Conozse
con esti nomatu a tou tipu de moneda que s’acuñó na localidá
d’Agramunt dende’l sieglu XIII y hasta’l XVII.
El
conceyu d’Agramunt ta asitiáu na comarca d’Urgell, na provincia
de Lleida, Catalunya. Foi conquistáu pol conde d’Urgell Armengol
IV allá pel 1076, pasando asina a formar parte del so territoriu. En
1163 Armengol VII otorgó-y la Carta Pola y en 1164 naz la ceca.
Hasta 1314 foi capital del condáu. Dafechu, Urgell foi ún de los
condaos más poderosos de Catalunya xunto col de Barcelona.
El
nomatu de moneda acrimontese (en castellán) provién del nome
llatinizáu: Acrimontis.
Nos catálogos catalanes vién nomada como moneda agramuntesa (o
tamién urgellesa, a pesar de que nel condáu tamién batien moneda
en Balaguer), nomatu qu’al parecer ya s’emplegaba en documentos
de la época.
La
creciente debilidá de los reis francos sobre los territorios de la
so Marca Hispánica, fexo que los condes de los territorios catalanes
algamaren ciertes cotes de poder autónomu. Ente les sos concesiones,
taba la posibilidá d’acuñar numberariu propiu, primero como una
cesión del propiu rei, pa ser llueu un drechu necesariu pola falta
pieces monetaries en circulación. Esti privilexu perduró ente los
condes catalanes inclusu cuando se fixó la xuntanza pa col Reinu
d’Aragón (los distintos reis asina lo diben corroborar).
Si
los condes abusaron de los reis, nun diba ser menos la Ilesia
catalana pa colos condes. Nel casu d’Urgell, el conde Armengol VIII
y la so esposa Doña Elvira, decidieron ceder en 1208 al monasteriu
del Poblet el famosu diezmu, tan de moda nel medievu, de tolo que
percibieren nel pueblu d’Agramunt y los sos territorios y pagao too
ello en moneda llabrada na ceca del pueblu. La validación de dicha
moneda foi confirmada pol rei Pedru II d’Aragón, que se
comprometió a nun camudar dicha moneda a la hora confirmar los
privilexos de la villa en 1209.
 |
| Segunda Dinastía |
Ye col rei Xaime I El
Conquistador cuando en
1234, a traviés d’una disposición, se regula’l valor de la
moneda acrimontese en relaición colos valores aragoneses ya
ilerdenses, manteniendo asina la vieya ceca condal, pero con unos
parámetros afitaos pola corona que permite circular el so numberariu
per tol reinu aragonés. Nun pensemos qu’estes maniobres reales
yeren cola sida d’afitar les ceques condales catalanes, non.
Realmente yera pa tolo contrario; a la corona aragonesa nun-y
prestaba un res que condes y obispos fixeren les sos propies
acuñaciones, non solo pola tema propagandística que-y robaben al
monarca, sinon tamién pola calidá, a lo menos dubiosa, de les
llabres llocales y la so equivalencia pa cola moneda real a la hora
circular pel país. Ye por ello polo que los reis entamaron a afitar
los valores de cambéu ente les monedes reales y condales, pero
tamién un primer pasu pa llueu dir desaniciándoles en favor d’una
xuntanza monetaria del estáu.
Diego
Monfar y Sorts (s. XVII) na so obra manuscrita sobre la historia de
los condes d’Urgell fala d’una moneda llabrada cola lleenda ERMC.
COM. ACRIMON. URGE (Armengol. Conde. Agramunt. Urgell) y el canónigu
D. Xaime Pascual, estudiosu numismáticu, fala n’una carta fechada
en 1801 d’una moneda de vellón probe cola lleenda ERMENGANDVS
COMES URGELLI de les qu’anguañu nun hai, de momentu, muestra
física.
