L’Asturies bárbara (II): Los visigodos

      El rei suevu Evoricu roblare un alcuerdu col rei Leovixildu de los visigodos allá pel añu 582, lo que nun-y garantizaba la so independencia, ya que la Gallaecia yera’l caberu migayu pastel que -y quedaba al visigudu pa facese con tola Hispania. Audeca, cuñáu d’Evoricu, alzose n’armes y féxose col tronu galaicu, lo que -y valió como escusa a Leovixildu, en 585, pa entrar na Gallaecia franciéndolo too ya integrándola nel so reinu.

Añu 500 d. C. Repartu ente suevos y visigodos

     La primer referencia que se tién de la entrada de los visigodos n’Hispania, data del añu 414, cuando Ataulfu tién que fuxir de los sos domeños d’Aquitania y la Narrbonense na Galia presionáu por tropes romanes, y pasa a la provincia Tarraconense, faciendo de Barcelona la so capital. Años más tarde, ente los años 416-418, Roma emplégalos pa “llimpiar” la Península d’otros pueblos bárbaros cola promesa de devolve-yos Aquitania. Cumplíu’l pautu, los godos quédense tamién cola Narbonense, naciendo’l Reinu Visigodu de Tolosa. Mentantu, el pueblu hexemónicu na Hispania diba ser el de los nuesos collacios suevos.

     La primer noticia que se tién de la presencia de visigodos en tarrén astur dátase nel añu 456, nes orielles de ríu Órbigu, llugar onde llucharon y vencieron a los suevos de Rekhiariu, por orde de Roma. A la vuelta, sábese que saquearon Astorga y Palencia. Tres esti fechu, les engardieyes ente bárbaros diben ser constantes, hasta la desaparición definitiva del reinu suevu nel 585.

     Na tema alministrativa, los visigodos foron bien de práuticos: allá onde fueres, fai lo que vieres… Y lo que veíen cuando ocupaben un sitiu yera una alministración romana, esto ye, un detacáu poder central y delles oppidum d’importancia que controlaben el territoriu a la orde de la capital. Asina lo caltuvieron los godos nos sos domeños galos ya hispanos, hasta que se toparon cola alministración de los suevos. Al asitiase na Gallaecia y la Lusitania, los godos descubrieron un sistema de control totalmente opuestu al conocíu, el poder taba descentralizáu y dixebráu en sées eclesiales y parroquies que servíen de referencia tanto pal estamentu eclesial como pa l’alministración civil, dexando inclusu, bien a les clares, les llendes interines y esternes del reinu. Too ello venía referío nel Parrochiale Suevum.

     Precisamente, d’esti mou de xestionar el control del territoriu, ye d’onde ñaz esa sorprendente bayura de talleres monetales o ceques esistentes en Gallaecia y Lusitania frente al restu d’Hispania (siguiendo’l trabayu de Ruth Pliego, de les 100 ceques visigodes conocíes, casi’l 50 % taben asitiaes nel noroeste la península). Realmente, esti datu dio pie a munches teoríes, ente elles que la so bayura debiose a que yeren talleres itinerantes por causes béliques, o ceques fixes pola presencia d’oru en gran cantidá na zona. Pero nin les guerres foron tan bayuroses, salvo les incursiones a territoriu cantábricu, nin había ya tantu oru, arrequexáu ya a unes poques y pequeñes esplotaciones ente Lugo y l’occidente d’Asturies. Tampoco debemos escaecer la gran cantidá de ceques apaecíes por mor de les acuñaciones que conformen la catalogada como “serie MVNITA”, ya mentada nel trabayu sobre los suevos. Anguañu, too indica que la causa foi puramente alministrativa, los suevos teníenlo fecho asina y los godos dexáronlo asina pel momentu. Otra pista que mos fai refugar del oru, ye que yeren munches ceques, sí, pero de baxa producción; la gran mayoría de moneda visigoda que se conserva provién de talleres asitiaos en Toledo, Mérida y la provincia Betica, a la fin, les zones más dinámiques y comerciales del reinu.

 

Ceques visigodes por provincies, según trabayu de María Ruiz Trapero (2004)

Años más tarde, Ruth Pliego aumenta la cifra ceques

     La moneda “favorita” de los visigodos foi’l tremis o triente d’oru, d’orixe romanu y que na Gallaecia ya circulaba, gracies a los suevos, nel so conocíu formatu “d’imitación”. Precisamente les primeres monedes godes n’Hispania yeren tamién semeyes de les romanes, lo que fai que munches vegaes los estudios nun son a aclariar si una moneda “d’imitación” ye de fechura sueva o visigoda; solo el llugar aú s’atopare podría esclarialo daqué, pero ensin fiase muncho. 

