L’ardit foi una moneda de vellón d’escasu valor que circuló principalmente per Catalunya (Incluyíos el Rosellón y la Cerdaña) allá pelos sieglos XVI y XVII ; dafechu, la primer moneda cola que los catalanes emplegaron esti nomatu foi col dobler (equivalente a 2 dineros) emitíu por Fernandu II el Católicu nel sieglu XVI. Al parecer, el so orixe etimolóxicu hai que buscalu n’Aquitania (Francia) per onde circulaben unes monedes nomaes hardi ya dende’l sieglu XIV; el vocablu foi catalanizáu col nome d’ardit y catellanizáu col d’ardite. A entamos del sieglu XIX, esta moneda foi desaniciada pola aparición de nueves monedes.
Que les monedes franques circularen pel territoru pirenaicu nun yera un res raro, teniendo en cuenta la so identificación como zona de fronteres (hai que tener en cuenta que los reinos de Navarra, Aragón y el Principáu de Catalunya entraben no qu’anguañu conocemos como Francia y, qu’ésta tampoco yera una nación homoxénea, sinon enllena de condaos y ducaos). La principal causa d’esta asimilación de moneda franca debiose a la falta de moneda propio, sobremanera de menudo. Les monedes circulantes de vellón pol territoriu catalán conformábense principalmente de diners (dineros) y doblers (2 dineros), completándose too ello con una triba de monedes llocales del tipu senyals y pugeses. L’aportación franca a esta circulación de menudo yera dinero de Bearn y los mentaos ardits qu’equivalíen a un dobler, esto ye, dos diners (dineros).
La primer vez que se fala d’ardits en llugar de doblers ye na zona del vieyu Condáu d’Urgell nun acta del añu 1477; a partir d’ehí, el nuevu nome diba dir imponiéndose pocu a pocu per tol territoriu catalán.
L’acuñación física d’ardits franceses en tarrén catalán asocede durante la segunda ocupación francesa del Roselló y Cerdanya (1475-1493). Los reis francos aprovechen la ceca de Perpinyá pa batir escudos d’oru, gruesos de plata, y en vellón, óbolos, blanques, ardits y patacs, tratando de moneda estranxero l’acuñada en Catalunya. Tres el Tratáu de Barcelona de 1493, Carlos VIII de Francia devuéve-y los condaos a Fernandu II d’Aragón.
A partir del 1517, l’ardit francés tenía un cambiu de 7 pugueses catalanes (1 3/4 de diner).
En tiempos de Carlos I, les mayores tiraes d’ardits catalanes foron concedíes a les ceques de Perpinyá y Puichcerdà cola idega de frayar coles constantes falsificaciones de numberariu que percorría pel Principáu. La orde completábase con castigos a tolos que mercadearen con moneda falso o francesa, asina como al que colare con moneda d’oru y plata pal país vecín.
Urgell acuñaba el so propiu numberariu y, a partir de 1523. Pal diseñu del tipu escoyeron el emblema del obispu Espés, un grifu rampante. La so fabricación foi bien bayurosa y cola equivalencia de dos diners. Curioso ye que’l diseñu del grifu rampanrte pa los ardits caltúvose nel tiempu hasta’l mesmu añu de 1655, mientres que’l restu moneda de plata batío na Seo camudaba’l so tipu según camudaben los obispos rexentes.
Ún de los territorios más conocíos pola acuñación d’ardites foi‘l de la baronía de Bellpuig, cola fin d’abastecese de moneda menudo del tipu del cuartu de dineru, que nun yera batío nin poles ceques condales nin poles reales. Los primeros ardits foron acuñaos sobro’l 1573, con un tipu de tres cardos coles flores cayíes y con estrelles. Ensin embargu, la facilidá con que aparecíen bayura de falsificaciones d’ardits de Belpuig, facía que’l Conseyu toviere ca pocu retocando los diseños pa dixebralos. Ente 1577 y 1578 atrópense toles monedes emitíes pol Conseyu y faen una nueva reacuñación con un nuevu tipu, que ye’l más conocíu ente los estudiosos, el de la montaña de tres picos:
 |
| Ardit de Belpuig |
D’esti tipu esisten tamién una bayura de variantes: montañes con puntos, ensin puntos, cruz de puntos no cimero… y el reversu suel ser o bien les conocíes flores de cardu o bien incuses. Suelen ser anepígrafes, pero delles vegaes pue aparecer la lleenda BEL+PUG.
Ente los años 1572 y 1582, en tiempos de Felipe II, acuñáronse na zona de Puigcerdà ardits de cobre (o casi, ya que la cantida de plata na aleación yera bien probetayu). El diseñu del so tipu foi pal anversu l’escudu coles barres catalano-aragoneses a mou romboidal coronáu y arrodiáu de la lleenda FILIPVS + D G : REX. El reversu reservose pa grabar una imaxe de la Virxe col Neñu y la lleenda AVE MAR–IA GRATIA.
 |
| Ardit de Felipe II |
Barcelona garra’l testigu
La ceca Barcelona encargábase principalmente d’acuñar moneda real pa circular per tol Principat que de facer moneda d’emplegu llocal. Dafechu, los primeros ardits acuñaos equí foron en tiempos del rei Felipe III. Y ye precisamente a partir d’estes acuñaciones cuando el términu ardit va facese ya popular per toa Catalunya al incluyir nel grabáu les iniciales AR. Yera práuticamente de cobre (llevaba solo un 6% de plata) y la so acuñación masiva debiose gracies a la introducción del molinín como nuevu sistema d’acuñación. El nuevu ardit diba ser el sustitutu definitivu del dobler catalán asina como de los ardits llocales.