El
Condáu d’Urgell tuvo tres dinastíes de condes. De la primer
dinastía, del 992 al 1231, nun atopé pieces nin semeyes de les
mesmes. Una dinastía na que tolos condes nómense Armengol (hasta
ocho) y una condesa, Aurenbiaix, cola que finó al nun tener
descendientes. De la segunda dinastía (1236-1314) ya hai más
información y semeyes, como esti diner de vellón de Ponce I
(1236-1243):
L’anversu
lleva una cruz de Malta con cuatro puntos allendada por una grafila y
la lleeenda COMES URGELI. El reversu ye un calláu de pastor con dos
cañines floreaes como alusión a la fertilidá del Condáu (según
Josef Salat). Alredor va el nome del conde PONCIVS. El so pesu anda
pelos 12 gramos.
 |
| Diner. Armengol X |
Entamando’l
sieglu XIV y ante l’amenaza real de perder la so ceca, el conde
Armengol X y l’obispu d’Urgell xunen fuercies pa emitir una nueva
cantidá de monedes acrimonteses (non en baldre, l’obispu recibía
un diezmu de les monedes acuñaes). El permiso de llabra facíase a
traviés d’un contratu d’arrendamientu. Esti tipu de contratos
yera de lo más común na época y el llugar; el so furrulamientu
yera bien cenciellu: el maestre o sociu industrial aceutaba l’encargu
condal, buscaba un sociu capitalista que-y punxera el metal pa la
llabra (plata o vellón) y una vez acuñao, cobraben los sos
estipendios y entregaben les pieces al emisor. Ya se sabe,
normalmente los condes y obispos nun cuntaben coles perres
suficientes pa tales empreses, polo que yera normal recurrir a esti
tipu de contratos y evitar prestamistes. Del añu 1303 ye un contratu
de sociedá ente Castellón de Sant Pere, Bernardo Oromir y Jaime de
Finestres nel que los dos primeros faen de socios capitalistes y el
terceru de maestre de la ceca.
Que’l
condáu d’Urgell taba bien consideráu pola corona aragonesa, queda
reflexao na intervención del rei Alfonsu IV, en 1332, anulando un
intentu del obispu urxelín d’introducir moneda barcelonesa na
villa de Sanahuja, onde emplegaben moneda urxelina dende hai bien de
tiempu (tamién ye verdá que n’esos años el rei aragonés facía
les funciones de conde al morrer la so muyer Teresa d’Entenza, que
yera la verdadera condesa y hasta que l’herederu, el futuru conde
Xaime I, fuere mayor d’edá)
 |
| Puguesa incusa |
Les
monedes más conocíes nel mundu numismáticu d’esta ceca catalana
son les del tipu de la semeya. Trátase d’una puguesa incusa. Esti
tipu de moneda foi común ente los años 1330 y 1500, coincidiendo ya
cola tercer dinastía (1314-1413). El monarca aragonés Alfonsu IV,
foi mui dau a premiar a los sos vasallos polos servicios emprestaos
col privilexu de llabrar moneda; la puguesa yera la más común,
d’escasu valor y barata de facer. Nos rexistros d’antanu aparecen
los nomes de Ramón Cortit d’Ager (1328) y Pedro Ferer d’Agramunt
(1331) como facultaos pa batir moneda puguesa n’Agramunt. El grabáu
de les monedes representa l’escudu de la villa, una flor de lis
enriba una montaña allendada pol axedrezáu identificativu del
Condáu d’Urgell. Foi más bien una moneda de tipu llocal (senyal
en catalán), pal emplegu ordinariu del pueblu nes sos transaccines
cotidianes debío al so escasu valor, 1/4 de diner, pero nun yera un
res raro que s’emplegare n’otros condaos, incluyios los de la
parte francesa, pues ellí taba’l so orixe (dafechu, una de les
suposiciones sobre l’orixe de la flor de lis de la puguesa
agramuntesa fala de la relación ente esta villa y la Casa
Principesca de Bearne; o bien esta familia francesa yera orixinaria
d’Agramunt, o bien teníen ellí propiedaes).
 |
| Tercer Dinastía |
Tornando
a Diego Monfar, Esti confirma monedes acuñaes por Doña Teresa,
primer condesa de la tercer dinastía. Marca dos tipos d’incuses,
feches de llatón y de 2 gramos de pesu; la primera, marcada coles
iniciales TE. COM. (Teresa Comitisa); y la segunda, TER. COM. Tamién
destaca l’aparición de una moneda coles barres aragoneses coronaes
nel anversu y nel reversu los escaques d’Urgell, fecha en cobre y
del tamañu d’un real catalán (Doña teresa yera la muyer del rei
Alfonsu IV d’Aragón).
