2023: Josip Plemelj, matemáticu

 

Semeya: coindatabase

 

Motivu conmemorativu: 150 Aniversariu del nacimientu del matemáticu Josip Plemelj

Volume d’emisión: 1.000.000         Fecha d’emisión: 19 d’avientu

 

     Josip Plemelj (1873-1967) matemáticu eslovenu nacíu na población de Bled. De familia probe, quedó ensin pá a la edá d’un añu, pero so má trabayó enforma pa que pudiere dir a la escuela en Ljubljana. Detacó dende bien lluéu nes matemátiques, materia na que se centraría dende’l so ingresu na Universidá de Viena. Siguió la so formación en Berlín y algamó el títulu de profesor, trabayando nes universidaes de Viena y Chernivtsí (Ucrania). Tres la Primer Guerra Mundial, formó parte del grupu fundador de la Universidá de Ljubljana, siendo’l so primer rector. Dexó escrito gran cantidá de trabayos y estudios matemáticos, dafechu, desarrolló tres fórmules matemátiques qu’anguañu lleven el so nome.

 

     Nel intre la moneda apaecen una serie círculos lliniales y punteaos, onde s’acomoden númberos y lletres de les fórmules de Plemelj. Ente ello, el nome del homenaxeáu y el so añu nacencia, JOSIP PLEMELJ 1873. Debaxo, el nome del país emisor y l’añu emisión ESLOV ENIJA 2023. El diseñu de la moneda ye obra de Jasna Čuk Kolavčič

 

     Nel aniellu esterior, les doce estrelles de la Xunión europea.

 

Fontes: Wikipedia: Josip Plemelj (castellán)

              Numismática visual (castellán)

              Numista