 |
| Ardit de Felipe III |
Los ardits de los Austria van asemeyase nel tipu: anversu cola efixe del rei allendáu poles iniciales AR, y reversu col escudu de Barcelona allendáu pola lleenda BARCINO CIVITAS (o CIVI) col añu acuñación. La calidá de les pieces ye bien visible, gracies al emplegu del molinín, frente a les vieyes condales, que taben feches a bas de maza y brazu.
 |
| Ardit de felipe IV |
Ye precisamente durante’l reináu de Felipe IV cuando se produz la nomada Guerra dels Segladors, una revuelta del campesináu catalán escontra los exércitos del Austria y que fexo que Francia ocupare durante 10 años Barcelona y boan parte del territoriu catalán. En 1652 La monarquía hispánica recupera Catalunya pero a costa de perder tolos territorios catalanes tres los Pirineos que pasen a control definitivu de Francia. D’esta estaya ye precisamente l’acuñación de los ardits barceoneses a nome de Lluis XIV de Francia.
 |
| Ardit de Lluis XIV |
Dalgunos años más tarde, l’ardit tamién va ser testigu d’otra guerra en
Catalunya, la nomada Guerra de Sucesión.
Esta vegada va ser el pretendiente austríacu al tronu hispanu, l’archiduque
Carlos, el qu’acuñe estes monedes, anque realmente nun son más que
resellos del nuevu
rei enriba de los ardits acuñaos polos Felipes. N'esti casu el valor acuñáu na moneda ye'l de 2 dineros (equivalentes a un ardit).
 |
| Ardit de Carlos III, El pretendiente |
L’ardit pasa a nomase ardite
Tres la Guerra de Sucesión, instáurase nos estaos peninsulares una nueva dinastía real, la Casa Borbón de Francia, siendo’l so primer monarca Felipe V. Los Borbón cauterizáronse pol so enfotu en centralizar el poder nun solu estáu, nel casu hispánicu, Castiella foi’l reinu vencedor n’esta guerra, polo qu’a partir d’agora diba ser el qu’empleguen los Borbón como centru de poder alministrativu y políticu, influyendo esto unclusu a la hora acuñar moneda. Desaparecen les vieyes ceques condales catalanes y piésllase la de Barcerlona.
Los caberos ardits son castellanos (polo que a partir d’agora entamen a conocese col so nome castellán, ardite, ardites) y foron acuñaos durante’l reináu de Fernandu VI ente los años 1754-56 circulando exclusivamente per Catalunya. Al pesllar la ceca Barcelona, va ser la de Segovia la encargada de batir esti cobre (la especialidá segoviana).
 |
| Primer ardite segovianu de Fernandu VI |
Nel anversu aparez l’escudu de la monarquía hispánica (cuartelaos de Castiella y Llión) coronáu ya ensin escusón de la Casa Borbón llindiáu pol títulu real FERDINANDUS VI D G (Fernandu VI pola Gracia de Dios) castellán, ya que d’acuñales col so títulu aragonés sedría Fernandu III. Nel reversu vamos atopamos con dos variantes detacaes: la moneda de 1754 vién con un escudu a semeyanza al del Condáu de Barcelona pero que nun ye tal, ya que la cruz asemeyábase más a la d’Íñigo Arista (propia del escudu d’Aragón) en vez de la de San Xurde (propia del de Barcelona) y les supuestes barres catalanes son cinco en vez de cuatro. Asina –y lo fexo saber el Consell catalán al rei y asina hebo que camudar el diseñu nes monedes posteriores. El títulu que llíndia l’escudu, CATALON PRINCEPS col añu acuñación, ye tamién una novedá nel sen de que la potestá d’acuñar moneda pa tol Principat de Catalunya yera esclusividá del conde de Barcelona, títulu que tamién ostentaba’l rei, pero elli prefirió acuñase’l títulu de príncipe de Cataluña, de xuru que por cuestiones de dominiu territorial.
 |
| Tipu 2 de los ardites segovianos |
El final de los ardits y ardites llegó en tiempos de la Guerra d’Independencia (1808-14), la moneda catalana foi reciclada pa creyar unes nueves monedes llamaes chavos y les castellanes sirvieron pa facer otres nomaes cuartos. Nel saber popular castizu quedó, n’alcordanza, el dichu “no vales un ardite”, esto ye, que nun vales pa ná.
Fontes: Glosario numismático Numisma. www.Numisma.Org (castellán)
Viquipedia catalana: Ardit (català)
Catálogo de monedas de España (castellán)
Les monedes de Beílpuig i Baronía. Jaume Torres i Gros (català)
Fabricació i circulació de moneda local a la Catalunya dels segles XIII-XVI. Xavier Sanahuja Anguera (català)
Tratado de las monedas labradas en el Principado de Cataluña con instrumentos justificativos. . Doctor don Josef Salat. (castellán/català/llatín)
www.identificacion-numismatica.com
No hay comentarios:
Publicar un comentario