26/10/18

Les estayes del maravedí

      La vida d’esta moneda ye bien llonxeva; nació allá pel sieglu XII nos reinos de Llión, Castiella y Portugal y foi desmonetizada dafechu en 1848, durante’l reináu d’Isabel II. El so entamu foi gloriosu, ya que nació fechu d’oru. Col pasu del tiempu dexose d’acuñar, siendo sustituyíu por nueves monedes y pasó a ser moneda de cuenta, pa llueu,colos Reis Católicos, aparecer de nuevu como moneda de vellón (plata y cobre) y finar los sos díes como puxarra cobre. 700 años d’hestoria que bien merecen un bon reportaxe.

Orixe del numberariu d’oru hispanu-andalusí

      Los reis musulmanes peninsulares ya teníen un bayurosu historial d’acuñación de moneda dende la so entrada na Península Ibérica allá pel 711. Los árabes acuñaben dinars n’oru, dírhems en plata y felous en cobre. Mentantu, nos reinos cristianos recién nacíos afayábense principalmente col sistema del trueque, pero tamién con monedes de toa triba: romanes, visigodes, sueves, franques trayíes polos pelegrinos… y hasta les que –yos “requisaben” a los propios musulmanes nes sos razzies.

      Tres 300 años d’hexemonía musulmana na península, primeru como provincia del Califatu de Damascu y llueu como Califatu independiente de Córdoba, una guerra civil en tarrén andalusí fai que’l mesmu califatu cordobés desapareza dixebráu nuna duerna de pequeños reinos conocíos históricamente col nomatu de Reinos de Taifes. Esto fexo que’l Reinu cristianu de Llión pasare a ser el nuevu reinu hexemónicu de la península. Dafechu, sedría Alfonsu VI el que conquiste la Taifa de Toledo pa quedar definitivamente en manes cristianes.


Dinar d’Abd-al-Rahman III (321 H. / 933 d.C.)
 
      La primer moneda d’oru netamente peninsular foi l’acuñada pol Califa de Córdoba Abd-al-Rahman III (912-961) nomada tamién dinar y que foi asimilada polos sos sucesores, circuló peles primeres Taifes y foi aceutada polos morabithis (=Siervos d’Alá) conocios por nos como Almorávides, al ocupar tol al-Ándalus. 60 años de dominiu (del 1086 al 1146) d’esti grupu étnicu veníu del Magreb, dio pa muncho, inclusu pa facer los sos propios dinares y espardelos pela península, incluyíos los reinos cristianos.

Dinar almorávide d’Alí ibn Yúsuf (533 H. / 1138 d. C)
 
     Precisamente del so nome orixinal, morabithis, va a venir el nome de la futura moneda cristiana, morabetín (que col tiempu dirá camudando hasta’l más conocíu maravedí) debío a que’l dinar almorávide diba ser la divisa áurea peninsular, ya inclusu de parte d’Europa (l’imperiu carolinxu) pola so calidá y pureza. Tamién ye verdá que pa los cristianos cualisquier moneda andalusí d’oru, plata o cobre, yera un morabetí, pues yera como decir que venía de los mouros.


El morabetín castellán

      La mayor productora de monedes d’oru del momentu yera la Taifa de Murcia (la debilidá y decadencia de los Almorávides fai que renazan de nuevu estos pequeños reinos, periodu conocíu como de los Segundos reinos de Taifes) la cual surtía al reinu de Castiella gracies a les bones relaiciones ente los dos reis. La entrada na península de los Almohades (tres ocupar el territoriu almorávide del Magreb) nel 1145, fai que toles taifes caigan nel so poder, frayando esta bona relación nel 1172, añu en que Murcia ye invadida polos nuevos amos de al-Ándalus. Ello fai que los reis cristianos entamen cola so propia producción. Pa ello basáronse nel sistema métricu musulmán, ya que n’aquella estaya yera’l más fácil d’asimilar pa los reis cristianos occidentales (Llión, Castiella y Portugal) mentantu que los orientales (Navarra, Aragón y los Condaos Catalanes) caltuvieron el sistema del so llugar d’orixe, l’imperiu carolinxu.

Dinar/Morabetín d’Alfonsu VIII (1173-1183)
     El primer rei cristianu n’acuñar morabetinos d’oru foi Alfonsu VIII de Castiella (1155-1214). En 1173 punxo a furrular la ceca de Toledo, una veterana na llabra de numberariu y con unos trabayaores avenceyaos a la moneda árabe, de xuru que pola so procedencia mozárabe. Dafechu, la primer moneda Alfonsina ye una semeya de los dinares andalusíes; emplega pa grabar les lleendes l’alfabetu árabe de tipu cúficu y caltién l’añu acuñación según el calendariu de la Era Safar, emplegáu ésti polos andalusíes tanto na marca les monedes como nos escritos oficiales (ye probable que’l seutor alministrativu del califatu toviere copáu por xudíos sefardites, d’ehí l’emplegu d’esti calendariu). La única señal qu’indicaba que la moneda yera realmente cristiana, foi la inclusión d’una cruz n’una de les sos cares. Ye la primer vez tamién qu’una moneda cristiana ye datada con una fecha impresa (esceutu los dírhams qu’acuñare so güelu, Alfonsu VI, pero estos veníen fechaos col añu de la Hériga musulmana y non cola Era Hispánica o Safar).

