2023: Pietro Perugino

 

Semeya: collectorcoins

Motivu conmemorativu: 500 cabudañu de Pietro di Cristoforo Vanucci, “Perugino”

Volume d’emisión: 82.500         Fecha d’emisión: 20 xunu

 

     Pietro di Cristoforo Vanucci (1448-1523), conocíu pol nomatu de Perugino por ser oriundu de la rexón de La Perugia. Equí tuvo los sos primeros contautos cola pintura, gracies a la bayura artistes qu’habitaben la rexón y recibiendo influyencies de personaxes como Piero della Francesca. Ensin embargu, el so exposigue va entamase en Florencia, trabayando nel más famosu taller de xóvenes talentos de Andrea Verrocchio, y coincidiendo ellí con futuros mayestros como Da Vinci, Lippi y Botticelli. Ya como pintor autónomu, algamó fama tanto en Perugia como en Florencia, siendo llamáu a Roma pol papa Sistu IV y encargándose de pintar les parées de la Capiella Sistina xunto a un piñu grandes mayestros (nel 2019 el Vaticanu dedicó-y una moneda de dos euros pola so restauración). El so taller florentín nun paraba de recibir encargos añu tres añu, hasta que la entrada del nuevu sieglu traxo cambios d’estilu a los que nun pudo adautase, como otros grandes del momentu y finalmente foi superáu por otros artistes consolidaos como Da Vinci. Los sos caberos trabayos féxolos na so rexón natal, llugar onde morriere a causa de la peste. Detacar que’l so pupilu más famosu conocémoslu col nome de Rafael (y tamién cola so moneda conmemorativa nel 2020).

 

     Sanmarín tamién –y dedica a Perugio una moneda de dos euros esti añu 2023.

 

     Nel intre la moneda apaez el bustu del homenaxeáu xunto a un detalle de la so obra El bautismu de Cristo. So elli y baxo una greca, el so nomatu  y los años de la efeméride PERUGINO 1523-2023 (ésti caberu ye tamién el d’acuñación de la moneda). A mandrecha, la marca de la ceca R. Alredor, el nome del país emisor, CITTA’ DEL VATICANO. Baxo Cristo, la marca de la diseñadora Daniela Fusco (FUSCO) y nel hombru Perugino, la marca de la grabadora  Annalisa Masini (A.M. INC.)

 

 Nel aniellu esterior, les doce estrelles de la Xunión europea.

 

     Fontes: Wikipedia. Pietro Perugino (castellán)

                  Numismática visual (castellán)

                  Numista