2022: Primer vuelta al mundu

 

Semeya: collectorcoins

Motivu conmemorativu: V Centenariu de la primer vuelta al mundu

Tirada: 1.000.000           Fecha d’emisión: 1^er trimestre

 

      El branu del 1520 partía del puertu de San Lúcar de Barrameda, Cádiz, una espedición de cinco naves capitaneaes pol portugués Fernão de Magalhães (Fernandu de Magallanes). La idega inicial yera atopar una ruta comercial pel occidente (América) pa llegar a les Islles Moluques, conocíes col nomatu de les islles de les especies, ensin pasar por territoriu africán controláu pol Reinu Portugal. Les traxedies acontecíes durante’l trayéutu, incluyía la muerte del capitán Magallanes, fexo que’l nuevu capitán, Xuan Sebastián Elcano, decidiere tornar a Castiella siguiendo la ruta africana. De les cinco naves, solo una llegó a bon puertu y con solo 18 homes de los 239 qu’entamaron la espedición. La nao Victoria y los dieciocho de Elcano, foron los primeros en dar la vuelta al mundu, abriendo nueves rutes comerciales (tamién dende América a Asia), descubriendo nuevos territorios pa la corona de Castiella y demostrando, práuticamente, que la tierra yera reonda. Como curiosidá, detacar que, na so vuelta, Elcano arribó a les islles de Cabu Verde el 9 xunetu de 1522, miércoles, pero, pa los islleños, yera xueves… (al Phileaphs Fogg de Xulio Verne pasó-y lo contrario, pero elli dio la vuelta al mundiu yendo haza naciente y non a poniente, como Elcano).

 

 

Coincard pa colleicionistes

 

     Nel 2019 Portugal ya sacare una moneda dedicada a Magallanes y la so fazaña.

     Nel intre la moneda apaez el bustu de Elcano sacáu d’un retratu conserváu nel Muséu Naval de Madrid y delantre d’un globu terráqueu con paralelos y meridianos. Baxo, el so nome JUAN SEBASTIÁN ELCANO y la lleenda PRIMUS CIRCUMDEDISTI ME (circundásteme’l primeru). Tanto’l globu como la lleenda, formen parte del escudu otorgáu a Elcano pol rei Carlos I. Nel hombru, los años de la feméride, 1519-1522. A mandrecha, el nome del país emisor ESPAÑA y l’añu d’acuñación 2022 y a manzorga, la marca de la ceca.

Nel aniellu esterior les doce estrelles de la Xunión Europea.

 

Fontes: Wikipedia: Expedición Magallanes-Elcano (castellán)

             Blog Numismática Visual (castellán)