Bulgaria (República)

 Enllaz: 2 euros conmemorativos búlgaros

 

Primer serie (2026- )

     El primeru de xineru de 2026 pónse en circulación l’euru na República de Bulgaria. La nueva divisa, cohabitará cola anterior, la leva, durante’l mes de xineru pa que la población se familiarize con ella. No referente a los diseños, les autoridaes búlgares nun s’esmolecieron un res n ser innovaores, cenciellamente, garraron los diseños de l’anterior divisa y los asemeyaron a la nueva, poro, los ciudadanos búlgaros verán diseños conocíos, anque tendrán de tener curiáu, ya que les ya antígües monedes de leves, les de mayor valor, tamién son bimetáliques y puen confundise, de nun ser pol tamañu (les pieces de la leva son un pocu más grandes que los euros).

 

Comparativa ente les monedes d’euru y les leves

     Bulgaria tién la so propia Casa de la Moneda o Ceca (Монетен двор, Moneten dvor) asitiada en Sofía. Los diseños escoyíos son de tres tipos, ún común pa toles monedes de céntimos, un segundu pa la pieza d’euru y un terceru pa la de dos euros. Como nota a detacar, na cara nacional apaecerán les lleendes escrites n’alfabetu cirílicu, como nel cantu la moneda de dos euros. Ensin marca ceca. L’añu grabáu ye’l d’emisión. Identificación del país, el so nome popular na llingua nacional.

 

1, 2, 5, 10, 20 y 50 céntimos

     Les monedes de 1, 2, 5, 10, 20 y 50 céntimos retraten al Xinete de Madara, sacáu d’un relieve grabáu nun cantil, datáu pol 710 y declaráu Patrimoniu de la Humanidá en 1979. N’él vese a un xinete espetándo-y una llanza a un llión (nel grabau orixinal apaecen tamién un aigla esnalando y un perru, obviaos na moneda por falta espaciu). El diseñu arrodiase coles 12 estrelles de la Xunión europea. Les lleendes apaecies nes monedes son l’añu emisión, el nome del país emisor, БЪЛГАРИЯ (Bulgaria) y el so identificativu como céntimos, siendo стотинка pa un céntimu y стотинки pal restu. Ye’l mesmu diseñu qu’apaecía nos céntimos de leves.

    

1 y 2 euros 

 

     Pa la moneda d’1 euru optose por grabar la figura de San Ivan (o Xuan) de Rila, monxu ermitañu del períodu altu-medieval (IX-X) y que se fexo famosu na época poles sos curaciones milagroses. El so ricu legáu caló na base cultural cristiana del país. Como lleendes, l’añu emisión, el nome del país emisor, БЪЛГАРИЯ (Bulgaria) y el so identificativu como euru (евро). El diseñu va llindiáu poles estrelles de la Xunión Europea y ye un calcu de la moneda d’una leva.

 

 

    Pa la moneda de 2 euros optose por grabar el bustu de Paisii Hilendarski, clérigu del sieglu XVI, autor de la primer historia de Bulgaria y referente del Renacimientu búlgaru; pura identidá nacional del país. Como lleendes, l’añu emisión, el nome del país emisor, БЪЛГАРИЯ (Bulgaria) y el so identificativu como euru (евро). El diseñu va llindiáu poles estrelles de la Xunión Europea y ye un calcu de la moneda de dos leves.

 

  

     Nel cantu de les monedes de dos euros, va grabáu el lema nacional БОЖЕ ПАЗИ БЪЛГАРИЯ (Dios protexe a Bulgaria) por dos vegaes, una delles invertía.

 

Enllaz: 2 euros conmemorativos búlgaros

 

Fontes: 

 

BCE: Primeru Xineru del 2026. Entrada de Bulgaria na zona euru

WIKIPEDIA. Monedas de euro de Bulgaria (castellán)

CAIXABANK.COM. Bulgaria se incorpora al euro. Monedas

NUMISMATICA VISUAL. Diseño de los euros búlgaros. Starter kits de monedas

БНБ (BNB Radio Bulgaria en español). Primeru xineru, llegada del euru. Conseyos práuticos