     Ye precisamente Leovixildu el que marca l’entamu de les acuñaciones atribuíes ensin dubies a los godos; cenciellamente, inclúi’l so nome na moneda y camuda’l bustu del emperador romanu pol de so, asocediendo esto allá pel añu 572. Ye a partir d’equí cuando ya falamos de tremises visigodos, que nun dexaríen d’acuñase hasta la fin del reinu nel 714. El pesu oficial del tremis visigodu yera de 1,52 gramos, y taba asociáu a la moneda patrón (o divisa internacional del momentu) el sólidu bizantín, que respetaba’l pesu ponderal aprováu na reforma monetal del emperador occidental Constantín (un sólidu pesaba unos 4,55 gramos y equivalía a tres tremises). Ensin embargu, el tremis godu dirá ufriendo cambios a lo llargo la so vida, oscilando’l so pesu ente 1,45 y 1,30 gramos. La so pureza taba ente un 80 y 90 % al entamu, y baxando hasta un 60-65 % colos reis Tulda y Chindasvintu y baxando más na época de Witiza. No que se refier a posibles acuñaciones visigodes con otros metales, plata y bronce o cobre, nun hai estudios fiables, magar que sí hai delles reseñes en cartafueyos de prestixosos estudiosos como M. Crusafont. Ta nidio que’l tremis nun yera’l más indicáu pal menudéu cotidianu de los ciudadanos, poro, lo más acertao sedría que la xente emplegare más monedes de plata y cobre, les cuales sedríen principalmente d’orixe romanu y bizantín, asina como silicues sueves, o, como nel casu d’Asturies, emplegaren el troquéu como sistema comercial domeñante.

     No que se refier a la fechura de les pieces, los tipos acuñaos van ser de lo más esquemáticos, cuasi como pictogrames infantiles semeyando los bustos imperiales apaecíos nes monedes romanes. Detacará una lleenda nel anversu onde apaecerá una cruz seguía del nome del monarca y el so títulu de REX. La del reversu fadrá referencia a un epítetu real (PIVS sedria’l más común na Gallaecia) más el nome de la ceca.

 

Les primeres ceques reconocíes n’Asturies

     Como ya diximos, nel territoriu de la vieya Gallaecia sábese de la esistencia d’una bayura talleres d’acuñación, siendo abondos en tiempos de Recaréu I (586-601) y Suinthila (621-631), amenorgando’l so númberu con Chindasvintu (642-653) y pasar a ser retayos nos tiempos de Recesvintu (653-672), Wamba (672-680), Éxica (687-702) y Witiza (694-710, con escasa batida de pieces). Gracies a que heredaron la costume sueva de grabar el nome del taller nes monedes, nun foi un res difícil asitiar el llugar del llabor. No que se refier a talleres de llabra  nel Conventus Asturicensis,  danse como probaos los de les llocalidaes d’Astorica (Astorga), Bergio (Cacabelos o Villafranca del Bierzu), Fraucello ( posiblemente Valle Froxelos, anguañu na provincia d’Ourense), Leione (Llión), Pesicos (Pezos o Cangas del Narcea), Petra (pue que Piedrafita, ente Llión y Asturies), Semure (Zamora) y Ventosa (Benavente). Identifíquense equí, por primer vez, talleres d’acuñación o ceques dientru del territoriu que conforma l’Asturies d’anguañu: Pesicos  y Petra, asitiaes al occidente d’Asturies, en cunta de qu’esti foi l’únicu territoriu de los astures tresmontanos que pudieron controlar, con cierta seguranza, tanto suevos como visigodos; el restu d’Asturies, habitáu, según les vieyes cróniques de San Isidoru, por astures y luggones, diba ser un constante campu de batalla hasta la fin del reinu godu. Esiste otra marca de ceca, Asturie, de llugar desconocíu, pero que dellos estudiosos asitien en dalgún llugar ente Asturies y Llión; otros, teorizen cola idega de qu’Asturie y Astoria son el mesmu llugar: Astorga. Otres ceques dubioses son les de Calapa (posiblemente Calabor, Zamora), Senabria (Puebla de Sanabria) y Susarres (pue que Bembibre) asitiaes antanu na diócesis aurense (Ourense), según el Parroquial Suevu. Detacar la recién apaecía de Vada, que dalgún asitia en San Xuan de Parres y de la que falamos más alantre.