      A partir de 1184, incluyó l’abreviatura del so nome con carauteres llatinos ALF, baxo la cruz. Y tamién aparez una estrella de 5 puntes nel reversu en tolos maravedinos que s’acuñaron tres la victoria cristiana de Las Navas de Tolosa (1212).

Morabetín d’Alfonsu VIII (1184-1218)
 
     Cierto ye tamién que, a pesar de tar escrito n’árabe, lo que trai escrito nun son referencies a Alá o Mahoma como nos dinares, sinon que son referencies cristianes:

     Anversu: No cimero del discu central, una cruz; no baxo, l’abreviatura ALF(d’Alfonsu). Lleenda central: El Príncipe de los cristianos/Alfonsu Ben (fiu de) Sanchu/Ayúdelu Dios y protéyalu. Lleenda alredor: Acuñose esti Dinar en Medina Talaitola (Toledo). Añu (Ex: dos y cincuenta y doscientos y mil; oseya, 1252) de la Era Safar (que ye 1214 nel calendariu gregorianu)

      Reversu: Lleenda central: L’imán de la Ilesia católica/El papa de Roma la grande. Lleenda alredor: Nel nome del Pá, del Fíu y del Espíritu Santu. Dios únicu, el que creya y seya bautizáu, salvarase.

     Vamos dexar equí unes aclaraciones pa enteranos un pocu:

      L’árabe cúficu ye un estilu d’escritura estendío per al-Ándalus. Ye l’estilu más vieyu de tolos arábigos y se identifica polos sos ángulos pronunciaos y esa sensación de ver lletres cuadriculaes, dándo-y un aire macizu al conxuntu. Ye por ello que una de les sos variantes, la xeométrica, seya la emplegada pa decorar azulexos ya inclusu parées de mezquites.

     No referente al calendariu, n’aquella época nun se rexíen pol calendariu gregorianu, que ye’l qu’emplegamos anguañu, sinon pol que los cristianos conocíen como calendariu de la Era Hispánica. L’añu cero d’esti calendariu equival al 38 enantes de Cristu del de nos; por eses feches, el triunviru romanu Octavio (conocíu depués por Augusto, primer emperador de Roma) declaró la Pax hispana al finar ellí coles guerres civiles qu’asolaben la República (inda tendría qu’enfrentase a Marco Antonio n’Exiptu pa finar la guerra, pero eso ya ye otra hestoria y n’otu llugar). Sieglos más tarde, el reinu visigodu asimiló esti calendariu y d’ehí la so popularidá n’Hispania/al-Ándalus/Sefarad durante esi períodu conocíu por Reconquista. Los xudíos hispanos, concíos como sefardites, conocíen esi calendariu col nome d’Era Safar (de Sefarad, que ye como ellos nomaben a Hispania) calendariu que llueu asimilaríen los árabes, ya como andalusíes, pa fechar los sos documentos y monedes. Poro, pa saber la fecha gregoriana d’estes monedes, non más hai que resta-y 38 al añu hispánicu/sefardí.

      Otru detalle: na moneda vién grabao dinar y non morabetín; l’ensayador decidiolo asina por ser una semeya de la moneda árabe.

     Tres la muerte del rei, los sos herederos siguieron acuñando y emplegando dicha moneda. Durante los reinaos d’Enrique I y Fernandu III hebo acuñaciones del mesmu tipu ALF; sábese que foron acuñaos tres la muerte d’Alfonsu pol añu impresu na moneda. Con Alfonsu X la vida y l’emplegu del morabetín d’oru llega al so fin y sustitúilu por otra moneda nomada dobla.

     Esta ye una semeya que representa la llabra del morabetín d’Alfonsu VIII durante’l so reináu y los reis posteriores. Solo camuda l’añu d’acuñación (marcáu n’Era Safar) que ye’l que nos indica durante qué reináu foi batida la moneda. Ta en castellán por tar sacada del llabor de D. Manuel Mozo Monroy:


 
El misteriosu maravedí d’Enrique I

      Enrique I (1204-1217) xubió al tronu castellán en 1214 tres la muerte de so pá y con tan solu 10 años. La rexencia del reinu recayó na so hermana Berenguela. Tres años depués de la so entronización, el neñu-rei morría nun accidente. En tan pocu tiempu nun-y dio tiempu nin a acuñar moneda propio, dafechu les llabres feches durante’l so reináu nun yeren otres que les del tipu de so pá (nel casu los morabetinos, los del tipu ALF).

      Y asina foi hasta que nel añu 2015 apareció, nuna subasta americana, un maravedí acuñáu al so nome.


Maravedí d’Enrique I (1215)
 
      Dellos estudiosos españoles entamaron un estudiu fonderu de tala pieza, pero ensin poder vela físicamente, ya que foi bien vendida a un colleicionista priváu, posiblemente norteamericanu. De toos ellos detacar solamente’l gran trabayu de D. Manuel Mozo Monroy, onde entama esfoyando les rareces de la pieza ante una posible falsificación, pa finar l’estudiu dándo-y el preste d’auténtica.