Del
conde D. Pedro, nos diz que llabró moneda con anversu d’una cruz
de Malta y un puntu en cada brazu arodiao por una grafila y la
lleenda PETRVS:DEI:GRATIA y un reversu col so escudu y la lleenda
VICE-COMES AGERIS.
Josef
Salat, ensin embargu, reflexa dos monedes del tipu asemeyáu a les de
Ponce I. La primera lleva’l nome d’HERMENGANDVS con una pequeña
cruz nel reversu y, nel anversu, la gran cruz con puntos y la lleenda
COMES URGELI. De vellón y 12 gramos de pesu. Desconozse cuál de los
Armengol pudo ser, pero indica qu’al nun aparecer el DEI GRATIA
podríen ser el VII ó VIII, ya que d’aquella nun s’estiraba
dicha fórmula.
La
segunda ye de Pedru I (1347-1408) del mesmu tipu que l’anterior
pero col títulu PETRVS DEI GRATIA nel reversu y el COMES URGELI nel
anversu. De vellón y 13 gramos de pesu.
Esiste
constancia de que n’Agramunt inda se batía moneda nel sieglu XVII;
en 1626 el virrei de Catalunya quexábase al rei Feipe III de los
problemes qu’orixinaba la puxarra acuñao en delles ceques
incontrolaes del territoriu, ente elles ésta d’Urgell.
la
Guerra dels segadors
En
1640 Catalunya taba rexía por un virrei, el conde de Santa Coloma,
afín al valíu del rei hispanu Felipe IV, l’archifamosu
conde-duque d’Olivares. La guerra hispano-francesa centrose nel
tarrén catalán y ellí el conde-duque unvió tropes mercenaries y
castellanes que debíen ser abellugaes en dellos pueblos del norte.
Los abusos d’estos mercenarios pa cola población y les represalies
del virrei escontra los que se negaben a afayalos, fexo que los
segadores de Girona entamaren una brenga escontra los soldaos que
finó espardiéndose per toa Catalunya. Col asesinatu del virrei, la
Generalitat tomó’l mandu y como nun foi pa controlar la revuelta,
solicitó’l sofitu del rei de Francia Lluis XIII el cual cuntaba
con otru valíu bien conucíu, el cardenal Richelieu. De la etapa
francesa ye esti diner de bronce acuñáu en Agramunt en 1643:
Nel
anversu vese’l monte cola flor de lis y el nome de la ceca
ACRIMONTIS. Nel reversu hai una cruz
cola lleenda VIL-LA-16-43.
Ye fecha en bronce y el so pesu ronda los 0,77 gramos.
Fontes:
OMNI
Foro de numismática
Wikipedia:
Agramunt (Castellán)
Condáu d’Urgell (Castellán)
Armengol IV, Armengol VII, Ponce I, Pedro II (Castellán)
Moneda urgellesa (catalá)
TRATADO DE LAS MONEDAS LABRADAS EN EL PRINCIPADO DE CATALUÑA CON INSTRUMENTOS JUSTIFICATIVOS. POR EL DOCTOR DON JOSEF SALAT. Tomu I.
Añu de 1818 (onde podemos atopar les referncies de Diego Monfar Y el
so manuscritu sobre la historia de los condes d’Urgell, asina como
les cartes del canónigu D. Xaime Pascual). Castellán, catalá y
llatín.
SOCIEDAD IBEROAMERICANA DE ESTUDIOS NUMISMÁTICOS. NVMISMA. Añu XI, núnberos 48-53.
Xineru-avientu 1961, páxina 27: Los
oríxenes del drechu sobre amonedación en Catalunya y Aragón.
Lluis y Navas, Jaime (Castellán)
No hay comentarios:
Publicar un comentario