euzkadi

          - Conseyu / Consejo de Santander, Palencia y Burgos

          - Conseyu Soberanu d’Asturies y Llión / Consejo Soberano de Asturias y León

     Dientro d’esti grupu tamién los Consejos Municipales de Menorca, ya que a pesar de ser en realidá una mancomunidá de conceyos, bien ye cierto qu’abarcó tolos conceyos de la islla de Menorca, a la fin, única islla balear lleal a la República.

          -Conseyos / Consejos Municipales de Menorca

Los conceyos llevantinos y catalanes

     Na provincia d’Alacant asitiase’l Conceyu d’Ibi, únicu na Comunidá del País Valenciá n’acuñar moneda propia, quicias porque’l Gobiernu de la República asitiare la maquinaria de la Fábrica de Moneda de Madrid en Castellón, lo que facilitó que per esta zona circulare moneda llegal del estáu.

          - Conseyu d’Ibi / Consejo Municipal de Ibi

     Catalunya foi otra hestoria; a pesar de la prosimidá de Castellón, la Generalitat decidió emitir la so propia moneda en base a un decretu fecháu’l 21 de setiembre de 1936 nel que s’incluyía la intervención de les delegaciones del Bancu d’España y el Ministeriu de Facienda en Catalunya, asina como l’atropamientu de los almacenes de plata y divises. P’axilizar la salida de la nueva divisa, la Generalitat dixebró la maniobra de les acuñaciones en tres estayes: los conceyos s’encargaríen de los valores menores, dende los céntimos hasta la moneda con valor de 2 pesetes; la Generalitat encargaríase de los valores ente 2,50 y 10 pesetes, emitios principalmente en billetes, y los valores mayores dábalos por cubiertos colos billetes ya emitios pol Bancu d’España.

     Los conceyos catalanes qu’emitieron moneda propia na provincia Barcelona foron:

          - Consell Municipal d’Arenys de Mar

          - Ajuntament de L’Ametlla del Vallés

     Na provincia Tarragona:

          - Consell Municipal de Segarra Gaià
          - Ajuntament de Gratallops

          - Ajuntament de Nulles

Na provincia Lleida:

          - Ajuntament de Sarroca de Lleida

Na provincia Girona:

          - Ajuntament d’Olot

    

Les monedes del bandu rebelde

     La negativa a emplegar moneda de la República y la falta de suministru por parte del Bancu de Burgos, fexo que’n dellos conceyos acuñaren moneda propia a semeyanza de la zona republicana. Dafechu, dellos comercios en territoriu rebelde tamién acuñaron les sos propies fiches-monedes. En realidá foron non más que cinco conceyos sevillanos los que crearon la so propia ceca:

     - Conceyu / Ayuntamiento de Arahal

     - Conceyu / Ayuntamiento de Cazalla de la Sierra

     - Conceyu / Ayuntamiento de Lora del Rio

     - Conceyu/ Ayuntamiento de Marchena

     - Conceyu / Ayuntamiento de La Puebla de Cazalla

¡Cuidao, falsificaciones!

     Ya diximos que debío a lo cenciello de la so fabricación, esisten falsificaciones a magüeyu. Pero ye que tamién esisten colleiciones de monedes que supuestamente foron emitíes por dalgún conceyu andaluz durante esti periodu bélicu y que’n realidá son emisiones posteriores a la guerra cola fin d’abusar de los colleicionistes imprudentes. Tamién ye verdá que delles d’estes falsificaciones foron catalogaes como verdaderes por dalgún especialista… polo que ya digo que cuidáu con esti tipu de colleiciones. Dalgunes d’estes supuestes ceques son:

-       Conceyu / Ayuntamiento de Moguer (Huelva)

-       Conceyu / Ayuntamiento de Trebujena (Cádiz)

-       Conceyu /Ayuntamiento de Xàbia / Jávea (Alacant)