      Pa nun enguedeyanos muncho, decir que l’estudiu de la pieza centrábase na desaparición de les lletres ALF so la cruz y l’aparición, nel reversu, de la grabación El príncipe Enrique fíu d’Alfonsu el octavu. Tantu l’aparición d’esta moneda, como que na lleenda apareciere’l numberal del rei (l’octavu) asina como la curtia vida del monarca Enrique y que tres esti añu d’acuñación,1253 de la Era Safar (1215 real) se volvieren a acuñar maravedinos del tipu ALF, fexo saltar toles alarmes d’una posible falsificación. El fonderu estudiu de Mozo Monroy despexó delles dubies:

      Sobre la fecha acuñación: si bien ye cierto que los morabetinos del tipu ALF s’acuñaron ente los años 1184 y 1218, nun s’alcontró, pol momentu, negún col añu d’acuñación 1215.

     Sobre’l numberal de so pá, decátase Monroy que nun esiste nenguna alusión al respeutu, polo que se trataría d’una torna errada del árabe al castellán.

      Sobre la moneda en sí, diznos que ye d’época (sieglu XIII) de les del primer tipu d’Alfonsu (con cruz pero ensin ALF) y reacuñada col nome d’Enrique (hENRIC na moneda) fechu a buril y non con punzones, sobre l’antígua lleenda central.

      Conclusión, pa Mozo Monroy la moneda ye verdadera y la cataloga como la primer acuñación del rei Enrique I.

El Marauedí llionés

      A pesar de ser posterior al castellán, el marauedí/maravedí llionés pasará a la hestoria como la primer moneda d’oru d’un reinu cristianu con grafía íntegra llatina y estilu carolinxu, y con unos grabaos pingaos d’arte románicu. Una xoya europeísta y d’una guapura innegable, pero que foi acuñada nos parámetros del sistema musulmán. Dátase l’añu 1186 como entamu d’estes llabres, asitiando la ceca na ciudá de Salamanca. Fernandu II (1137-1188) foi l’impulsor de la idega, cola sida de demostra-y al so sobrín, el rei castellán, que Llión inda yera’l reinu más fuerte. La pureza de la moneda llegó al 87,5 %, superior al castellán, pero la realidá económica del reinu impúsose finalmente y foi rebaxada al 80,3 %, la mesma que’l castellán y el dinar andalusí. Les tres monedes tamién yeren semeyes en pesu, sobre 3,80 gramos, y diámetru, 26 milímetros.

Marauedí de Fernandu II de Llión
      Nel anversu vese al rei de cantu y mirando a manzorga, con barba y corona, allendáu por una flor de llíriu (símbolu de la virxinidá de María) del que sal un bastón que fina n’una cruz. Tres el rei vese una espada como símbolu del poder real sobre la xusticia y l’exércitu. Alredor grabóse la lleenda + FERNANDUS: DEI: GRATIA: REX
      Nel reversu aparez un llión y baxo elli la pallabra LEO, en referencia al nome del reinu. De la llombera’l llión sal una concha de la que sal un bastón que fina en cruz. La lleenda d’alredor, IΩNΩNE:PATRIS:T FII: TSΩPS:SCΩI (In nomine Patris et Fillii et Spiriti Sancti)
Nun aparez nenguna fecha d’acuñación nel casu de les monedes llioneses.

      Tres la so muerte, el so fiu Alfonsu IX siguió acuñando y emplegando estes monedes. La llabra llionesa foi más escasa que la castellana, la decadencia del vieyu reinu frente al exposigue de Castiella yera evidente, tocandu fondu col últimu rei independiente llionés, Alfonsu IX. Fernandu III, ya rei d’ambos dos reinos, tamién les caltuvo, anque nun acuñare.


Portugal tamién s’apunta a la moda

      Anque s’especula que pudo ser Alfonsu Henríques, primer rei de Portugal, el primeru n’acuñar morabetinos, inda nun esiste constancia d’ello, poro, ye’l so fiu Sanchu I (1154-1211) el qu’ostenta esti honor de momentu.

Maravedi del rei Sanchu I de Portugal (1186)
     Anversu: SANCIVS REX PORTVGALIS
     Reversu: INNEPTRIS I FILIISPSSCIA (In nomine Patris et Fillii et Spiriti Sancti)

      Tamién circularon en tiempos de los reis posteriores Alfonsu II y Sanchu II, los cualos nun acuñaron áureos. Un nuevu morabetín más ellaboráu, foi acuñáu en tiempos d’Alfonsu III (1210-1279) 70 años depués de los del so güelu:

Morabetín d’Alfonsu III de Portugal. (alredor de 1253)

     Anversu: ALFONSVS:REX:PORTVGALEN
     Reversu: INNE:PTRIS I FILII:ISPS:SCI:AM (In nomine Patris et Fillii et Spiriti Sancti Amen)



El maravedí como moneda de cuenta

      Dende Alfonsu X a los Reis Católicos, NEGÚN REI VOLVIÓ A ACUÑAR MARAVEDINOS. Precisamente ye durante’l reináu d’Alfonsu X el sabiu (1252-1284) cuando la ya vieya moneda entama a conocese col so nome definitivu: maravedí, y foi tamién l’entamu de la so vida como moneda de cuenta, esto ye, desaparecía físicamente de la circulación, pero calteníase pa calcular o afitar los valores de la bayura monedes que circulaben pel reinu, non solo propies, sinon les veníes d’otros; poro, el maravedí tamién sirvió pa calcular el valor que-y dar a les divises estranxeres. Un auténticu enguedeyu, ya que de man, dientro’l reinu d’Alfonsu la moneda llionesa nun diva pareya a la de Castiella, poro, ya teníen que calcular el cambiu ente los dineros d’ambos dos reinos. Nin que decir tién del numberariu portugués, aragonés, catalán, andalusí… por falar solo de los reinos peninsulares o del munberariu trayíu pelos pelegrinos al Salvador y Santiagu dende Europa.

