Un percorríu pel numberariu d'Isabel II (5/6)

Numberariu del Pricipáu de Catalunya (1836-1848)

COMPETENCIA ENTRE MONEDAS: EJEMPLOS DEL SIGLO XIX – Joaquín Pérez Cano

     Cataluña foi un perimportante escenario bélicu durante la primer guerra carlista. Ello provocó que bien llueu escaseare la moneda nel territoriu. Ante esta demanda, optose por abrir de nuevo la ceca Barcelona y batir monedes de cobre con valor de 3 y 6 cuartos, unes monedes propies del principáu de Catalunya y que nacieren nel periodu de la Guerra de la Independencia (1808-1814) baxo títulu de Fernandu VII; dafechu, los cuartos isabelinos diben ser una semeya del tipu de so pá.

     Naz tamién una peculiar moneda de plata nomada peseta y que va servir pa pagar a les tropes isabelines del Principáu, d’ehí que a estos soldaos se-yos conociere col nomatu de peseteros.

Los cuartos de cobre

     Producios exclusivamente pa circular per Catalunya, la so bayurosa producción fexo provocar desaxustes na produción de moneda n’oru y plata, ya que’l so escasu valor facía que la población la prefiriere pa los sos mercadeos cotidianos. L’escesu de numberariu catalán vino principalmente per dos llaos, el primeru, de la propia Diputación de Bacelona, a la que –y salía perbarato producir una pieza frente al so valor nominal (una de 6 cuartos costaba unos 4,86 maravedinos producirla, pero poníase´n circulación con un valor de 24), y per otru la enorme cantidá de falsificaciones acuñaes precisamente por esi chollu diferencial. Ye por ello qu’a esta moneda se-y conoció col nomatu de calderilla.

     A partir de 1847 el Gobiernu Central manda finar cola produción de moneda catalana. A partir de 1850 ordénase l’atropamientu de diches monedes pa desaniciales, a cambiu d’un valor axustáu a moneda de Castiella. Cola pasta recuperada, fadranse los nuevos cobres de 1854.

     No que se refier al tipu, caltienen un anversu común nel que pue vese l’escudu hispánicu borbónicu coronáu y llindiáu pola lleenda ISABEL 2ª REYNA CONST DE LAS E. y l’añu acuñación. No que se refier al reversu, aparez un escudu coles barres del reinu d’Aragón (y per ende, de Catalunya) coronáu, pero hai delles variantes. El cantu ye de cordoncín:

     La moneda de 3 cuartos ya tién 4 variantes, identificaes nos reversos, solo nel añu 1836. Una d’elles aparez cola lleenda PRINCIP. CATHAL y el valor III QUAR.

     Una segunda camuda’l títulu por PRINCIP. DE CATALUÑA, calteniendo’l valor III QUAR.

 

    

 Una tercera ya camuda’l valor a III CUAR.

    Y la cuarta camúdalu a 3 CUAR. Esti va acuñase dende 1836 a 1846.

     No que se refier a la pieza de 6 cuartos, esisten 2 variantes; tamién camuden los reversos no que se refier a la grabación del valor nominal, la primera aparez con VI. QUAR.

     Y la segunda camúdalu a 6. CUAR.

     N’esta segunda variante atópense tamién delles subvariantes, identificaes principalmente poles flores del diseñu: hai monedes onde tienen 5 pétalos y otres vienen con 7; tamién les hai con flores xuntu al múmberu 6 y otres que non. Más dixebres puen ser la desaparición del puntu xuntu al 6 o’l diseñu del escudu, onde les barres catalanes puen ser llises o rayaes.

La peseta de plata

     La necesidá de pagar a les tropes isabelines que lluchaben nel norte fexo que la Diputación de Barcelona abriere de nuevu la ceca catalana, pesllada pol Gobiernu Central en 1823, pero que caltenía tola maquinaria nel so edificiu.  Les primeres pesetes salieron en setiembre de 1836 con calter de moneda de necesidá y provincial (solo pa Cataluña) finando la so acuñación en 1837.

     Nel anversu aparez l’escudu del Principáu de Catalunya con corona y lloréu. Alredor, la lleenda ISABEL 2ª REYNA CONST. DE LAS ESP. Con tres estrelles de 5 puntes ente les que van la marca de la ceca B y les iniciales de los ensayadores PS (Francisco Paradaltas y Simeón Sala i Roca). Nel reversu vién el valor nominal 1 PESETA ente 2 estrelles de 5 puntes y la lleenda PRINCIPADO DE CATALUÑA. El cantu entama siendo de cordoncín nes primeres acuñaciones pa lluéu facese estriáu. El cambiu afitáu, 1 peseta = 4 reales.

 

Fontes:  

 

     Wikipedia. Isabel II (castellán) 

  

     ANTECEDENTES DEL SISTEMA MONETARIO DE LA PESETA. Dr. D. Javier de Santiago Fernández. Catedráticu d’Epigrafía y Numismática. Universidá Complutense de Madrid. (Castellán) 

 

     Isabel II y sus marcas de ceca. www. Numismáticodigital.com (Castellán) 

 

     Blog sobre Isabel II de Javier Martínez (Castellán)

 

     COMPETENCIA ENTRE MONEDAS:EJEMPLOS DEL SIGLO XIX – Joaquín Pérez Cano (Castellán)