13/4/18

Conceyu de Moguer


     Moguer ye un conceyu asitiáu na provincia Huelva, Andalucía. Conocíu dende bien antíguo, foi residencia de romanos, musulmanes y cristianos sobremanera pola so salida a la mar (del so puertu salieron los minerales de Riotinto, asina como que foi’l llugar aú los hermanos Niño mandaron fabricar y equipar hasta con mariñanes una de les carabeles de Colón, la Niña).

     No referente a la tema numismática, equí tenemos un casu claru, anque hai dellos detractores, de la invención, non solo d’una moneda, sinon tamién d’una ceca cola idega de colar una falsificación como moneda de necesidá.

     La historia de la moneda en custión ye la que vién: asitiándonos na Guerra Civil, ye perconocío que dellos conceyos, xuntes locales, gobiernos provinciales, etc… tuvieron qu’acuñar moneda de necesidá pa suplir les carencies de numerario pal emplegu diariu del pueblu. El territoriu ocupáu pol exércitu rebelde, nun escapó d’esta carencia y conócense conceyos na provincia Sevilla qu’asina lo atestigüen; si pasó en Sevilla, porqué non en Huelva. La supuesta acuñación diose nel 1936 como moneda de pagu a xornaleros del campu y a trabayaores de la Factoría de Vegetales de Moguer, empresa nacida en 1929. El material emplegáu pa la so fechura foi una aleación de plombu y zinc y barrúntase que namás se fixeron 1500 pieces (polo que nel mercáu numismáticu algamaría un preciu aprosimáu d’unos 250 euros por pieza).



     Hai que tener en cunta que la catalogación d’estes monedes entamose bien lluéu, pelos años 70, y que los sos primeros estudiosos foron amantes de la numismática que, una vez finada la guerra, percorrien el país buscando, mercando  y atropando esti singular numerariu, poro, nun ye un res raro imaxinar xente conocío de la tema “inventando” unes pieces que, per otru llau, yeren bien fáciles de facer debío la lo rudimentario de la so fechura.

     Los defensores de la falsedá de dicha emisión céntrense na lleeenda qu’aparez na propia moneda “I AÑO TRIUNFAL” y l’añu acuñación 1936. Ún d’estos estudiosos ye Luis Barreda Coronado, que na so obra 1936-1939. La moneda de necesidad en la provincia de Sevilla nos diz que primero, tién un valor facial altu (1 peseta) y que la idega de la moneda de necesidá ye la de suplir el carente fraccionariu (esto son, los céntimos) que yera lo que más circulaba ente la probe xente de los pueblos enantes ya de la guerra. Bono, no referente a esta esplicación, hai que tener en cunta que dellos conceyos como’l de Segarra de Gaià en Catalunya, acuñaron solo moneda con valor facial d’una peseta y el Gobiernu d’Euskadi emitió valores d’1 y 2 pesetes… pero tamién ye cierto que nes zones controlaes pol exércitu nomáu “Nacional” nun se permitió l’emplegu de moneda llegal española por ser emitía pola República. Per otru llau, como ya diximos enantes, esti autor refuga que l’añu 1936 seya’l primer añu “Triunfal” de los alzaos, ya qu’esti eslogan nació tres el Decretu númberu 253 dáu en Salamanca’l 12 d’abril de 1937, esto ye, un añu depués de l’acuñación del supuestu numerariu de Moguer. A esto, tenemos qu’añadir, a títulu informativu, que’l numerariu de los conceyos nacionales sevillanos daten principalmente de 1939.

     Dende’l propiu Ayuntamientu de Moguer sobrayen la falsedá de la pieza a traviés del artículu Historia acuñada de la ciudad de Moguer de Fernando Tello Gómez y espublizáu na Revista Montemayor, editada pola Fundación Municipal de Cultura de Moguer nel añu 1997.

Fontes: Blog Numismático, Ruiz Calleja
              Imperio Numismático (Foru numismáticu)
 


No hay comentarios:

Publicar un comentario