      Reinandu Alfonsu X los amos d’Al-Ándalus yeren los conocios por nos como Almohades, los cualos acuñaron otros dinares con métrica dixebrada de los qu’acuñaron los Almorávides. La nueva moneda musulmana yera mayor y al rei cristianu se-y ocurrió facer tamién la so moneda d’oru qu’equivaliere a la rival. El problema ye que fizo una moneda cola sida d’igualar en valor nominal al dinar Almohade pero cola métrica de l’Almorávide, poro, más pequeña. Dexando de llau los problemes que-y diba trayer esto colos comerciantes y centrándonos na tema numismática, diremos que, tanto na época del rei, como anguañu pa dellos estudiosos, esta moneda tamién ye llamada maravedí; pero, teniendo en cuenta qu’esta nueva moneda nació pa competir cola nueva moneda Almohade y que los sos tipos nun tienen un res que ver colos de los vieyos morabetinos, yo soi más partidariu de tratalu como l’embrión de la futura moneda áurea de Castiella y Llión, la dobla.

      Per otru llau, conócense unes acuñaciones en plata d’esti mesmu rei que dellos estudiosos nun son pa clasificar en negún grupu de les monedes conocíes de la época, principalmente pola so estraña métrica, asina que tan catalogaes como maravedinos y medios maravedinos de plata. M. Mozo Monroy dexa claro la so dubia nomándolos pseudomaravedinos.


El nuevu xurdimientu físicu del maravedí. La Pragmática de 1497

      Siguiendo’l calendariu cronolóxicu de la Hestoria, nel sieglu XV entamaríemos a dexar la nomada Edá Media pa entrar n’una nueva estaya de revoluciones teunolóxiques, humanistes ya inclusu de grandes aventureros. No que se refier a la Península Ibérica ye’l momentu de los Reis Católicos, del desaniciu del Reinu de Granada, poro, de la fin d’al-Ándalus y de la xuntanza de los reinos, agora hispanos, baxo un mesmu poder real (anque non alministrativu). No que se refier a la tema monetaria, la estaya Moderna garraba col pie cambiáu a una Castiella con un sistema monetariu tovía basáu nel andalusí, mentantu qu’Aragón diba en total sintonía colos sos vecinos europeos, que seguíen el patrón marcáu pola moneda fuerte del momentu, el ducáu venecianu. Poro, la xuba al tronu de Castiella del rei consorte Fernandu II d’Aragón (y V de Castiella), foi determinante a la hora modernizar la llaceriosa bayura de numberariu castellán. El nuevu sistema monetariu castellán arranca cola publicación de la Real Cédula de Sevilla (1475) pero sedría tres la promulgación de la Pragmática de Medina del Campo (1497), cuando s’abandone el patrón andalusí p’adoptar el venecianu.

      Los primeros maravedinos foron acuñaos en 1505 a nome de los Reis Católicos (a pesar de qu’Isabel morriere nel añu 1504), p’abastecer les recién descubiertes colonies americanes. Los valores acuñaos foron d’1, 2 y 4 maravedinos en cobre.

2 maravedinos pa les colonies americanes (1505-1531)
      A pesar de venir a nome de los Reis Católicos, el promotor de diches acuñaciones foi en realidá el so xenru, Felipe I de nomatu el guapu, que por mor de la so muyer Xuana, de nomatu la lloca, xube al tronu Castiella tres la muerte d’Isabel. Esti mesmu añu de 1506 muerre Felipe, poro, poques acuñaciones se fixeren con esti tipu, anque duraren hasta 1531.

      Anversu: Iniciales YF (d’Isabel y Fennandu) coronaes y entellazaes con planta de perexil; arrodiaes pola lleenda: FERNANDVS ET ELISABET DG
      Reversu: F (de Felipe) coronada y planta de perexil cola lleenda: REX ET REGINA CASTE LEGIO ARAGO

      Estes monedes salieron de la ceca de Sevilla (la so marca ye una S) y Burgos (una B). Tamién llevaben marca del ensayador (ex: nos 2 maravedinos de riba aparez nel reversu una doble S de la ceca y so la F una estrella, que ye la marca del ensayador) pero non añu d’acuñación. D’igual tipoloxía, camudaben, llóxicamente, les medíes:

Valor
Añu acuñación
Pesu (gr)
Módulu (mm)
1 maravedí
1505-1531
2.25
19
2 maravedinos
1505-1531
4.50
23
4 maravedinos
1505
9.00
30

      Xuana fore declarada incapaz pa rexir Castiella, d’ehí que Felipe y Fernandu gobernaren conxuntamente, hasta que l’aragonés coló cabreáu col so xenru y a puntu declara-y la guerra. Al morrer Felipe, Fernandu tornó y gobernó en nome del so ñetu y herederu Carlos.
      D’esta estaya salen madarevinos de a 2 y de a 4, a nome de los Reis Católicos y que llegarán hasta 1566, reinando ya Felipe II. Dixébrense ya de los anteriores en que desaparecen les iniciales reales, camudaes polos escudos de los reinos de Castiella, Llión y nos de 2, Granada. Desaparez tamién toa referencia al reinu d’Aragón, ya que foron acuñaos n’escluvivo pa los reinos de Castiella, Llión y Granada. Les ceques oficiales onde s’acuñaron: Burgos, Coruña, Cuenca, Granada, Segovia, Sevilla y Toledo.