 

Ceques na Gallaecia según Ruth Pliego

     En resume, dexo equí una llista ceques visigodes avenceyaes al nuesu territoriu, col so posible asitiamientu y los reis que n’elles acuñaron:

 

Ceca	Asitiada en	Reis qu’acuñaron
Astorica	Astorga	Suintila
Asturie	¿Astorga? O dalgún llugar ente Asturies y Llión	Recaréu I, Chindasvintu
Bergio	Cacabelos o Villafranca del Bierzu	Sisebutu
Calapa (1)	¿Calabor?, Zamora	Recaréu I, Gundemaru, Sisebutu, Suintila, Chindasvintu
Fraucello (2)	¿Valle Froxelos?, Ourense	Witericu, Suintila, Chindasvintu
Leione	Llión	Suintila
Pesicos	Cangas del Narcea o Pezós	Gundemaru, Sisebutu
Petra	¿Piedrafita? ¿de Llión, o Asturies?	Recaréu I, Suintila, Chintila, Chindasvintu
Semure	Zamora	Sisebutu, Suintila
Senabria (1)	Puebla de Sanabria	Recaréu I, Witericu, Gundemaru,Sisebutu, Suintila
Susarres (1)	¿Bembibre?, El Bierzu	Recaréu I, Witericu
Vada	¿Bada, San Xuan de Parres?	Suintila
Ventosa	Benavente	Suintila

 

          (1) Según el Parrochiale suevun, antanu pertenecía al Conventus Aurensis

          (2) Según el Parrochiale suevun, antanu pertenecíen al Conventus Asturicensis

     Siguiendo un pocu l’orde cronolóxicu de los reis godos, Leovixildu foi’l primer rei visigodu na Gallaecia, pero d’elli nun esiste nenguna acuñación n’esti territuriu (de xuru que la estroza que fexo nel 585 y sobre too, que morriere al añu siguiente, tovieron daqué que ver). Ensin embargu, foi’l monarca que fincó los tipos a grabar nes monedes: en dambes dos cares, apaez el bustu real mirando al frente. No referente a les lleendes, nel anversu vendría’l nome’l monarca col títulu REX (o variantes: RE, R), y nel reversu vendría l’epítetu real (normalmente PIVS) col nome de la ceca y en delles d’elles, colos primeros reis na Gallaecia, el términu VICTORIA (o asemeyaos: VICTOR, VICTI).

     De tienpos del so sucesor, Recaréu I, identificáronse 19 talleres, de los que solo ún, el de Petra, paez que pudiera tar en territoriu asturianu (a falta d’dentificar el sitiu aú taba Asturie); otres ceques identificaes en territoriu astur pa esti rei son les duldoses Calapa y Susarres. Fora tarrén astur, tamién acuñó en Senabria, onde apaez una moneda col términu VICTOR.

     El siguiente n’acuñar nel nuesu territoriu foi Witericu (603-610) nes ceques de Fraucello y Susarres; tamién en Senabria.

Tremis de Witericu, ceca de Fraucello (col. Privada).

     El taller de Pesicos reconociose pola aparición d’acuñaciones de tremises a nome de Gundemaru ente los años 609-612, y Sisebutu ente’l 612-621. Estes acuñaciones coinciden nel tiempu coles campañes militares acometíes por estos reis escontra los astures, polo que se supón que la so llabra corrió al cargu de dalgún taller ambulante que llegare coles tropes godes (a semeyanza de les llexones romanes) y que s’aprovisionaren del oru sacáu de d’algún vieyu yacimientu auríferu, o de los mesmos ríos occidentales asturianos, que dende bien lloñe veníen xurtiendo d’esti noble metal a los pobladores del llugar, col que facíen les sos xoyes castreñes. Dambes dos acuñaciones son semeyes, tosques imitaciones de la moneda imperial romana onde apaecen los bustos de los reis, con trazos esquemáticos, col so nome y el nome de la ceca (toles acuñaciones godes van ser asina). Pa la de Gundemaru, anversu con lleenda GONDIMARVS R(ex) y bustu de frente; reversu con lleenda PESICOS PIVS y bustu de frente. Na de Sisebitu, camuda solo nel anversu la lleenda, SISEBVTVS RE (x).

Tremis de Sisebutu, ceca d’Evvesis, Portugal (col. Cores).

 

     Gundemaru tamién acuñó en Calapa y Senabria. Sisebutu féxolo en Bergio, Calapa, Semure y Senabria.

     De Suintila (621-631) apaecen acuñaciones en Astorica, Calapa, Fraucello, Leione, Petra, Semure, Senabria, Vada y Ventosa.

Tremis ce Suintila, ceca de Ventosa (col. FAJO).

     Les puyes de monedes suelen ser delles vegaes fontes de sorpreses. Asina foi que n’una d’éstes apaeció una moneda d’esti rei cola marca d’un taller nomáu VADA. El llugar de Vada ye desconocíu, pero apaez, ente la llista candidates, el llugar de Bada, asitiáu en San Xuan de Parres (otros son Vada en Cantabria o, los más probables Sao Tomé o Sao Pedro de Vade, freigresías de Ponte da Barca, nel Distritu de Viana do Castelo, na contornada de Bracara, Braga, Portugal). L’exemplar en custión, muestra la tipoloxía que representa’l bustu del rei vestíu cola cota malla o hamata, combinada cola lórica torácica.

