Escelente de la Granada

      1492 ye un añu que marca un puntu d'inflexón na hestoria del reinu de Castiella. La toma del caberu reinu musulmán de la Península Ibérica, Granada y el descubrimientu de nueves tierres, el Nuevu Mundu, por parte del mariñán Cristóbal Colón, permiten l'espoxigue d'esti reinu convirtiéndolu na nueva potencia comercial y, futuramente, militar d'Europa. Pa ello, no que se refier a la tema monetaria, Castiella debería abandonar la so tradicional dependencia de la métrica árabe y axustar la so divisa, el castellán o escelente, a la mérica ponderal d'Europa, marcada pol ducáu venecián. Equí xugó un papel perimportante'l rei Fernandu V, ya que na so tierrina, Aragón, ya llevaben bien de tiempu axustando'l so numberariu a lo mandao nel continente. 

      Los Reis Católicos afronten una fondera reforma monetaria en Castiella, que quedaría plasmada na Pragmática de Medina del Campo en 1497. Tala reforma, afectaría a les acuñaciones de vellón, plata y oru. No referente a esti caberu metal noble, la so metroloxía diba tomar como referencia al ducáu aragonés, fabricándose con una talla de 65 pieces y 1/3 por marcu, esto ye, un pesu aprosimao de 3,50 gramos por pieza. La llei, d'unos 23 quilates y 3/4 (990 milésimes d'oru). La nueva moneda diba agora a ser reconocía col nome d'escelente en vez de castellán. 

     Pero había un problema, los castellanos acuñaos polos Católicos enantes de la pragmática, ya yeren conocíos pol nome d'escelentes, precisamente pa diferencialos de los castellanos emitíos en tiempos del rei Enrique IV, predecesor de la so hermana Isabel y que yeren de mayor pesu que los escudos. Pa diferenciar dambos escelentes, tomaron como referencia el nuevu añadíu al escudu real de Castiella y Llión, la granada, en referencia al nuevu reinu añadíu a la corona dominante na península. 

 

Detalle de la granada

 

     Gracies a esti detalle, los cambistes de divisa difernciaben al vieyu escelente, anterior a la Pragmática de 1497, del novedosu escelente de la granada, de igual llei, pero menor pesu y axustáu a la moda imperante n'Europa. D'esti tipu de la granada, acuñaríense medios escelentes y ún, dos (dobles), cuatro, diez, veinte y cincuenta escelentes.

 

Un escelente de la granada

     Finábase equí el pasáu medieval de Castiella y entamaba una moderna y emerxente vida que la convertiría na mayor potencia económica y comercial de la cristiandá y del mundu.