2 maravedinos de la ceca Sevilla (1506-1566)

4 maravedinos de la ceca Cuenca (1506-1566)
      Vese que’l tipu ye asemeyáu, emblemes de los reinos de Castiella y llión (y el de Granada nos de 2) coles lleendes FERNANDVS ET ELISABET y REX ET REGINA CAST LEGION

Reinen los Habsburgu (la cá d'Austria)

      Tres la muerte de Fernandu V de Castiella en 1516, xube al tronu el so ñetu Carlos I (1500-1558) y los maravedinos, d’a 2 y 4, entamen a trayer na lleenda el so nome xunto al de so má, Xuana. Siguen col mesmu patrón del castiellu y el llión pa les acuñaciones de Castiella, Llión y Granada. Emiten tamién maravedinos pa les colonies d’América, onde ya aparez col títulu HISPANIARUM ET INDIARUM REX (o REGES, si aparez con so má). D’estos tipos acuñaron ente 1516 y 1566.

      Y equí una novedá: debío a la creciente demanda de numberariu nes nueves tierres d’ultramar, al rei Carlos nun-y quedó otra qu’abrir ceques n’América, daqué que refugaron nel so tiempu los Reis Católicos que ya teníen bastante con controlar les ceques peninsulares como pa fiase d’una allá allantrones.

4 maravedinos de Méxicu (1535)
      Anversu: Inicial del rei K coronada y allendada poles armes de Castiella, Llión y Granada. La lletra M ye de la ceca de Méxicu. Lleenda: CAROLVS ET IVANA REGES
      Reversu: Inicial de la reina I allendada tamién poles armes de los reinos peninsulares. El 4 marca el valor de la pieza. Lleenda: HISPANIARUM ET INDIARUM

La Pragmática de 1566 o de la Nueva Estampa

      Con Felipe II (1527-1598) nel tronu de la Hispania faise un nuevu cambéu no referente al numberariu nos sos reinos. Desaparecen toles reseñes a los Reis Católicos y axústase la moneda peninsular al formatu francés. No referente al maravedí, siguen acuñándose solo pa Castiella, Llión y Granada, aparte de les colonies americanes. El tipu la moneda caltién el castiellu y el llión pal anversu y el reversu, camudando la lleenda, llóxicamente. Dende l’aprovación de la Pragmática y hasta 1597, acuñose un tipu de madaverí de vellón ricu, esto ye, con un 21,5% de plata (o como diríen antanu, de dos dineros y mediu y dos granos). Acuñose numberariu d’a 2 y 4.

2 maravedinos de Felipe II
      Pongo esta moneda, sacada de la páxina maravedís.net, pola curiosidá de la so lleenda; ye lo normal que les lleendes de la ya denominada monarquía hispánica vengan en llatín, ensin embargu, la d’esta moneda vién en castellán vieyo:

      Anversu: Castiellu allendáu por una orla puntos y coles marques de la ceca y l’ensayador. Lleenda: DON PHELIPPE (II)
      Reversu: Llión coronáu allendáu por una orla puntos. Lleenda: REI DE LAS HESPAÑAS

      Y equí llega la Revolución fabril de les monedes. El rei Felipe, namoráu de los inxenios d’agua (molinos) que s’emplegaben n’Alemaña pa llabrar moneda, mandó facer ún d’ellos en Segovia, lo que fexo que se llabrare más rápido y con meyor calidá, perfeutamente redondes y con un grosor de cantu definíu. Ante la imposibilidá, n’aquella estaya, de facer falsificaciones gracies al novedosu inventu, el rei entamó a acuñar maravedinos ensi nenguna lliga de plata pero col mesmu valor que los anteriores, lo que-yos supunxo un enguedeyu pa los reis posteriores. Estes pieces tan catalogaes como moneda de vellón probe.