 

Tremis de Suintila, ceca de Vada.

     Chindasvintu (642-649) fincó les bases pa reorganizar l’estáu visigodu, incluyendo los talleres de llabra de moneda, que’l so fíu Recesvintu (653-672) punxo en práutica. De Chindasvintu apaecen monedes acuñaes en Asturie, Calapa, Fraucello y Petra. Del so fíu nun hai constancia d’ello, debío en parte al amenorgamientu progresivu de ceques na Gallaecia, y que seguiría colos siguientes reis hasta la desaparición del reinu a manes de los musulmanes. Dafechu, el caberu rei godu n’acuñar pel Conventus Asturiensis foi’l rei Chintila (636-639) en Petra, identificada gracies a una moneda, anguañu desaparecía y que pertenecía a la colleición de Vidal Quadras; sábese de la so esistencia gracies a una semeya.

Tremis de Chindasvintu. Ceca d’Aurense.

Tremis de Chintila, ceca de Luco

     A partir d’equí, la llabra moneda visigoda nel noroeste peninsular va centrase nos talleres afincaos no que güei ye Galicia y norte Portugal, básicamente nes ceques de Bracara (Braga), Luco (Lugo)  y Tude (Tuy, Pontevedra). Los caberos reis n’acuñar pela Gallaecia foron Éxica y Witiza, emplegando los nuevos diseños introducíos por Recesvintu, anversu con bustu real xiráu y reversu con cruz enriba grades, heriede de les acuñaciones bizantines.

Tremis d’Éxica, ceca de Tude

Tremís del co-reináu d’Éxica y Witiza. Ceca de Luco

     En resume, los visigodos ocuparon la Gallaecia y asimilaron les sos ceques llocales pal labrar los sos numismes. Dende Recaréu I (586-601) hasta Chintila (636-639), esto ye, sobro unos 53 años, siete reis godos acuñaron moneda en dalguna ceca astur y tan solo dos, Gundemaru y Sisebutu, acuñaron moneda na ceca de Pesicos, la única pel momentu, asitiada n’Asturies (según les cróniques de San Isidoru, los Pesicos foron vencíos por Gundemaru, y Sisebutu domeñó a los Astures, habitantes de los montes y bosques y a los Luggones, habitantes de les montañes escabroses) polo que nun sedría un res raro que realmente esta ceca asturiana fuere en realidá, un taller ambulante que marchare col exércitu godu, al estilu de les llexones romanes de Carisiu. Suintila llucharía n’estes guerres como dux de Sisebutu, poro, foi normal qu’al xubir al tronu se convirtiere nel rei que más ceques en territoriu astur emplegare p’acuñar les sos pieces, les cuales foron tamién bien bayuroses; eso sí, nun acuñó n’asturiana de Pesicos ¿Por qué? ¿Confirmaríase asina la particularidá de taller itinerante, por custiones béliques, d’esta ceca? ¿O controlar l’Asturies Tresmontana nun yera tan fácil?

     Precisamente apaez equí otra custión sobro la ceca de Petra: nengún de los dos reis combatientes escontra los Astures llabró moneda n’esta ceca, mientres que los sos antecesores y posteriores sí lo fixeron ¿Confirmaría esta curiosidá que Petra nun s’asitia en tarrén asturianu? ¿O sedría Petra una población importante pa los godos, nun pasu natural haza’l suroccidente asturianu, como siempre foi’l Puertu Piedrafita? ¿Sedría la frontera colos belicosos norteños? ¿O un campamentu base na fastera llionesa pa controlar el puertu?

     Con Chindasvintu la centralización de les ceques va tomando forma, desapaeciendo les acuñaciones en territoriu astur con Chintila y concentrándose, finalmente, la produción de moneda en Braga y Lugo, no que se refier a la provincia de la Gallaecia.

 

     Bibliografía:

     Acuñación monetaria y organización administrativa en la Gallaecia tardoantigua. Pablo C. Díaz. Universidá de Salamanca. 2003

     De la Asturias sueva y visigoda. Diego Santos, Francisco

     Suevos y visigodos en el norte de Zamora. Blog El Bierzo Prerrománico de González Rodríguez, Rafael.

     Emisiones suevas, bizantinas y visigodas. Blog El tesorillo.com

     Cecas en Gallaecia y Lusitania. Blog El tesorillo.com

     En torno a la moneda visigoda. Ruiz Trapero, María. Universidad Complutense de Madrid. 2004

     Gallaecia en tiempos del Reino Visigodo de Toledo: Sus emisiones monetarias. Pliego Vázquez, Ruth.

     Monedas y billetes en la historia de Asturias. Dellos collaboraores. Editorial Prensa Asturiana, SL.

     Wikipedia: Invasiones germánicas en la Península Ibérica (castellán)