4 maravedinos de Segovia
      Anversu: Castiellu y lleenda: PHILIPPVS D G OMNIVM
      Reversu: Llión y lleenda: HISPAN REGNORUM REX (y añu d’acuñación)

      Colos siguientes reis de la casa d’Austria, siguen les acuñaciones de mavedinos col mesmu tipu de los castiellos y lliones. Con Felipe III (1578-1621) aparecen dos tipos: ún de vellón con 3,5 milésimes de plata y con valores d’a 1, 2 y 4 dataos ente 1598 y 1602, detacando les lleendes: PHILIPPVS III D G OMNIUM ya HISPAN REGNORUM REX (y añu d’acuñación). El segundu tipu ye de cobre colos valores d’1,2,4 y 8. Detaco equí el d’1 maravedí pola particularidá del anversu, onde aparez el monograma del rei coronáu y l’añu acuñación. Nel reversu aparez solo l’emblema Castiella xunto al valor de la moneda (I m)

1 maravedí de Felpe III

     Con Felipe IV (1605-1665) hai munches guerres que caltener y pocu oru llega de les colonies, asina que’l rei ordena acuñar vellón a manplén con valores de 2, 4 y 8 maravedinos, mesmu tipu del castiellu y el llión y les lleendes PHILIPPVS IIII D G ya HISPANIARVM REX. En 1631 aparez un maravedí d’a 16. Problemes n’Europa, problemes na península, quiebres (1628 y 1647), devaluaciones de la moneda, pragmátiques (1651, 1658) y Célules (1658) p’acuñar moneda nuevo o pa resellar lo vieyo… lo que parecía que diba ser una xuntanza de numberariu colos tipos finó nun enguedeyu de Dios pá.

Detalle d’un resellu de 1641

      Pragmática del 11/11/1651: monedes en cobre d’a 2 maravedinos, castiellu y llión, ensin lleendes.
      Pragmática del 24/09/1658: monedes en cobre d’a 2 y 8 con monograma del rei nel anversu y el títulu REX nel reversu
      Cédula del 10/10/1658: 4 maravedinos de cobre y col monograma y títulu anteriores.
      Cédula del 30/10/1658: Reacuñaciones de pieces d’a 2 y 4 col monograma y títulu anteriores.

      En 1660 el rei mandó acuñar vellón con 69,4 milésimes de plata colos nuevos inxenios de llabra o a martiellu, según la ceca. Creyose superao la tema de les falsificaciones, pero foi tolo contrario, polo que dexaron de llabrar estos tipos nel 1664 y mandose reducir el valor de la pieza en circulación a la mitá del so valor. Habíense acuñao maravedinos con valor d’a 2, 4, 8 y 16 con un nuevu tipu: por primer vez aparez nos maravedinos la efixe del rei nel anversu y, nel reversu, según el valor, aparecen el llión nos d’a 2, el castiellu nos d’a 4, l’escudu de la monarquía hispánica (Castiella y Llión) nos d’a 8 y l’escudu de los Habsburgu nos d’a 16. Tous ellos lleven les lleendes PHILIPPVS IIII D G ya HISPANIARVM REX (col añu d’acuñación).

16 maravedinos (1660-1664)
      D’esti enguedeyu nun se llibra nin el reinu de Navarra, el cual emitía la so propia moneda en cobre conocía como cornáu y los cuatro cornaos conocíense col nomatu d’ochavu. Nun nuevu pasu haza la centralización, l’ochavu desaparecía dexando pasu al maravedí col cambéu d’un ochavu (o cuatro cornaos) igual a dos maravedinos. Llabróse moneda d’a 1, 2 y 4 maravedinos (2, 4 y 8 cornaos) onde aparecerán los típicos títulos de PHILIPVS D G NAVARRE REX y la marca la ceca Pamplona (PP o PA) asina como l’escudu del reinu y les iniciales del rei FI. Detacar tamién que pa los navarros camudaba l’ordinal del rei, pa ellos yera Felipe VI.

2 maravedinos (4 cornaos) de Felipe VI de Navarra
      De la época de Carlos II (1661-1700) tenemos maravedinos d’a 2 col tradicional tipu del castiellu per una cara col títulu CAROLVS II D G (más el valor nominal de la moneda) y el llión pela otra con HISPANIARVM REX (y l’añu d’acuñación, ente 1680 y 1700). Esisten tamién unes acuñaciones d’a 4 y 8 llabraes na ceca Madrid nel añu 1691 nes qu’aparecen, nel anversu, l’escudu de la monarquía hispánica col valor nominal de la moneda y nel reversu les iniciales IHS coronaes cola lleenda ORAN (esta plaza arxelina pertenecía a la corona hispana y por estes feches sufría constantes ataques por parte del emperador de Marruecos; los maravedinos foron destinaos pa usu esclusivu de la colonia).

8 maravedinos de Carlos II (ORAN-1691)
     No referente al reinu de Navarra ye Carlos V, y tamién llabró maravedinos colos títulos CAROLVS V D G y NAVARRE REX, escudu del reinu, monograma del rei, añu acuñación y marca de ceca PA.


Lleguen los Borbones

      Tres la muerte ensin descendencia de Carlos II, xube al tronu Felipe V (1683-1746) por mor del testamentu del últimu Austria (y una guerra nomada de Sucesión). Con esti rei, entama realmente la xuntanza monetaria de tolos reinos peninsulares; la moneda dominante, tantu dientro la Península como nel estranxeru, diba ser la del reinu de Castiella, a pesar qu’inda va seguir acuñando pa los otros reinos, pero ya como moneda llocal. No referente al maravedí, abolió tolos anteriores al so reinu, asina como toa moneda de vellón y entamó a acuñalos con un nuevu tipu, en cobre y valederos pa tolos sos estaos, non solo Castiella. Tres la Guerra Sucesión, el primer tipu qu’acuña lleva n’una cara el monograma del rei coronáu y na otra l’escudu de la monarquía hispánica (esto ye, qu’a partir d’agora solo aparecerán los escudos de los vieyos reinos de Castiella y Llión). Les lleendes sedrán del tipu PHILIP V DG ya HISPANIARUM REX con valores d’a 2 y 4.

4 maravedinos de 1710
     Pola Real Cédula del 24 setiembre de 1718, desanició definitivamente la moneda fecha de vellón y camudó los tipos de los maravedinos. Fechos de cobre, y d’a 1, 2 y 4, punxo nel anversu el so nuevu escudu: armes de Castiella y Llión, asina como l’escusón de la familia Borbón (les 3 flores de llis) cola lleenda PHILIP V D G HISPANIAN REX y un novedosu reversu nel qu’aparez un llión coronáu ente dos boles del mundu y portiando un cetru y un sable cola lleenda VTRVMQ(VE) VIRT(VTE) PROTEGO (protector de la virtú n’ambos dos mundos), un chisgu a les colonies americanes. Lleva tamién l’añu d’acuñación y el valor facial.

4 maravedinos de 1719
      Como moneda llocal nel Reinu de Navarra Felipe V llabró una moneda d’a 1 maravedí en cobre (la moneda probe navarra yera conocía pol nome de cornáu, y ya nos tiempos de los Austria el cambéu ente divises taba afitáu a ún maravedí castellán por dos cornaos navarros). Pa los Fueros d’esti reinu el numberal del rei camudaba, pa ellos yera Felipe VII, pero refuga d’emplegar esti ordinal asina como’l títulu de rei de Navarra nes acuñaciones de numberariu, calteniendo les iniciales FI coronaes, con un V pequeñín debaxo y la lleenda PHILIPPVS V D G. Nel reversu aparez l’escudu Navarra cola marca de la ceca P A (Pamplona) pero allendao pola lleenda HISPANIARVM REX y l’añu acuñación. La so forma octogonal ye debío al cercenáu de la pieza, ya que n’orixe yera reonda.

Maravedí de Navarra de Felipe VII (V)
 
     Por nun dexalu de llau, diremos que Felipe V abdicó nel so fiu Lluis I, cola sida d’heredar el tronu de Francia, pero tuvo que tornar pa Madrid al añu colar pola muerte’l so fiu. Poro, a Lluisín nun-y dio tiempu a acuñar maravedinos.

      Cola llegada de Fernandu VI (1712-1759), tan solo s’acuñó una moneda d’a 1 maravedí col mesmu tipu de los de so pá, camudando solo el títulu del rei FERDINS VI D G HISP REX. Tamién acuñó un maravedí pal reinu de Navarra en cobre y octogonal. Nel anversu l’escudu Navarra va dir allendáu pol títulu real FERDINANDVS VI D G. Nel reversu, les iniciales F O col ordina VI o II y cola lleenda HISPANIARVM REX col añu d’acuñación.

Maravedí de Fernandu II de Navarra

      Con Carlos III (1716-1788) dase otra vuelta rabil na tema centralizadora. En 1772 manda la retirada de toles monedes de cobre circulantes y súpleles por una nueva serie más perfeccionada y anti-falsificaciones, grabándo-yos tamién un cordonín pel cantu pa evitar el cercenáu. Tamién ye la primer vez qu’ordena grabar la so efixe en toles monedes que s’acuñen, independientemente del metal. Acuñó maravedinos d’a 1, 2, 4 y 8; nel anversu sale la so efixe ente la marca de la ceca y el valor nominal y arrodiáu pola lleenda CAROLUS III D G HISP REX y l’añu acuñación. Nel reversu vién la cruz de Don Pelayu colos escudos de Castiella y Llión, y l’escusón central de los Borbones, too ello arrodiao por lloréu. La ceca escoyía pa la so llabra foi la de Segovia.

4 maravedinos de Carlos III (1772)
 
     Pa los navarros el rei Carlos yera’l sestu, y asina venía nel maravedí de cobre d’aquel reinu; nel anversu, l’escudu Navarra allendáu pol títulu del rei navarru CAROLUS VI D G. Y nel reversu, la lleenda NAVARRE REX y l’añu acuñación allendando’l monograma real CAR col ordinal navarru, VI. Daqué sorprendente pal rei que pasó a la hestoria como l’artífice de les señes identificatives del ya centralizáu y perfiláu Reinu d’España (l’himnu, la bandera y la capital)

 
Maravedí de Carlos VI de Navarra

      Carlos IV (1748-1819) caltuvo el mesmu patrón y la mesma ceca; non más camudó’l títulu real impresu CAROLUS IIII D G HISP REX (y l’añu acuñación).

      Pal maravedí navarru, el agora rei Carlos VII caltuvo tamién el tipu, monograma real CAR VII coronáu col títulu CAROLVS VII D G pal anversu y escudu de navarra cola marca la ceca Pamplona (PA) cola lleenda NAVARRE REX 1789 pal reversu.

 
Maravedí de Carlos VII de Navarra

 El paréntesis de los Bonaparte

     Tres la invasión napoleónica d’España, xube al tronu Xosé Bonaparte (1768-1844) col títulu de Xosé I. En cuatro años de reináu, dio-y tiempo a dexar la so impronta nes monedes del país. Nel casu los maravedinos, acuñó una d’a 8, del mesmu tipu que les de los Borbones, pero camudandu l’escusón borbónicu por un aigla imperial francés. Camuda tamén el títulu, caro: IOSEPH NAP D G HISP R col valor nominal de la moneda, l’añu d’acuñación y la marca de la ceca.

 
8 maravedinos de Xosé I Bonaparte (1810)

 Y tornen los Borbones

     Finada la Guerra d’Independencia, los Borbones tornen al tronu d’España, baxo la tutela de Fernandu VII (1784-1833). Acuñáronse maravedinos d’a 1, 2, 4 y 8 col mesmu tipu implantáu por Carlos III, bustu del rei col títulu FERDIN VII D G HISP REX, valor nominal de la moneda, marca de ceca y añu d’acuñación. Nel reversu, la cruz de Don Pelayu colos castiellos, lliones, flores de llis y lloréu.

1 maravedí de Fernandu VII (1824)
     Pa Navarra llabra moneda d’ 1/2, 1, 3, 6 y 8 maravedinos; nel anversu vién el so bustu, en dellos con corona de lloréu a lo César y cola lleenda FERDINANDUS III D G (Acombayáu delles vegaes por NAVARRA REX) l’añu acuñación y el valor nominal de la pieza. Nel reversu aparez l’escudu Navarra coronáu, cola marca de ceca (PP, Pamplona) y la lleenda CHRISTIANA RELIGIO (o NAVARRA REX, según el tipu).

½ maravedí navarru de Fernandu III
     Sucede nel tronu a Fernandu la so fia Isabel, tres anular ésti, enantes d’espurrir la pata, la llei sálica que nun permitía xubir al tronu a les muyeres y cabrear al so hermanu Carlos, provocando l’entamu de les conocíes como Guerres Carlistes. Isabel II (1830-1904) sedrá la nueva reina y la última n’acuñar maravedinos, ya que’n toa Europa (menos nes Islles Britániques, como non) taba implantándose un nuevu sistema de medida d’orixe francés y conocíu como Sistema Métricu Decimal. Na llabra moneda nun diba ser menos y les principales divises europées ya se rexíen por esti sistema, nel que la unidá del mesmu dixebrábase en 100 partes. Poro, el maravedí ya nun tenía xacíu n’esti nuevu marcu y el 15 d’abril de 1848 aprovose’l decretu nel que’l real pasaba a ser la unidá del sistema cola equivalencia d’un real igual a diez décimes. Mentantu s’aprovare esti decretu, la reina acuñó maravedinos d’a 1, 2, 4 y 8 col mesmu tipu impuestu por Carlos III, pero cola novedá de que dexa de llau el llatín pa emplegar el castellán na grabación de les lleendes y títulos.

8 maravedinos d’Isabel II (1835)
     Isabel ya nun acuñó moneda navarra, en 1841 el vieyu reinu pierde su categoría com tal y pasa a ser Provincia Foral del reinu d’España.
      1173-1848: ésta sí que foi una llonga vida pa una moneda. Pocos años depués, en 1868, nacía la peseta y con ella la xuntanza definitiva del numberariu y la fin d'un enguedeyu monedes circulantes per tolos reinos peninsulares qu'anguañu conformen l'estáu español, daqué que ya dende los tiempos de los Reis Católicos y más dende los Borbones, intentose con más o menos ésitu.
Fontes:

      Mozo Monroy, Manuel. Hipótesis sobre un morabetino de oro inédito de Enrique I de Castilla. Revista Numismática HÉCATE Nº 2. (Castellán medieval, castellán d’anguañu y llatín)

      Mozo Monroy, Manuel. Enciclopedia de la Moneda Medieval románica en los reinos de León y Castilla. Ss VIII-XIV. (Castellán medieval, castellán d’anguañu y llatín)

      Casillas Rollón, Antonio. Medina del Campo 1497: análisis de la reforma monetaria de los Reyes Católicos (Castellán)

      Ruiz Trapero, María. La reforma monetaria de los Reyes Católicos: su importancia histórica. Universidá Complutense de Madrid. (Castellán)

      De Santiago Fernandez, Javier. Política monetaria en Castilla durante el reinado de Felipe II. Universidá Complutense de Madrid (Castellán)

      De Paula Pérez Sindréu, Francisco. El reinado de Felipe II y su sistema monetario. (Castellán)

      Ruiz Trapero, María. La reforma monetaria de Felipe V: su importancia histórica. Universidá Complutense de Madrid. (Castellán)

      De Santiago Fernández, Javier. Legislación y reforma monetaria en la España borbónica. Universidá Complutense de Madrid (Castellán)

      De Santiago Fernández, Javier. Antecedentes del sistema monetario de la peseta. Universidá Complutense de Madrid (Castellán)

      Dellos. La moneda en Navarra. Esposición nel Muséu de Navarra, Pamplona. 2001 (Castellán)

Wikipedia:
      Reis de Llión: Fernandu II (castellán). Alfonsu IX (Castellán)
      Reis de Castiella: Alfonsu VIII. Enrique I (Castellán)
      Reis de Castiella y Llión: Fernandu III. Alfonsu X
      Reis de Portugal: Sanchu I. Alfonsu III (Portugués)
      Maravedí (Castellán)

Páxines web:
      Maravedís.net





No hay comentarios:

Publicar un comentario